قازاقستاننىڭ مۇنايىن تاسىمالدايتىن تانكەرلەر شابۋىلعا ۇشىرادى

«قازمۇنايگاز» ۇلتتىق كومپانياسىنىڭ ەنشىلەس كاسىپورنى – «قازاقتەڭىزكولىكفلوتى «ۇلتتىق تەڭىز كەمە قاتىناسى كومپانياسى» جشس (قتكف) مۇناي تاسىمالداۋ ءۇشىن Matilda تانكەرىن جالداعان. كەمەنى كقك تەرمينالىندا 18 قاڭتار كۇنى تيەۋ جوسپارلانعان بولاتىن. الايدا 13 قاڭتاردا تانكەر ۇشقىشسىز ۇشۋ اپپاراتتارىنىڭ شابۋىلىنا ۇشىرادى.

«شابۋىل سالدارىنان ءورتسىز جارىلىس بولدى. ەكيپاج مۇشەلەرى اراسىندا زارداپ شەككەندەر جوق. الدىن الا باعالاۋ بويىنشا كەمە جۇزۋگە جارامدى, باستاپقى تەكسەرۋ كەزىندە ەلەۋلى كونسترۋكتسيالىق زاقىم بەلگىلەرى انىقتالعان جوق. قازىرگى ۋاقىتتا كەلتىرىلگەن شىعىن كولەمى انىقتالىپ جاتىر», دەلىنگەن «قازمۇنايگاز» حابارلاماسىندا.

سونداي-اق ليبەريا تۋى استىندا جۇرگەن Delta Harmony تانكەرى دە جۇك تيەۋدى كۇتۋ رەجيمىندە تۇرعان كەزدە ۇشقىشسىز اپپاراتتاردىڭ شابۋىلىنا ۇشىراعان.

«وقيعا ناتيجەسىندە ءورت شىققان, ول جەدەل تۇردە ءسوندىرىلدى. ەكيپاج مۇشەلەرى زارداپ شەككەن جوق. جەدەل شتابتىڭ مالىمەتىنشە, وقيعا بولعان ساتتە كەمەگە مۇناي تيەۋ جۇمىستارى ءالى باستالماعان, جۇك كەمەلەرى بوس بولعان. وسىعان بايلانىستى قازاقستاننىڭ ەكسپورتتىق رەسۋرستارىنا زيان كەلتىرىلگەن جوق», دەپ اتاپ ءوتتى ەنەرگەتيكا مينيسترلىگىندە.

ەنەرگەتيكا مينيسترلىگى لوگيستيكالىق تىزبەكتەردىڭ قاۋىپسىزدىگىن جانە ەكسپورتتىق جەتكىزىلىمدەردىڭ ۇزدىكسىزدىگىن قامتاماسىز ەتۋ ماقساتىندا «قازمۇنايگاز» ۇلتتىق وپەراتورىمەن, كونسورتسيۋم اكىمشىلىگىمەن جانە كەمە يەلەرىمەن جەدەل رەجيمدە ءوزارا ءىس-قيمىل جۇرگىزىپ جاتىر.

ايتا كەتەيىك, 29 قاراشادا استانا ۋاقىتىمەن 06:06-دا نوۆوروسسيسك پورتى اۋدانىندا كقك-نىڭ تەڭىز ينفراقۇرىلىم نىساندارىنا ەكيپاجسىز ءجۇزۋ قۇرالدارى ارقىلى شابۋىل جاسالعان ەدى. ناتيجەسىندە تەڭىزدەگى قاشىقتاعى ايلاق قوندىرعىسى ۆپۋ-2 (قالقىمالى تيەۋ قۇرىلعىسى) ايتارلىقتاي زاقىمدالدى. ەرمەك كوشەرباەۆ كتك-عا جاسالعان شابۋىلدى ۋكراينا تاراپىمەن تالقىلادى. ەنەرگەتيكا ءمينيسترى ەرلان اقكەنجەنوۆ كتك-عا تولىققاندى بالاما جوق ەكەنىن, ال وزگە باعىتتار تەك جۇكتىڭ بەلگىلى ءبىر بولىگىن عانا تاسىمالداي الاتىنىن ايتقان ەدى. سونىمەن قاتار ماجىلىس دەپۋتاتى ايدوس سارىم الەۋمەتتىك جەلىلەردە كاسپي قۇبىر كونسورتسيۋمىنىڭ تەرمينالىنا جاسالعان شابۋىلدى قولداعان ازاماتتاردى جاۋاپقا تارتۋدى تالاپ ەتتى.