فوتو: ءماجىلىستىڭ ءباسپاسوز قىزمەتى
«Amanat» پارتياسى فراكتسياسىنىڭ مۇشەلەرى قايرات بالابيەۆ, ۇلاسبەك سادىبەكوۆ, تەمىر قىرىقباەۆ, نۇرسۇلتان بايتىلەسوۆ, ەرلان ابديەۆ تۇركىستان وبلىسى ورداباسى اۋدانى بادام اۋىلدىق وكرۋگى «بادام» يندۋستريالدى ايماعىنداعى «Central Asia Aluminium Company» جشس جۇمىسىمەن تانىستى. اليۋميني پروفيلدەرىن وندىرەتىن بۇل كاسىپورىندا 200 ادام تۇراقتى جۇمىسپەن قامتىلعان. جوبانىڭ العاشقى كەزەڭىندە 4,4 ملرد تەڭگە ينۆەستيتسيا سالىنعان زاۋىت ءونىمىنىڭ باسىم بولىگى ەكسپورتقا شىعارىلادى. دەپۋتاتتار بۇل ءوندىرىس ورنى مەملەكەت باسشىسى قاسىم-جومارت توقاەۆتىڭ وتاندىق ءونىم كولەمىن ارتتىرۋ, وڭدەۋ ونەركاسىبىن دامىتۋ جانە ەكسپورتقا باعدارلانعان وندىرىستەردى قولداۋ جونىندەگى تاپسىرمالارىنىڭ ناقتى جۇزەگە اسۋى ەكەنىن اتاپ ءوتتى.
سونىمەن قاتار ءماجىلىس دەپۋتاتتارى ءوڭىردىڭ اگرارلىق الەۋەتىن دامىتۋ ماسەلەسىنە دە نازار اۋداردى. بۇل باعىتتا قابىلدانىپ جاتقان زاڭنامالىق جانە ينستيتۋتسيونالدىق شارالار پارتيانىڭ سايلاۋالدى باعدارلاماسىندا دا ناقتى كورىنىس تاۋىپ وتىرعانىن جەتكىزدى.
– ءوندىرىس پەن اۋىل شارۋاشىلىعىنىڭ قاتار دامىتۋدىڭ ماڭىزى زور. پارلامەنت تاراپىنان ينۆەستورلارعا قولايلى زاڭنامالىق ورتا قالىپتاستىرۋ, وتاندىق كاسىپورىنداردىڭ باسەكەگە قابىلەتىن ارتتىرۋ باعىتىنداعى جۇمىس جۇيەلى تۇردە جالعاسىن تابادى, – دەدى دەپۋتات ت.قىرىقباەۆ.
جۇمىس ساپارى بارىسىندا دەپۋتاتتار جۋىردا شۇبارسۋ اۋىلىندا پايدالانۋعا بەرىلگەن 600 ورىندىق «پاراسات» جالپى ءبىلىم بەرۋ مەكتەبىنە دە باردى. بىلتىر جەلتوقساندا اشىلعان ءۇش قاباتتى ءبىلىم ورداسى 50 مىڭنان اسا تۇرعىنى بار اۋىلدىڭ جۇكتەمەسىن ازايتىپ, ءبىلىم ساپاسىن ارتتىرۋعا سەپتەسەدى. ءارى مۇندا 70-كە جۋىق ادام تۇراقتى ەڭبەك ەتەدى.
– ءبىلىم بەرۋ ينفراقۇرىلىمىن دامىتۋ – ەلدىڭ بولاشاعىنا سالىنعان ينۆەستيتسيا. پرەزيدەنت باستاماسىمەن جۇزەگە اسىپ جاتقان بۇل جوبالار جاس ۇرپاقتىڭ ساپالى ءبىلىم الۋىنا جانە اۋىل مەن قالا اراسىنداعى ءبىلىم تەڭسىزدىگىن جويۋعا باعىتتالعان, – دەدى دەپۋتات ق.بالابيەۆ.
ال «Respublica» پارتياسىنان سايلانعان ءماجىلىس دەپۋتاتى ايتۋار قوشمامبەتوۆ اتىراۋ وبلىسىنداعى كاسىپكەرلەرمەن كەزدەسىپ, بيزنەستىڭ كۇندەلىكتى جۇمىسىندا تۋىندايتىن ناقتى تۇيتكىلدەردى تىڭدادى. سونىڭ ءبىرى – مەتالل جانە ەلەكتروتەحنيكالىق بۇيىمدار وندىرەتىن, قارقىندى دامىپ كەلە جاتقان «CENTECH» كومپانياسى.
100 پايىز وتاندىق كاسىپورىن ءوڭىردىڭ وندىرىستىك الەۋەتىن ارتتىرۋعا ءوز ۇلەسىن قوسىپ كەلەدى. دەسەك تە, نىسان باسشىسى ازامات كوكەنوۆ جەرگىلىكتى كاسىپورىندار ءۇشىن ءىرى كومپانيالارمەن باسەكەگە ءتۇسۋ وڭاي ەمەس ەكەنىن ايتىپ قالدى. نەگىزگى ءتۇيىن ىشكى نارىقتا وتاندىق ونىمگە تۇراقتى سۇرانىس قالىپتاستىرۋعا, مەملەكەتتىك جانە كۆازيمەملەكەتتىك سەكتوردا ءوزىمىزدىڭ تاۋارلارعا ناقتى باسىمدىق بەرۋگە, جەرگىلىكتى كاسىپورىندارعا ۇزاقمەرزىمدى جۇمىس ىستەۋگە مۇمكىندىك جاسايتىن جۇيەلى تەتىكتەردى ىسكە قوسۋعا كەلىپ تىرەلەدى. ويتكەنى ىشكى نارىقتا سۇرانىس بولماسا, كەز كەلگەن قولداۋ ۋاقىتشا عانا اسەر بەرەدى.
