شىعىس قازاقستاندا جەمقورلىققا قارسى ساباقتار وتۋدە

وسكەمەن. 24 اقپان. وسكەمەندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى شىعىس قازاقستان وبلىسى بويىنشا دەپارتامەنتىنىڭ قىزمەتكەرلەرىنە ارنالعان ارنايى وقىتۋ ساباقتارى ۇيىمداستىرىلۋدا. بۇل جونىندە egemen.kz ءتىلشىسى حابارلادى. جوعارى وقۋ ورىندارىنىڭ وقىتۋشىلارى مەن ماماندارىنىڭ تۇراقتى تۇردە قاتىسۋىمەن وتەتىن ساباقتاردى ۇيىمداستىرۋداعى ماقسات – مەملەكەتتىڭ سىبايلاس جەمقورلىققا قارسى ساياساتىنىڭ نەگىزگى ءارى ماڭىزدى باعىتتارىن قىزمەتكەرلەرگە جەتە ءتۇسىندىرۋ, سىبايلاس جەمقورلىق بويىنشا قۇقىق بۇزۋشىلىق تۋرالى تۇسىنىكتى قالىپتاستىرۋ, سونداي-اق جۇمىس بارىسىندا تۋىنداۋى مۇمكىن قاقتىعىس جاعدايلارىنا پسيحولوگيالىق جانە الەۋمەتتىك داعدىلاندىرۋ, بەيىمدەۋ. اتالعان وقىتۋ ساباقتارى اگەنتتىك قويىپ وتىرعان ماقسات-مىندەتتەردى ساپالى ءارى ناقتى ورىنداۋ, قىزمەتكەرلەردىڭ كاسىبي بىلىكتىلىگىن ارتتىرۋ, دەپارتامەنتتەگى قىزمەتىنە دەيىن قوعامنىڭ ءارتۇرلى سالالارىندا قىزمەت ەتكەن مامانداردى جاڭا جۇمىس ورنىنا بەيىمدەۋ, سونداي-اق مەملەكەتتىك قىزمەتتە ءمىنسىز قىزمەت ەتۋ ارقىلى مەملەكەتتىك قىزمەتشىنىڭ وڭ كەلبەتىن قالىپتاستىرۋ, سىبايلاس جەمقورلىقتىڭ الدىن-الۋ, ەسكەرتۋ جانە ونىمەن كۇرەس جۇرگىزۋدىڭ بىرىڭعاي ادىستەرىن انىقتاۋ ماقساتىندا جۇرگىزىلۋدە. وسىعان دەيىن وسكەمەندەگى قازاق-امەريكا ەركىن ۋنيۆەرسيتەتىنىڭ وقىتۋشىلارى ف.ەسكەندىروۆا مەن ك.الەمباەۆ «ەتيكا جانە مۇددەلەر قاقتىعىسى», «سىبايلاس جەمقورلىققا قارسى ساياساتتىڭ زاڭنامالىق نەگىزدەرى», د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ وقىتۋشىسى ە.ستولياروۆا «قاقتىعىس جاعدايلارىنىڭ پسيحولوگياسى» جانە س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ مۇعالىمى ا.امىرعاليەۆ «سىبايلاس جەمقورلىقپەن كۇرەستىڭ نەگىزدەرى» تاقىرىبىندا دارىستەر وتكىزدى. دۋمان اناش. دەرەك, سۋرەت: egemen.kz.