اۆتوكولىك وندىرىسىندە ءوسىم بار

وتكەن جىل ەل اۆتوونەركاسىبى ءۇشىن ناقتى كورسەتكىشتەرمەن ەستە قالدى. جىل بويى ەلدەگى زاۋىتتار 171 مىڭ بىرلىك كولىك قۇرالىن شىعاردى. ونىڭ ىشىن­دە جەڭىل اۆتوموبيلدەر دە, جۇك كولىكتەرى مەن اۆتوبۋستار دا بار. قازاقستاننىڭ اۆتوكولىك وداعى (قاو) كەلتىرگەن دەرەككە سايكەس, وندىرىلگەن تەحنيكانىڭ جالپى قۇنى 2,3 ترلن تەڭگەدەن استى.

ال 2024 جىلى زاۋىتتار­دان 145 مىڭ بىرلىك تەحنيكا شىق­قان بولاتىن, ونىڭ جال­پى قۇنى 1,9 ترلن تەڭگە ەدى. ءبىر جىل ىشىندە ءوندىرىس كولە­مى 17,8 پايىزعا وسكەنى تىركەل­دى. قازىر اۆتوونەركاسىپ وڭدەۋ ونەركاسىبىنىڭ جالپى كولەمى­نىڭ 8 پايىزىن الىپ وتىر. ما­شيناجاساۋ سالاسىنىڭ ىشىندە بۇل سەكتوردىڭ ۇلەسى 41,7 پايىز­عا جەتتى.

بۇل كەزەڭدە سالاعا قارجى قۇيۋ دا جالعاستى. 2025 جىلى اۆتوكولىك وندىرىسىنە 113,6 ملرد تەڭگە ينۆەستيتسيا باعىتتالدى. قاراجات زاۋىتتاردى جاڭا جابدىقتارمەن قامتۋعا جانە اۆتوموبيل كومپونەنتتەرىن وندىرۋگە جۇمسالدى. الماتى مەن قوستاناي قالالارىندا جاڭا ءوندىرىس ورىندارى ىسكە قوسىلدى. «Astana Motors Manufacturing Kazakhstan» جانە «Kia Qazaqstan» زاۋىتتارى وسى جىلى جۇمىسىن باستا­دى. وسى كاسىپورىندار ىسكە قوسىل­عاننان كەيىن سالاداعى جۇمىس ورىندارىنىڭ سانى ارتتى. جىل سوڭىنداعى ەسەپ بويىنشا اۆتوونەركاسىپتە 111 مىڭنان استام ادام ەڭبەك ەتىپ ءجۇر.

قاو پرەزيدەنتى انار ماقاشەۆانىڭ سوزىنشە, وتكەن جىل اۆتوونەركاسىپ ءۇشىن ءوندىرىس كولەمى وسكەن كەزەڭ بولدى.

«جاڭا زاۋىتتار ىسكە قوسىل­دى, سونىڭ اسەرىنەن جۇمىس ورىندارىنىڭ سانى ارتتى. قا­زىر سالادا 11 مىڭنان اسا ما­مان ەڭبەك ەتىپ وتىر. اۆتو­مو­بيل ونەركاسىبىنىڭ ماشي­نا جاساۋ سالاسىنداعى ۇلە­سى 41 پايىزعا جۋىقتادى. بۇل وڭ­دەۋ ونەركاسىبىندەگى 8 پايىز­دىق ۇلەسپەن قاتار ءجۇ­رىپ جاتىر. قوسالقى بول­شەك­­تەر وندىرۋشىلەر تاراپى­نان قى­زىعۋشىلىق بار ەكەنىن بايقاپ وتىرمىز. ينۆەستي­تسيا­لار كە­لىپ جاتىر, بىراق الدا ءالى دە شە­شىلۋگە ءتيىس ماسە­لە­لەر جەتكىلىكتى. نەگىزگى مىندەت­تەردىڭ ءبىرى لوكاليزاتسيا دەڭ­گەيىن ارتتىرۋ جانە وندىرىستىك ۇدەرىستەردى جۇيەلى تۇردە دامىتۋ», دەيدى ول.

ءوندىرىس قۇرىلىمىنا كەلسەك, 2025 جىلى جەڭىل اۆتو­كولىك بۇرىنعىداي نەگىزگى ۇلەستى ساقتاپ قالدى. جەڭىل اۆتوكو­لىك ءوندىرىسى 2024 جىلعى 158,9 مىڭ بىرلىك كورسەتكىشپەن سالىس­تىرعاندا  19 پايىزعا ارتتى. كوممەرتسيا­لىق اۆتوكولىك سەگ­مەنتىندە 12,2 مىڭ تەحنيكا شىعارىلدى. بۇل كور­سەتكىش وتكەن جىلمەن سالىس­تىرعاندا 8 پايىزعا جوعارى.

ناقتى زاۋىتتاردىڭ جۇمى­سىنا توقتالعاندا وڭىرلەر ارا­سىنداعى ايىرماشىلىق تا بايقالادى. قوستاناي قالا­سىنداعى Allur توبىنا كىرەتىن «سارىارقااۆتوپروم» زاۋىتى 92,1 مىڭ تەحنيكا قۇراستىردى. بۇل كورسەتكىشكە جەڭىل اۆتوموبيلدەر مەن جۇك كولىكتەرى كىرەدى. ءبىر جىل بۇرىن زاۋىت 90,5 مىڭ تەحنيكا شىعارعان ەدى. الماتى قالاسىندا ورنالاسقان «Hyundai Trans Kazakhstan» كاسىپورنى 52 مىڭ جەڭىل اۆتوموبيل ءوندىردى. بۇل 14,6 پايىزدىق ءوسىم رەتىندە تىركەلدى. جاڭا ىسكە قوسىلعان «Astana Motors Manufacturing Kazakhstan» زاۋى­تى ءتورت ايدىڭ ىشىندە 15,1 مىڭ اۆتوموبيل شىعاردى.

«كوممەرتسيالىق تەحنيكا وندىرىسىندە دە ءارتۇر­لى ناتيجە بار. سەمەي قالاسىن­داعى «سەماز» زاۋىتى 3 مىڭ كوم­­مەرتسيالىق تەحنيكا جو­نەلتتى. بۇل كورسەتكىش 5,3 پا­يىزعا تومەندەدى. «Kia Qazaqstan» زاۋىتى ءۇش اي ىشىندە 2885 كوممەرتسيالىق تەحنيكا ءون­دىردى. قاراعاندى وبلىسىنىڭ ساران قالاسىندا ورنالاسقان QazTehna زاۋىتى 2,6 مىڭ تەحنيكا شىعارىپ, وتكەن جىلمەن سالىستىرعاندا 69,1 پايىزدىق ءوسىم كورسەتتى. كوكشەتاۋداعى «كاماز ينجينيرينگ» كاسىپ­ورنى 1426 بىرلىك جۇك كولىگىن قۇراستىردى, بۇل 6,4 پايىزعا ازايعان. الماتىداعى «Hyundai Trans Almaty» زاۋىتى 754 بىرلىك كوممەرتسيالىق تەحنيكا ءوندىردى. سەمەيدەگى «Daewoo Bus Kazakhstan» كاسىپورنى 341 تەحنيكا شىعاردى. «ۋرالسك­اگرورەمماش» زاۋىتى 25 بىرلىك ارنايى تەحنيكا ءوندىردى», دەدى قاو پرەزيدەنتى.