جاڭعىرتۋ جۇمىستارى بارىسىندا شاتىرلارداعى توزىعى جەتكەن ەسكى جابىندىلار تولىق الىنىپ, قۇرىلىس تالاپتارىنا ساي تەگىستەۋ جۇمىستارى جۇرگىزىلدى. قوقىستار شىعارىلىپ, قارا قاعاز توسەلدى. جاڭارتىلعان سۋاعار جۇيەلەرى ورناتىلىپ, جاۋىن-شاشىنعا قارسى قورعانىس كۇشەيتىلدى.
ەڭ باستىسى, قۇنى 1 ملرد تەڭگە كولەمىندەگى جوبا ۋنيۆەرسيتەت بيۋدجەتىنە سالماق سالماي, ينۆەستوردىڭ قولداۋىمەن جۇزەگە اسىرىلدى.
جالپى, 2024 جىلدىڭ قورىتىندىسى بويىنشا ۋنيۆەرسيتەتتىڭ ەلەكتر ەنەرگياسىن تۇتىنۋ كولەمى 9,17 ملن كۆت/ساع-تى قۇراعان. ال قۋاتى 994 كۆت بولاتىن 1 390 كۇن پانەلى جىلىنا 3,39 ملن كۆت/ساع ەلەكتر ەنەرگياسىن وندىرەدى. بۇل دا ءوز كەزەگىندە قازۇۋ-دىڭ ەنەرگياعا قاجەتتىلىگىنىڭ 35%-ىن قامتاماسىز ەتۋگە مۇمكىندىك بەرەدى. سونىمەن قاتار 20 مىڭ شارشى مەتر اۋماقتى الىپ جاتقان كۇن پانەلدەرىنىڭ ارقاسىندا ۋنيۆەرسيتەت جىل سايىن 111 ملن تەڭگەدەن استام قاراجاتتى ۇنەمدەيدى. قازىر ەكونوميكا جانە بيزنەس جوعارى مەكتەبى, جۋرناليستيكا, زاڭ, تاريح, گەوگرافيا جانە تابيعاتتى پايدالانۋ, بيولوگيا جانە بيوتەحنولوگيا, مەديتسينا جانە دەنساۋلىق ساقتاۋ, فيلولوگيا فاكۋلتەتتەرىنىڭ عيماراتتارىن, سونىمەن بىرگە بىرقاتار ستۋدەنت ءۇيىن كۇن پانەلدەرىمەن جابدىقتاۋ اياقتالدى.
مامانداردىڭ ايتۋىنشا, جابدىقتاردىڭ قىزمەت ەتۋ مەرزىمى ەسكەرىلگەن جاعدايدا, وتەلۋ كەزەڭىنەن كەيىنگى 20 جىلدا جوبانىڭ جالپى ەكونوميكالىق تيىمدىلىگى 2 ملرد تەڭگەدەن اسادى. بۇل جوبانىڭ ۇزاقمەرزىمدى ءارى ەكونوميكالىق تۇرعىدان ءتيىمدى ەكەنىن كورسەتەدى.
جىل سايىن ۋنيۆەرسيتەت بازاسىندا عىلىمي ورتالىقتار, زەرتحانالار قارقىنمەن اشىلىپ جاتىر. 2030 جىلعا قاراي قازۇۋ-دىڭ ەلەكتر ەنەرگياعا دەگەن سۇرانىسى ەكى ەسەگە ارتىپ, 18 ملن كۆت/ساع-تان اسادى دەپ بولجانعان. وسى تۇرعىدا كۇن پانەلدەرى ارقىلى وقۋ ورداسىنىڭ ەلەكتر ەنەرگياسىنا قاجەتتىلىگىنىڭ ءبىر بولىگى بالامالى كوزدەر ارقىلى قامتاماسىز ەتىلمەك.
بۇل ستۋدەنتتەر مەن قىزمەتكەرلەرگە تۇراقتى, ەكولوگيالىق تازا ەنەرگيانى پايدالانۋعا مۇمكىندىك بەرەدى, سونداي-اق ۋنيۆەرسيتەتتىڭ يننوۆاتسيالىق ءيميدجىن نىعايتادى. جوسپارعا سايكەس بولاشاقتا قازۇۋ قالاشىعىنداعى بارلىق فاكۋلتەت پەن جاتاقحانا كۇن پانەلدەرىمەن كەزەڭ-كەزەڭىمەن قامتاماسىز ەتىلەدى.
