دۋبايدا «عazaa» جارىسى باستالدى

استانا. 24 اقپان. دۋبايدا وسىمەن جەتىنشى رەت ۇيىمداستىرىلىپ وتىرعان «Fazaa» اتتى حالىقارالىق پاراليمپيادالىق جارىس باستالدى. قازاقستاندىق جەڭىل اتلەتشىلەردىڭ ۇشەۋى العاشقى كۇنى جۇلدەلى بولدى. بۇل تۋرالى دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى حابارلادى. «Fazaa» اتتى بۇل پاراليمپياداشىلار باسەكەسى الەمدەگى دەڭگەيى بيىك, ايگىلى جارىستاردىڭ ءبىرى. جارىس سوڭىنان ۇزدىك سپورتشىلارعا حالىقارالىق پاراليمپيادا كوميتەتى تاراپىنان «گران-پري» جۇلدەسىنىڭ تابىس ەتىلۋى دە اتالمىش باسەكەنىڭ سالماعىن ايقىنداي تۇسسە كەرەك. اقپاننىڭ 26 جۇلدىزىنا دەيىن جالعاساتىن ءدۇبىرلى دودادا 45-تەن استام مەملەكەتتىڭ 500-گە جۋىق پاراليمپياداشىلارى باق سىناۋدا. دۋبايعا قازاقستاننان 34 سپورتشى اتتانعان. كەشە جەرلەستەرىمىزدىڭ العاشقى ولجالارى تۋرالى ءسۇيىنشى حابار جەتتى. قازاقستاندىق جەڭىل اتلەتتەر العاشقى كۇننەن-اق سۋىرىلىپ العا شىعا باستادى. امانات قالقاەۆ (سۋرەتتە) ۇزىندىققا سەكىرۋدەن قاشىقتىقتى 5,34-كە جەتكىزىپ, ازىرگە 3-ورىنعا تابان تىرەدى. ال ماعجان نۇرلىباەۆ بولسا, 100 مەترگە جۇگىرۋدەن كۇمىس جۇلدەنى ج ۇلىپ ءتۇستى (ۋاقىتى – 12,07). ديسك لاقتىرۋدان الەكسەي لۋكۋتين دە ءبىر قولا مەدالدى ەنشىلەپ ۇلگەردى (ناتيجەسى – 16,88 م.). ءسويتىپ, ءبىزدىڭ پاراليمپياداشىلار الداعى الەم چەمپيوناتىنا قاتىسۋعا مۇمكىندىك بەرەتىن 2 جولدامانى يەلەندى. جولدىباي بازار. سۋرەت, دەرەك: دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى.