ۆەدومستۆونىڭ مالىمەتىنشە, ۇلتتىق زاڭناما تالاپتارىن بۇزا وتىرىپ, كارانتيندىك ءونىمدى اكەلۋ ارەكەتى اۋەجايداعى كارانتيندىك فيتوسانيتاريالىق باقىلاۋ جانە قاداعالاۋ بەكەتىندە جۇرگىزىلگەن تەكسەرۋ بارىسىندا توقتاتىلعان.
«فيتوسانيتاريالىق ءىس-شارالار ناتيجەسىندە كورەيا رەسپۋبليكاسىنان اكەلىنگەن, الايدا شىعۋ تەگى ءۇندىستان بولىپ تابىلاتىن قىزاناق تۇقىمدارىنان كارانتيندىك وبەكت – قىزاناق جەمىستەرىنىڭ قوڭىر قاتپارلى ۆيرۋسى (Tomato brown rugose fruit virus) انىقتالدى», دەپ حابارلادى اۋىل شارۋاشىلىعى مينيسترلىگىندە.
اتالعان ۆيرۋس اسا قاۋىپتى كارانتيندىك نىسانداردىڭ قاتارىنا جاتادى. ول اۋىل شارۋاشىلىعى وندىرىسىنە, اسىرەسە كوكونىس شارۋاشىلىعىنا ەلەۋلى زيان كەلتىرۋى مۇمكىن. سونىمەن قاتار ەلدىڭ فيتوسانيتاريالىق قاۋىپسىزدىگىنە ۇلكەن قاتەر توندىرەدى.
«كارانتيندىك ءونىم يەسىنە قاتىستى اكىمشىلىك ءىس قوزعالدى. ءىس ماتەريالدارى پروتسەسسۋالدىق شەشىم قابىلداۋ ءۇشىن سوتقا جولداندى», دەپ تولىقتىردى ۆەدومستۆودا.
مينيسترلىك سىرتقى ەكونوميكالىق قىزمەتكە قاتىسۋشىلارعا قازاقستان اۋماعىنا كارانتيندىك ونىمدەردى اكەلۋ كەزىندە كارانتيندىك فيتوسانيتاريالىق زاڭناما تالاپتارىن قاتاڭ ساقتاۋ قاجەتتىگىن ەسكە سالدى.
