ازياداعى ەڭ ءىرى ادەبي الاڭداردىڭ ءبىرى سانالاتىن كورمەدەگى ۇلتتىق ستەندكە قازاق ادەبيەتىنىڭ كلاسسيكالىق جانە زاماناۋي ۇلگىلەرى, سونداي-اق ەلدىڭ تاريحى مەن مادەنيەتىن تانىتاتىن باسىلىمدار قويىلدى.
ماسەلەن, مۇحتار اۋەزوۆ, ءابىش كەكىلباي, بەردىبەك سوقپاقباەۆ, سايىن مۇراتبەكوۆ, ورالحان بوكەي, دۋلات يسابەكوۆ سىندى شوقتىعى بيىك جازۋشىلاردىڭ شىعارمالارىن قوسقاندا جالپى جيىرماعا جۋىق اۋدارما كىتاپ ۇسىنىلعان. ال ابايدىڭ قارا سوزدەرى حيندي تىلىنە اۋدارىلدى.
ۇيىمداستىرۋشىلاردىڭ ايتۋىنشا, كورمەگە باسپاگەرلەر مەن اۋدارماشىلار عانا ەمەس, ءۇندىستاننىڭ جەتەكشى ۋنيۆەرسيتەتتەرىندە وقيتىن ستۋدەنتتەر دە ەرەكشە قىزىعۋشىلىق تانىتقان.
تاريح عىلىمدارىنىڭ دوكتورى ساتتار ءماجيتوۆتىڭ ايتۋىنشا, قازاق تاريحىنا دەگەن سۇرانىس ايرىقشا بايقالعان.
«بۇگىنگى دەليدەگى كورمە ۇندىستاندىق ستۋدەنتتەر تاراپىنان ۇلكەن قىزىعۋشىلىق تۋدىردى. اسىرەسە دەلي ۋنيۆەرسيتەتى, دجاۆاحارلال نەرۋ ۋنيۆەرسيتەتى, گاندي ۋنيۆەرسيتەتى سەكىلدى جوعارى وقۋ ورىندارىنىڭ وكىلدەرىنەن كوپ سۇراق قويىلدى. ولاردىڭ باسىم بولىگى قازاقستان تاريحىنا قاتىستى بولدى. كورمەدە ەل تاريحىنا ارنالعان كىتاپتار, قازاق تىلىندەگى بەس تومدىق «قازاقستان تاريحى», قازاقستاننىڭ ماتەريالدىق ەمەس مادەني مۇراسى تۋرالى باسىلىم, سونداي-اق مىرزا حايدار ءدۋلاتيدىڭ ەڭبەكتەرى ۇسىنىلدى», دەيدى ول.
ايتا كەتەيىك, ۇندىستانداعى حالىقارالىق كىتاپ جارمەڭكەسى تۇراقتى ۇيىمداستىرىلعالى دا جارتى عاسىردان استام ۋاقىت ءوتىپتى.
كىتاپ كورمەسىنە قاتىسىپ جاتقان فيلولوگ اينۇر احمەتوۆا كەيىنگى جىلدارى قازاق ادەبيەتىنىڭ اعىلشىن ءتىلدى اۋديتورياعا جۇيەلى تۇردە تانىستىرىلىپ كەلە جاتقانىن ايتتى.
كەيىنگى جىلدارى ءبىز كەمبريدج ۋنيۆەرسيتەتى شىعارعان ەكى انتولوگيانى ۇسىنىپ ءجۇرمىز. ولارعا ءحح–ححى عاسىرداعى قازاق اۆتورلارىنىڭ شىعارمالارى ەندى. ءبىرى پروزاعا, ەكىنشىسى پوەزياعا ارنالعان», دەدى ول.
ال جاس جازۋشى الىشەر راحات وسىنداي كورمەلەردە قازاق ادەبيەتىنىڭ بىرنەشە تىلدە ۇسىنىلعانى ماڭىزدى ەكەنىن تىلگە تيەك ەتتى.
ەسكە سالايىق, نيۋ-دەليدەگى حالىقارالىق كىتاپ جارمەڭكەسى 18 قاڭتارعا دەيىن جالعاسادى. قازاقستان ەكسپوزيتسياسىن ازىرلەۋگە مادەنيەت جانە اقپارات مينيسترلىگى, ۇلتتىق كىتاپحانا جانە قازاقستاننىڭ ۇندىستانداعى ەلشىلىگى اتسالىسقان. ۇيىمداستىرۋشىلاردىڭ پىكىرىنشە, مۇنداي جوبالار شەتەلدىك وقىرماندى قازاق ادەبيەتىمەن تانىستىرىپ, ەلدەر اراسىنداعى مادەني بايلانىستاردى نىعايتادى.
