دەپۋتاتتار بارعان نىسانداردىڭ ءبىرى – 2018 جىلدان بەرى ەلەكتر سىمدارى مەن كابەل ونىمدەرىن شىعارىپ كەلە جاتقان «تالدىقورعان كابەل» كاسىپورنى. بۇگىندە زاۋىتتا 200 ادام تۇراقتى جۇمىسپەن قامتىلعان. كاسىپورىن ىشكى نارىقتى وتاندىق ونىممەن قامتاماسىز ەتىپ, ءوڭىردىڭ ونەركاسىپتىك الەۋەتىن ارتتىرۋعا ەلەۋلى ۇلەس قوسىپ وتىر.
«AMANAT» پارتياسى فراكتسياسىنىڭ مۇشەسى بولات كەرىمبەك وتاندىق ءوندىرىستىڭ ەل ەكونوميكاسى ءۇشىن ماڭىزىن اتاپ ءوتتى.
– مۇنداي كاسىپورىندار – ءوڭىر ەكونوميكاسىنىڭ تىرەگى. وتاندىق ءوندىرىستىڭ دامۋى يمپورتقا تاۋەلدىلىكتى ازايتىپ, جاڭا جۇمىس ورىندارىن اشۋعا مۇمكىندىك بەرەدى. مەملەكەت ءۇشىن ەڭ باستىسى – ناقتى ءونىم شىعارىپ, ەلدىڭ سۇرانىسىن قامتاماسىز ەتىپ وتىرعان زاۋىتتاردى قولداۋ. جەتىسۋداعى ءوندىرىس ورىندارى وسى تالاپتارعا تولىق جاۋاپ بەرەدى – دەدى بولات كەرىمبەك.
ءماجىلىس دەپۋتاتى رۋسلان قوجاسباەۆتىڭ ايتۋىنشا, وندىرىستىك ينفراقۇرىلىمدى دامىتۋ – وڭىرلەردىڭ تۇراقتى ءوسىمىن قامتاماسىز ەتەتىن باستى فاكتورلاردىڭ ءبىرى بولىپ وتىر. ونىڭ پىكىرىنشە, جاڭا ءوندىرىس ورىندارىنىڭ اشىلۋى ەكونوميكانى ءارتاراپتاندىرىپ قانا قويماي, حالىقتى تۇراقتى جۇمىسپەن قامتۋعا مۇمكىندىك بەرەدى. دەپۋتات جەتىسۋ وبلىسىندا ىسكە اسىرىلىپ جاتقان جوبالاردى وسىنىڭ ناقتى دالەلى رەتىندە اتاپ ءوتتى.
ايتا كەتەيىك, «AMANAT» پارتياسىنىڭ سايلاۋالدى باعدارلاماسىن ىسكە اسىرۋ اياسىندا جەتىسۋ وبلىسى بويىنشا جوسپارلانعان 89 ءىس-شارانىڭ بۇگىنگى تاڭدا 84-ءى تولىق ورىندالعان. سوڭعى جىلدارى وڭىردە 15 جاڭا ءوندىرىس ورنى ىسكە قوسىلىپ, 2 كاسىپورىننىڭ وندىرىستىك قۋاتى ارتتى. سونىمەن قاتار 25 ينۆەستيتسيالىق جوبا جۇزەگە اسىرىلىپ, ناتيجەسىندە 988 جاڭا جۇمىس ورنى اشىلدى.
تالدىقورعان قالاسىندا ونەركاسىپ ءوندىرىسىنىڭ كولەمى 11 ايدىڭ قورىتىندىسى بويىنشا 6,5%-عا ءوسىپ, 166,4 ملرد تەڭگەنى قۇرادى. ال 2022-2024 جىلدار ارالىعىندا جەتىسۋ وبلىسىنا جالپى كولەمى 1,2 ترلن تەڭگە ينۆەستيتسيا تارتىلىپ, ونىڭ 809 ملرد تەڭگەسى جەكە ينۆەستيتسيالار ۇلەسىنە تيەسىلى بولدى. اتالعان كەزەڭدە وڭىردە 3,8 مىڭ جاڭا جۇمىس ورنى قۇرىلدى.
