ءبىر توپ ەرىكتى جالعىزىلىكتى زەينەتكەرلەر مەن قارتتاردىڭ اۋلاسىن قاردان تازالاپ, قولعابىس ەتتى. ولار تەك فيزيكالىق ەڭبەكپەن شەكتەلمەي, تۇرمىسىنا كومەك كورسەتىپ, قاريالارمەن اڭگىمەلەسىپ, رۋحاني قولداۋ ءبىلدىردى.
– ءبىز ءۇشىن قاقاعان قىستا اۋلا تازالاۋ – وڭاي شارۋا ەمەس. مۇنداي ساتتەردە ۆولونتەرلەردىڭ كومەگى – ۇلكەن تىرەك. بۇگىنگى جاستاردىڭ قوعامعا قۇرمەتپەن قاراپ, جاناشىرلىق تانىتىپ جۇرگەنى كوڭىلگە ءۇمىت ۇيالاتادى. يگى ءىس ارقىلى جاس بۋىن قازىر ادامگەرشىلىكتىڭ بيىك ۇلگىسىن كورسەتىپ وتىر. سوندىقتان بارشا ەرىكتىلەرگە شىنايى ريزاشىلىعىمدى بىلدىرەمىن, – دەدى ەلوردا تۇرعىنى سۆەتا ەسىمدى قاريا.
وسىلايشا, قارتتار العىسىن جاۋدىرىپ, جاستارعا ءشاي مەن ءتاتتىسىن ۇسىندى. ءبىر جاعىنان بۇل – حالىقتىڭ وسال توپتارىن قولداۋ امالى ءارى الەۋمەتتىك جاۋاپكەرشىلىكتى دامىتۋ تەتىگى.
نەگىزىنەن مۇنداي يگى ىستەر «تازا قازاقستان» اۋقىمدى ەكولوگيالىق اكتسياسى اياسىندا ءداستۇرلى تۇردە جالعاسىپ كەلەدى. وسى جولى يدەيانى 15 ۆولونتەر قولداپ, ەلوردالىق جاستار اراسىندا مەيىرىمدىلىك پەن بەلسەندى ازاماتتىق ۇستانىم مادەنيەتىن كەڭىنەن ناسيحاتتاۋعا تىرىستى.
– ناقتى «قامقورلىق مەكەنجايى» اكتسياسىن تۇراقتى تۇردە وتكىزەمىز. ونىڭ ماقساتى – جەكە سەكتوردا جالعىز تۇراتىن زەينەتكەرلەرگە قار كۇرەپ, قادام باسار جولدارىن اشىپ, وتىندارىنا كومەك كورسەتۋ. بايقوڭىر اۋدانىنداعى ۇلكەن كىسىلەرگە كومەكتەستىك, ولاردىڭ العىسى مەن جىلى لەبىزى بىزگە كۇش-قۋات بەردى. بۇل جۇمىستى كوكتەمگە دەيىن ۇزدىكسىز جالعاستىرامىز, – دەدى «استانا جاستارى» ۆولونتەرى داريا ولەينيكوۆا.
ايتا كەتەيىك, ەلىمىزدەگى «مەيىرىمدى قازاقستان» الەۋمەتتىك اكتسياسى ءوز مارەسىنە جەتتى. بۇل باستاما دا قوعامداعى قولداۋ مادەنيەتىن نىعايتۋعا, الەۋمەتتىك جاۋاپكەرشىلىكتى ارتتىرۋعا جانە جاستاردى يگى ىستەرگە تارتۋعا باعىتتالدى. وتكەن جىلدىڭ اياعىندا ون كۇن بويى رەسپۋبليكانىڭ بارلىق وڭىرىندەگى جاستار ۇيىمدارى مەن ۆولونتەرلەر قايىرىمدىلىق ءىس-شارالارىن وتكىزدى.
ناۋقاننىڭ ءار كۇنى بەلگىلى ءبىر تاقىرىپقا ارنالدى. اتاپ ايتساق, جالعىزىلىكتى زەينەتكەرلەرگە كومەك كورسەتۋ, قارتتار ءۇيى مەن بالالار ۇيىنە قولداۋ ءبىلدىرۋ, مەديتسينالىق مەكەمەلەردە دونورلىق اكتسيالار ۇيىمداستىرۋ, از قامتىلعان وتباسىلارعا كومەك بەرۋ, سونداي-اق كوممۋنالدىق قىزمەت سالاسى قىزمەتكەرلەرىن قولداۋ بويىنشا جوبالار جۇزەگە استى. جالپى 10 مىڭعا جۋىق ازامات قاتىستى.
