فوتو: مادەنيەت جانە اقپارات مينيسترلىگى
ۆيتەبسك قالاسىندا «ارت-پاراد ۆ ۆيتەبسكە» VII حالىقارالىق فەستيۆال-بايقاۋى ءوتتى. بايقاۋعا قازاقستان, ۇلىبريتانيا, گەرمانيا, يتاليا, قىتاي, گرۋزيا جانە قىرعىزستان سىندى 12 ەلدەن كەلگەن 1 200-دەن استام ونەرپاز قاتىستى.
حالىقارالىق بايقاۋدا ەل نامىسىن تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ «ەسترادالىق ۆوكال» ماماندىعى بويىنشا 4-ءشى كۋرس ستۋدەنتى اقەركە اماليات قورعادى.
ول قازاق حالىق ءانىن ورىنداپ, 129 ۇپاي جيناپ, «ۆوكال» نوميناتسياسى بويىنشا گران-پري يەلەندى.
ايتا كەتەيىك, اقەركە بۇعان دەيىن دە حالىقارالىق جانە رەسپۋبليكالىق دەڭگەيدەگى كوپتەگەن بايقاۋلاردىڭ جەڭىمپازى ءارى لاۋرەاتى اتانعان.
بۇعان دەيىن ۇلىتاۋلىق اۋىل بالالارىنان قۇرالعان انسامبل حالىقارالىق بايقاۋدا جەڭىسكە جەتكەنىن حابارلاعانبىز.
ال يرلانديانىڭ دۋبلين قالاسىندا وتكەن XIII Silk Road International Film Festival قورىتىندىسىندا رەجيسسەر ەلزات ەسكەندىردىڭ ء«ابىل» فيلمىندە باستى ءرولدى سومداعان ەرلان تولەۋتاي «ۇزدىك اكتەر» جۇلدەسىن يەلەنگەن ەدى.
سونداي-اق بۇعان دەيىن «شابىت» حالىقارالىق بايقاۋىنىڭ جەڭىمپازدارى تۋرالى جازعانبىز.
