فوتو: Depositphotos
Mentoday مالىمەتىنشە, FDA (اقش-تىڭ ازىق-ت ۇلىك جانە ءدارى-دارمەك باسقارماسى) رەسمي ۇسىنىمىنا سايكەس, ەرەسەكتەر ءۇشىن تاۋلىگىنە كوفەيننىڭ مولشەرى 400 ميلليگراممنان (ياعني 4 ورتاشا شىنى كوفە) اسپاۋى كەرەك. ال سەرگەكتىك سەزىمى نەبارى 150 ميلليگرامم كوفەيننەن-اق پايدا بولادى. ونىڭ اسەرى العاشقى جۇتىمنان كەيىن شامامەن 5 مينۋتتا سەزىلەدى, ال ونىمدىلىك كەلەسى 2 ساعات ىشىندە ەڭ جوعارى دەڭگەيگە جەتەدى (بۇل كوبىنە سوڭعى رەت قاشان تاماقتانعانىڭىزعا بايلانىستى). ال كوفەيننىڭ شامادان تىس مولشەرى ادەنوزين مەن مەلاتونين گورموندارىنىڭ رەتسەپتورلارىنىڭ قالىپتى جۇمىسىن بوگەپ, ۇيقىنىڭ بۇزىلۋىنا اكەلەدى.
كارديولوگ گرەگوري ماركۋس كوفەيننىڭ ۇيقىعا اسەرى اعزانىڭ ونى قانشالىقتى تەز ىدىراتا الاتىنىنا بايلانىستى دەپ ەسەپتەيدى. ساراپشىنىڭ ايتۋىنشا, مەتابوليزم جىلدامدىعىن انىقتايتىن گەنەتيكالىق ايىرماشىلىقتار بار. كەيبىر ادامدار ۇيىقتاردان ءبىر ساعات بۇرىن ەسپرەسسو ءىشىپ, تەز ۇيىقتاپ كەتسە, ەندى بىرەۋلەر ءتۇنى بويى دوڭبەكشىپ شىعادى. العاشقىلارى جوعارى مەتابوليزم يەلەرى سانالادى (كوفەين ۇيقىعا اسەر ەتپەيدى), ال ەكىنشىلەرىندە مەتابوليزم باياۋ – زەرتتەۋلەر بارىسىندا بۇل توپتا ۇيقى ۋاقىتىنىڭ قىسقارعانى بايقالعان.
جۇيكەگە قوسىمشا سالماق
ماسەلە مىنادا: اعزاداعى نەگىزگى سترەسس گورمونى – كورتيزول – ويانۋ كەزىندە ەڭ جوعارى دەڭگەيگە جەتەدى. تىم ەرتە تۇرۋ سترەسس دەڭگەيىن ودان ءارى ارتتىرادى, ال تاڭ اتپاي ىشىلگەن ءبىر شىنى كوفە جۇيكە جۇيەسىنە قوسىمشا سالماق تۇسىرەدى. سوندىقتان ماماندار العاشقى كوفەنى ويانعاننان كەيىن بىرنەشە ساعات وتكەن سوڭ ىشۋگە كەڭەس بەرەدى.
سونداي-اق كوفەمەن تولىققاندى تاڭعى استى الماستىرۋعا بولمايدى. بۇل جاعدايدا قانداعى قانت دەڭگەيى كوتەرىلەدى, بىراق اعزانىڭ قالىپتى جۇمىس ىستەۋى ءۇشىن قاجەتتى قورەكتىك زاتتار الىنبايدى.
ەڭ پايدالى كوفەنى قالاي تاڭداۋ كەرەك؟
Annals of Internal Medicine جۋرنالىندا جاريالانعان زەرتتەۋگە سايكەس, قاتتىراق قۋىرىلعان كوفە داندەرى جاسقا بايلانىستى وزگەرىستەردىڭ الدىن الۋدا پايدالىراق. سەبەبى قۋىرۋ كەزىندە فەنيليندان دەپ اتالاتىن حيميالىق زاتتار بولىنەدى, ولار پاركينسون مەن التسگەيمەر اۋرۋلارىنىڭ دامۋ قاۋپىن ارتتىراتىن اقۋىز بولشەكتەرىنىڭ قوسىلۋىنا كەدەرگى كەلتىرەدى. الايدا قاتتى قۋىرىلعان كوفەنى تاڭداۋ – ءومىردى ۇزارتىپ, مىقتى دەنساۋلىقتى قامتاماسىز ەتەتىن جالعىز ادەت ەمەس.
