قازىرگى تاڭدا الماتى وبلىسىنىڭ كوللەدجدەرى قىتاي, وڭتۇستىك كورەيا, فرانتسيا, تۇركيا, وزبەكستان جانە قىرعىزستان ەلدەرىنىڭ بىرقاتار وقۋ ورىندارىمەن ىنتىماقتاستىق تۋرالى كەلىسىمشارتتار جاساعان.
اتاپ ايتقاندا, تۇركيانىڭ انتاليا قالاسىنداعى مەحمەت زەكي بالدجى جوعارى مەكتەبى (تۋريزم جانە قوناق ءۇي بيزنەسى), فرانتسيانىڭ پاريج قالاسىنداعى گيوما تيرەل ليتسەيى جانە ەليزا لەمونە ليتسەيى وبلىس كوللەدجدەرىمەن بىرلەسكەن جوبالاردى ىسكە اسىرۋعا نيەت بىلدىرگەن.
الداعى ءۇش جىلدا ەلىمىزدە ءبىلىم الاتىن شەتەل ستۋدەنتتەرىنىڭ سانى كۇرت كوبەيەدى
سونىمەن قاتار, قىتايدىڭ سيان قالاسىنداعى كۋلينارلىق كوللەدجبەن, فينلياندياداعى ECEDU كاسىپتىك كوللەدجى, قىرعىز رەسپۋبليكاسىنداعى س.يبرايموۆ اتىنداعى اگروتەحنيكالىق كوللەدج, قىتايدىڭ چۋنتسين قالاسىنداعى وقۋ ورىندارىمەن جانە كورەيانىڭ OFECO.LTD كومپانياسىمەن ىنتىماقتاستىق جونىندە مەموراندۋمدارعا قول قويىلعان.
2024–2025 وقۋ جىلىندا الماتى وبلىسىنان سەگىز پەداگوگ شەت مەملەكەتتەردە تاعىلىمدامادان ءوتتى. ونىڭ ىشىندە بەس پەداگوگ تۇركيادا, ال ءۇش پەداگوگ فرانتسيادا كاسىبي تاجىريبە جيناقتاعان.
كوللەدج وقىتۋشىلارىنىڭ ايتۋىنشا, حالىقارالىق تاجىريبە كاسىبي دامۋعا تىڭ سەرپىن بەرەدى.
«شەتەلدە تاعىلىمدامادان ءوتۋ بىزگە زاماناۋي وقىتۋ ادىستەرىن مەڭگەرۋگە, ءوندىرىس پەن ءبىلىمنىڭ ءوزارا بايلانىسىن تەرەڭ تۇسىنۋگە مۇمكىندىك بەردى. بۇل تاجىريبە ستۋدەنتتەرمەن جۇمىس ىستەۋ ساپاسىن ارتتىرۋعا تىكەلەي اسەر ەتەدى», دەيدى الماتى وبلىسى كوللەدجىنىڭ باسشىسى باقىتگۇل كىشىباەۆا.
ال ءبىلىم سالاسىنا جاۋاپتى مەكەمە وكىلدەرى بۇل باعىتتاعى جۇمىستىڭ الداعى ۋاقىتتا دا جالعاساتىنىن اتاپ ءوتتى.
الماتىدا قانشا شەتەلدىك ستۋدەنت ءبىلىم الىپ ءجۇر؟
«حالىقارالىق ارىپتەستىك – تەحنيكالىق جانە كاسىپتىك ءبىلىم بەرۋدى جاڭعىرتۋدىڭ ماڭىزدى تەتىگى. ءبىز كوللەدجدەردىڭ الەمدىك ستاندارتتارعا ساي دامۋىنا جانە ەڭبەك نارىعىنا سۇرانىسقا يە ماماندار دايارلاۋىنا باسىمدىق بەرىپ وتىرمىز», دەيدى وبلىستىق ءبىلىم باسقارماسىنىڭ وكىلى كەنجەگۇل دۇيسەنتاەۆا.
بۇدان بولەك, قىتاي – ورتالىق ازيا ەلدەرى اراسىنداعى بىرلەسكەن جوبالار اياسىندا اۋىل شارۋاشىلىعى مەن تەحنيكالىق ماماندىقتار بويىنشا كادر دايارلايتىن جەتى كوللەدج ديرەكتورى جانە وندىرىستىك وقىتۋ جونىندەگى ءبىر ديرەكتوردىڭ ورىنباسارى وتكەن جىلعى 14–24 ءساۋىر ارالىعىندا قىتايدىڭ چۋنتسين قالاسىندا وقۋ كۋرسىنان ءوتتى. ناتيجەسىندە 49 ىنتىماقتاستىق مەموراندۋمىنا قول قويىلدى.
مامانداردىڭ ايتۋىنشا, بۇل باستامالار الماتى وبلىسى كوللەدجدەرىنىڭ حالىقارالىق ستاندارتتارعا ساي دامۋىنا, پەداگوگتاردىڭ كاسىبي دەڭگەيىن ارتتىرۋعا جانە ەڭبەك نارىعىنا قاجەتتى بىلىكتى ماماندار دايارلاۋ ساپاسىن كۇشەيتۋگە مۇمكىندىك بەرەدى.
ينكليۋزيۆتى ءبىلىم بەرۋ ۇيىمدارىندا 10 مىڭنان اسا پەداگوگ قىزمەت ەتەدى
الماتى وبلىسى.
