پرەزيدەنتكە كەزەكتەن تىس سايلاۋ تاعايىنداۋعا كەدەرگى جوق

استانا. 24 اقپان. قازاقستان رەسپۋبليكاسى كونستيتۋتسيالىق كەڭەسى پارلامەنت سەناتى توراعاسىنىڭ قازاقستان رەسپۋبليكاسى كونستيتۋتسياسىنىڭ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ ماسەلەلەرىن رەتتەيتىن 41-بابى 3-1-تارماعىنا رەسمي تۇسىندىرمە بەرۋ تۋرالى ءوتىنىشى بويىنشا نورماتيۆتىك قاۋلى قابىلدادى. بۇل تۋرالى كونستيتۋتسيالىق كەڭەستىڭ ءباسپاسوز قىزمەتى حابارلادى. كونستيتۋتسيالىق كەڭەس كونستيتۋتسيانىڭ 41-بابى 3-1-تارماعىنىڭ نورماسىن قازاقستان رەسپۋبليكاسى پرەزيدەنتىنىڭ پرەزيدەنتتىڭ كەزەكتەن تىس سايلاۋىن جەكە-دارا تاعايىنداۋعا ايرىقشا قۇقىعى بار دەپ تۇسىنگەن ءجون دەپ ۇعىندىردى. ەلباسىنىڭ پرەزيدەنتتىڭ كەزەكتەن تىس سايلاۋىن تاعايىنداۋ تۋرالى شەشىم قابىلداۋىنا رەسپۋبليكا كونستيتۋتسياسى قانداي دا ءبىر شارتتار مەن شەكتەۋلەر قاراستىرمايدى. «مۇنداي سايلاۋ تاعايىنداۋ تۋرالى شەشىم قابىلداعاندا قازاقستان رەسپۋبليكاسى كونستيتۋتسياسىنىڭ 41-بابىنىڭ 3-تارماعىندا قاراستىرىلعان قازاقستان پرەزيدەنتىنىڭ سايلاۋى مەرزىمى جاعىنان رەسپۋبليكا پارلامەنتىنىڭ جاڭا قۇرامىن سايلاۋمەن تۇسپا-تۇس كەلمەۋگە ءتيىس دەگەن ەرەجە ەسكەرىلۋى كەرەك», - دەلىنگەن كونستيتۋتسيالىق كەڭەستىڭ حابارلاماسىندا. ەسكە سالايىق, 14 اقپان كۇنى قازاقستان حالقى اسسامبلەياسىنىڭ كەڭەسى ازاماتتاردىڭ قازاقستان پرەزيدەنتىنىڭ كەزەكتەن تىس سايلاۋىن وتكىزۋ تۋرالى وتىنىشتەرىن ءبىراۋىزدان قولداعان ەدى. اسسامبلەيا كەڭەسى مۇشەلەرىنىڭ پىكىرىنشە, الەم ەكونوميكاسىنداعى داعدارىستىڭ ءورشىپ تۇرعان جاعدايىندا كەزەكتەن تىس پرەزيدەنت سايلاۋىن وتكىزۋ رەسپۋبليكاعا «نۇرلى جول» باعدارلاماسى مەن ەل دامۋىنىڭ ۇزاق مەرزىمدى دامۋ باسىمدىقتارىن ىسكە اسىرۋعا مۇمكىندىك بەرەدى. كەزەكتەن تىس سايلاۋ وتكىزۋ تۋرالى باستامانى قازاقستان پارلامەنتى - ءماجىلىس جانە سەنات دەپۋتاتتارى قولداپ, مەملەكەت باسشىسىنا سايلاۋ وتكىزۋگە رۇقسات بەرۋ تۋرالى ءوتىنىش جولدادى. سەنات توراعاسى قاسىم-جومارت توقاەۆ كونستيتۋتسيالىق كەڭەسكە كونستيتۋتسيانىڭ پرەزيدەنتتىڭ كەزەكتەن تىس سايلاۋىن بەلگىلەۋ تۋرالى 41-بابىنىڭ 3-1-تارماعىن رەسمي ءتۇسىندىرىپ بەرۋ جونىندە ءوتىنىش ءبىلدىردى. ساكەن مايلىباي.