ماجىلىسمەن «دينا» ساۋدا ورتالىعىندا جەرگىلىكتى كاسىپكەرلەرمەن دە جۇزدەستى. كەزدەسۋدە بانكتەر ۇسىناتىن نەسيەلەردىڭ پايىزدىق ۇستەمەسى, تاۋار تاسىمالىنا قاتىستى ەنگىزىلگەن ەلەكتروندى تىركەۋ جۇيەسى جانە جول ينفراقۇرىلىمىنىڭ ساپاسى سىندى پروبلەمالار ورتاعا سالىندى.
ءوز كەزەگىندە «Amanat» پارتياسى فراكتسياسىنىڭ مۇشەسى دۇيسەنباي تۇرعانوۆ اتىراۋ جىلۋ ەلەكتر ورتالىعىنىڭ ۇجىمىمەن كەزدەسىپ, جىلۋ ماۋسىمىندا تۋىنداۋى مۇمكىن قيىندىقتار مەن ءوڭىردى تۇراقتى ەنەرگيامەن قامتاماسىز ەتۋ ماسەلەلەرىن تالقىلادى. كەزدەسۋدە تاريف تۇراقتىلىعىنا, سونداي-اق ازاماتتاردىڭ جايلى تۇرمىسىنا تىكەلەي اسەر ەتەتىن جىلۋ ەلەكتر ورتالىعىن گازبەن قامتاماسىز ەتۋ جۇمىسىنا باسا نازار اۋدارىلدى.
مۇرات ابەنوۆ, مارحابات جايىمبەتوۆ جانە مۇرات ەرگەشباەۆ قىزىلوردا وبلىسىنا جۇمىس ساپارى كەزىندە جەرگىلىكتى «ەكو تاكسي» وتاندىق سەرۆيسىنىڭ جۇمىسىمەن تانىستى, سونداي-اق پرەزيدەنتتىك ساياباقتى قايتا قۇرۋ بارىسىن تەكسەردى. اتالعان جوبا وسىدان ەكى جىل بۇرىن مەملەكەت باسشىسىنىڭ «تازا قازاقستان» جالپىۇلتتىق ەكولوگيالىق باستاماسى اياسىندا ىسكە قوسىلعان ەدى. مۇندا ءار جۇرگىزۋشىگە ءبىر رەيس ءۇشىن 60 تەڭگە تولەنەدى, ال تاپسىرىستىڭ قالعان سوماسى ونىڭ ەسەبىنە تىكەلەي تۇسەدى. جۇرگىزۋشىلەرگە ۇيلەستىرۋشى ۇيىمدار ارقىلى جالاقى مەن الەۋمەتتىك اۋدارىمدار تولەنەدى, جۇمىسقا شىققاندار كۇن سايىن مەديتسينالىق تەكسەرۋدەن وتەدى. سەرۆيستىڭ جۇمىسىن مەملەكەتتىك ورگاندار قاتاڭ باقىلاۋدا ۇستايدى.
سونداي-اق دەپۋتاتتار قىزىلورداداعى پرەزيدەنتتىك ساياباقتى قايتا قۇرۋ جۇمىسىن باقىلادى. جاڭارتۋ جۇمىستارى اياقتالعان سوڭ ساياباقتا 300 ورىندىق بالالار لاگەرى, بوتانيكالىق باق, سۋبۇرقاقتارى بار اللەيالار, امفيتەاتر, سپورت جانە ويىن الاڭدارى, workout ورىندارى, فۋدكورت, ۆەلوجولدار مەن شاعىن سۋ ارنالارى پايدا بولادى.
سولتۇستىك قازاقستان وبلىسىنا بارعان «Amanat» پارتياسى فراكتسياسىنىڭ مۇشەلەرى ەركەبۇلان مامبەتوۆ پەن دميتري كولودا پەتروپاۆلداعى ساڭىراۋقۇلاق فەرماسىنىڭ تاجىريبەسىمەن تانىستى. بىلتىر 20 جەلتوقساندا ىسكە قوسىلعان «Eco Glade» جشس كاسىپورنى جىلىنا 2 400 تونناعا دەيىن agaricus تەكتەس ساڭىراۋقۇلاق پەن 4 مىڭ توننا كومپوست, ياعني شىمتەزەك وندىرۋگە باعدارلانعان. كاسىپورىن 65 ادامدى تۇراقتى جۇمىسپەن قامتىپ وتىر. دەپۋتاتتار بۇل كاسىپورىن ءوڭىردىڭ قايتا وڭدەۋ سەكتورىن دامىتۋعا جانە ازىق-ت ۇلىك قاۋىپسىزدىگىن ارتتىرۋعا سەپتىگىن تيگىزەتىنىن اتاپ ءوتتى. جوبا ارنايى ەكونوميكالىق ايماقتىڭ جەڭىلدىكتەرىن پايدالانا وتىرىپ ىسكە اسىرىلۋدا, بۇل ءوندىرىستى جەدەلدەتىپ ىسكە قوسۋعا جانە ينۆەستيتسيالىق شىعىنداردى ازايتۋعا مۇمكىندىك بەردى.
سونداي-اق ماجىلىسمەندەر كاسىپورىن قىزمەتكەرلەرىنە وڭىرلەردىڭ دەربەستىگىن كۇشەيتۋگە باعىتتالعان جاڭا بيۋدجەت جانە سالىق كودەكستەرى شەڭبەرىندەگى زاڭنامالىق نورمالار تۋرالى ايتىپ بەردى.
