كومپانيانىڭ باس ديرەكتورى ۋيليام لاكوبيدىڭ ايتۋىنشا, كەن ورنىنان 32 جىلدان بەرى وندىرىلگەن مۇناي كولەمى ەسەلەپ ارتتى. ماسەلەن, 1993 جىلى 1 ميلليون توننا مۇناي وندىرىلسە, بىلتىر بۇل كورسەتكىش 28 ملن تونناعا جۋىقتادى. «تەڭىز» جانە «كورولەۆ» كەن ورىندارى الەمدەگى ەڭ كۇردەلى تەحنيكالىق نىساندار قاتارىندا بولعاندىقتان, اكتسيونەرلەر بىرەگەي جاھاندىق تەحنولوگيالىق شەشىمدەر مەن سالالىق ۇزدىك تاجىريبەلەر ەنگىزىپ كەلەدى.
ء«بىز دەرەكتەردى تالداۋ مەن جاساندى ينتەللەكت سالاسىنداعى باستامالاردى بەلسەندى تۇردە قولدايمىز. بۇل باعىتتا بىرنەشە ماسەلەگە نازار اۋدارىپ وتىرمىز. بىرىنشىدەن, الدىن الا تەحنيكالىق قىزمەت كورسەتۋ, ەكىنشىدەن, تيىمدىلىكتى ارتتىرۋ, ۇشىنشىدەن, كۇندەلىكتى وپەراتسيالاردى اۆتوماتتاندىرۋ, تورتىنشىدەن, لوگيستيكا مەن ساتىپ الۋ ۇدەرىستەرىن ينتەللەكتۋالدى وڭتايلاندىرۋ سەكىلدى شەشىمدەر قامتىلدى. يننوۆاتسيالىق تەحنولوگيالار مەن قاۋىپسىز ءارى سەنىمدى جۇمىسقا ادالدىقتىڭ ناتيجەسىندە كومپانيا كەيىنگى ون جىل ىشىندە زاۋىتتاردىڭ ورتاشا سەنىمدىلىك كورسەتكىشىن 98%-دان جوعارى دەڭگەيدە ۇستاپ تۇر. بۇل ەل ەكونوميكاسىنا تۇراقتى تابىس اكەلۋگە مۇمكىندىك بەردى», دەيدى ۋ.لاكوبي.
باس ديرەكتوردىڭ ورىنباسارى كوڭىلقوش سۇيەسىنوۆتىڭ دەرەگىنە قاراعاندا, «تەڭىزشەۆرويل» 1993 جىلدان بەرى ەلىمىزگە 206 ميلليارد اقش دوللارىنان استام تىكەلەي قارجى تولەگەن. ال وتاندىق جەتكىزۋشىلەردەن ساتىپ الىناتىن ءونىم كولەمى ۇلعايتىلىپ, 71%-عا دەيىن جەتكىزىلىپ وتىر.
«1993 جىلدان بەرى تشو جەرگىلىكتى تاۋارلار مەن قىزمەتتەردى ساتىپ الۋعا 51,4 ملرد اقش دوللارىنان استام قارجى جۇمسادى. ساتىپ الىناتىن تاۋارلاردىڭ گەوگرافياسى تەك اتىراۋ وبلىسىمەن شەكتەلمەيدى. ەلىمىزدىڭ ءار وڭىرىندەگى ەكونوميكالىق بەلسەندىلىكتىڭ ارتۋىنا ىقپال ەتۋ ءۇشىن تاۋارلاردى ساتىپ الۋداعى قازاقستاندىق قامتۋ ۇلەسىن تۇراقتى تۇردە ارتتىرىپ كەلەمىز. بيىلعى 6 ايدا بۇل كورسەتكىش 9%-عا ارتتى», دەيدى ك.سۇيەسىنوۆ.
ونىڭ مالىمەتىنە سۇيەنسەك, اتالعان كومپانيا ەنەرگەتيكا مينيسترلىگىمەن بىرگە «تاۋارلار, جۇمىستار مەن قىزمەتتەردەگى ەل ىشىلىك قۇندىلىقتى دامىتۋ باعدارلاماسىن» ازىرلەدى. اتالعان باعدارلاما وتاندىق قامتۋ بويىنشا الداعى بەس جىلعا ارنالعان ماقساتتى ايكىنداۋدا باستى باعدار رەتىندە قولدانىلدى.
«بىلتىردان بەرى كومپانيا جەرگىلىكتى 16 ءوندىرۋشىنى كۆاليفيكاتسيادان وتكىزىپ, بەكىتىلگەن وندىرۋشىلەر تىزىمىنە ەنگىزدى. بۇل اتالعان كاسىپورىنداردىڭ كومپانيا تالاپتارى مەن ستاندارتتارىنا تولىق سايكەستىگىن راستايدى», دەيدى باس ديرەكتوردىڭ ورىنباسارى.
«تەڭىزشەۆرويل» جشس-نىڭ تابىستى سەرىكتەستەرىنىڭ قاتارىندا «PSI Energy» جانە «QMOZ» (قاراساي ماشينا ءوندىرۋ زاۋىتى) بار. بۇل كاسىپورىندار العاشقى مودۋلدىك قوسالقى ستانسانى ءساتتى دايىنداپ شىعارعان. ۇزىندىعى 38 مەتر بولاتىن بۇل ەكى قاباتتى عيماراتتار – ەل اۋماعىندا سالىنعان ەڭ ءىرى مودۋلدىك قوسالقى ستانسالار. جوبانى ىسكە اسىرۋ كەزىندە 800 مىڭ ساعاتتان استام جۇمىس ورىندالىپتى. ءبىر ەرەكشەلىگى, بۇل كەزەڭدە ەڭبەككە جارامدىلىقتى جوعالتۋعا اكەلگەن بىردە-ءبىر جازاتايىم وقيعا تىركەلمەگەن. ءار ءمودۋلدىڭ سالماعى 92 تونناعا دەيىن جەتەدى. بارلىق مودۋل قازاقستان اۋماعىندا قۇراستىرىلىپ, كەشەندى سىناقتاردان وتكىزىلدى.
«قارا التىن» وندىرەتىن ەڭ ءىرى كومپانيا مۇناي-گاز ماشينا جاساۋ سالاسىن دامىتۋعا ارنالعان حالىقارالىق (IMB) ورتالىعىمەن ىنتىماقتاستىق ورناتىپ وتىر. بۇل سەرىكتەستىكتىڭ ناتيجەسىندە ەلىمىزدىڭ ءۇش ءىرى مۇناي-گاز وپەراتورى تاراپىنان 12 تاۋار ساناتى ازىرلەنىپتى. ءىMB ورتالىعى وسى ساناتتار بويىنشا وتاندىق وندىرۋشىلەردى باعالاۋ, وندىرىستىك الەۋەتىن دامىتۋ باعىتىندا جۇيەلى جۇمىس جۇرگىزەدى. بىرلەسكەن جۇمىستىڭ ناتيجەسىندە وتكەن جىلى تەحنيكالىق قىزمەت كورسەتۋ, جوندەۋ, پايدالانۋ, سونداي-اق قورعانىس ماتەريالدارىن جەتكىزۋگە ارنالعان ۇزاقمەرزىمدى كەلىسىمشارتتار جاسالعان. قازىر بىرنەشە ىلەسپە مەموراندۋم مەن كەلىسىم ىسكە اسىرىلىپ جاتىر.
اتىراۋ وبلىسى
