مەملەكەت باسشىسى قاسىم-جومارت توقاەۆ 2025 جىلعى ناۋرىزدا بۋرابايدا وتكەن ۇلتتىق قۇرىلتايدىڭ IV وتىرىسىندا: «ۇكىمەت قولدا بار وراسان زور دەرەكتەردى, سونىڭ ىشىندە مۇراعاتتار مەن انىقتامالىق مالىمەتتەردى, عىلىمي زەرتتەۋلەردى, يلليۋستراتسيالار مەن فوتوسۋرەتتەردى, مۋزىكالىق شىعارمالاردى جانە ونەر تۋىندىلارىن تسيفرلىق فورماتقا كوشىرۋ جۇمىسىن باستاپ كەتتى», دەدى. سونداي-اق پرەزيدەنت ۇلتتىق تسيفرلىق مۇراعات قۇرىپ, ونى ەلىمىزدەگى جانە شەتەلدەردەگى نەيروجۇيە جاساۋشىلاردىڭ ەركىن پايدالانۋىنا مۇمكىندىك بەرۋدى دە ۇسىندى. مەملەكەت باسشىسىنىڭ مۋزىكالىق شىعارمالاردى تسيفرلىق فورماتقا كوشىرۋ تاپسىرماسىنا وراي بىلتىر «Qazaqstan» تەلەراديوكورپوراتسياسى قازاقتىڭ ۇلتتىق ونەرى توپتاسقان «اسىل مۇرا» اۋديوجيناعىن جارىققا شىعاردى.
مەملەكەتتىك كەڭەسشى ەرلان قارين اۋديوكىتاپقا جازعان العىسوزىندە: «قازاق حالقىنىڭ ءار داۋىردەگى مادەنيەتىنەن سىر شەرتەر بۇل جيناقتى باسىپ شىعارۋ يدەياسىن بىرنەشە جىل بۇرىن ويعا العانىممەن, كوپشىلىككە ۇسىنۋدىڭ ءساتى ەندى ءتۇستى. مۇنداعى ماقسات – ۇلتتىق ونەر تاريحىنداعى ەسىمدەردى قايتا جاڭعىرتىپ, ءتول مۇرانى دارىپتەۋ, سونىمەن قوسا ۇلتتىق مۋزىكالىق قازىنامىزدى ەرتە زاماننىڭ ءۇنىن ساعىنعان اعا بۋىن مەن بۇگىنگى جاڭاشىل جاستارعا قولجەتىمدى فورمادا ۇسىنۋ», دەگەن ەدى. شىنىندا قازىرگى جاس ۇرپاق داۋلەسكەر كۇيشىلەر قۇرمانعازى, داۋلەتكەرەي, دينا, سەيتەكتى بىلگەنىمەن, سولاردىڭ كوزىن كورىپ, ءىزىن جالعاعان, كۇيشىلىگىمەن دارالانعان لۇقپان مۇحيتوۆ, قالي جانتىلەۋوۆ, جاپپاس قالامباەۆ سەكىلدى ءدۇلدۇل دومبىراشىلاردى بىلە بەرمەۋى, ولاردىڭ كۇيشىلىك مۇراسىمەن دە تانىس بولماۋى مۇمكىن. سول سەكىلدى اسان قايعىدان باستاپ كەردەرى, ءسۇيىنباي, مايلىقوجا, بازار جىراۋلاردىڭ مۋزىكالىق شىعارمالارىن بۇگىنگى كۇنگە جەتكىزگەن باكىر تاجىباەۆ, بالقاشباي ءجۇسىپوۆ, قانابەك رايىسوۆ, يگىلىك وماروۆ, ت.ب. جىرشى-تەرمەشىلەردىڭ باي مۇراسىنان حابارسىز بولۋى عاجاپ ەمەس. وتكەن مەن كەلەشەكتى جالعايتىن التىن كوپىر ىسپەتتى «اسىل مۇرا» اۋديوجيناعى وسىنداي ءبىرتۋار ونەرپازداردىڭ شىعارمالارىن قازىرگى وقىرمانمەن قايتا قاۋىشتىرادى.
اۋديوجيناق «كۇيلەر», «جىر-تەرمەلەر», «حالىق جانە حالىق كومپوزيتورلارىنىڭ اندەرى», «ەرتەگىلەر», «بەسىك جىرى», «رەترو اندەر» دەپ اتالاتىن التى بولىمنەن قۇرالعان. جيناققا نەگىزىنەن «Qazaqstan» تەلەارناسىنىڭ «التىن» قورىندا ساقتالعان شىعارمالار ەنگەن. اتاپ ايتقاندا, اۋديوجيناقتان 400 كۇي, 300 جىر-تەرمە, 400 حالىق جانە حالىق كومپوزيتورلارىنىڭ ءانى, 100 ەرتەگى, 50 بەسىك جىرى, 250 رەترو ءان, بارلىعى 1500 تاريحي اۋديوشىعارمانى تىڭداۋعا بولادى. بۇل شىعارمالار 20 مىڭنان استام مۋزىكالىق اۋديوكونتەنت ىشىنەن كونەلىگى ءارى ساپاسىنا قاراي تاڭداپ الىنىپ, توپتاستىرىلعان. قۇراستىرۋشىلارىنىڭ ايتۋىنشا, «اسىل مۇرا» اۋديوجيناعىنداعى ەڭ كونە مۋزىكالىق مۇرا – اتاقتى ءانشى امىرە قاشاۋباەۆ ورىنداعان «بالقاديشا» ءانى.
سونداي-اق اتالعان جيناققا ەنگەن 1500 اۋديوشىعارما «Ozen» مۋزىكالىق لەيبلىنىڭ كومەگىمەن Apple Music, Spotify, Yandex Music, YouTube Music سەكىلدى 100-دەن اسا الەمدىك مۋزىكالىق پلاتفورماعا ورنالاستىرىلدى. سونىمەن قاتار شىعارمالاردى altynqor.com سايتىنان دا تىڭداۋعا مۇمكىندىك جاسالدى. سونىڭ ارقاسىندا ەلىمىزدەگى جانە شەتەلدەردەگى تىڭدارماندارعا قازاقتىڭ مۋزىكالىق ءتول ونەرىن ينتەرنەت ارقىلى تىڭداۋ قولجەتىمدى بولا ءتۇستى. بۇل ءوز كەزەگىندە ءتول مادەنيەتىمىزدىڭ دامۋىنا سەرپىن بەرىپ قانا قويماي, قازاق ونەرىن بولاشاق يگىلىگىنە جاراتۋعا جول اشتى.
پرەزيدەنت ءبىر سوزىندە: «مادەنيەت – ۇلتتىڭ تولقۇجاتى. جاھان جۇرتى ەلىمىزدى, ەڭ الدىمەن, ونەرىمىز ارقىلى تانىپ بىلەدى. ءبىز – ۇلى دالادا تامىر جايعان بىرەگەي مادەنيەتتىڭ زاڭدى مۇراگەرىمىز. قازاق جەرىنەن شىققان قايتالانباس ونەر يەلەرىنىڭ تەڭدەسسىز تۋىندىلارى تۇتاس ۇلتتى تاربيەلەدى», دەگەن ەدى. سونداي ءتول مادەنيەتىمىزدىڭ دۇنيە جۇزىنە تانىلعانى – ءبىز ءۇشىن مەرەي.
