سالتاناتتى شارادا وبلىس اكىمىنىڭ ءبىرىنشى ورىنباسارى قانات ەسبولاتوۆ ءوڭىردىڭ دەنساۋلىق ساقتاۋ قىزمەتى مەن ەپيزووتيالىق احۋالىن ساقتاۋدا, تاماق قاۋىپسىزدىگىن قامتاماسىز ەتۋدە ۆەتەريناريالىق ۇيىمداردىڭ ەڭبەگى ەرەكشە ەكەنىن اتاپ ءوتتى.
«وتكەن جىلدى جاقسى ناتيجەمەن اياقتادىق. اتقارىلعان ىستەردىڭ قاتارىندا وبلىستا «ونەركاسىپتى دامىتۋ» قورى ۇسىنعان ليزينگتىك باعدارلاما شەڭبەرىندە الەۋمەتتىك ماڭىزى جوعارى سالالارعا قولداۋ كورسەتىلدى. 1,6 ملرد تەڭگەگە ۆەتەريناريا سالاسىنا 71 بىرلىك ارنايى تەحنيكا, سونداي-اق جەدەل مەديتسينالىق قىزمەتكە 4,4 ملرد تەڭگەگە 90 ارنايى اۆتوكولىك ساتىپ الىندى. جەدەل جاردەم قىزمەتى – دەنساۋلىق ساقتاۋ جۇيەسىندەگى ەڭ ماڭىزدى سالا. سوندىقتان مەديتسينالىق نىسانداردى سالۋمەن قاتار, ولاردىڭ جاڭا تەحنيكالارمەن جابدىقتالۋىن قامتاماسىز ەتىپ, جەدەل جاردەم اۆتوپاركىن دە كەزەڭ-كەزەڭىمەن جاڭارتىپ كەلەمىز. مۇنداعى ماقسات – بارلىق ەلدى مەكەندە تۇرعىندارعا جەدەل ءارى ساپالى مەديتسينالىق كومەك كورسەتۋگە قول جەتكىزۋ. سوعان وراي, بۇگىن جەدەل جاردەم قىزمەتى 20 جاڭا سانيتارلىق اۆتوكولىكتەرمەن تولىقتىرىلدى. اقپان ايىنا دەيىن ليزينگپەن قارجىلاندىرۋ ارقىلى تاعى 70 سانيتارلىق اۆتوكولىك جەتكىزۋ جوسپارلانعان. بۇل, اسىرەسە, اۋىلدىق جەرلەردەن تۇسكەن شاقىرتۋعا جەتۋ ۋاقىتىن قىسقارتىپ, تۇرعىندارعا كورسەتىلەتىن قىزمەت ساپاسىن ارتتىرۋعا مۇمكىندىك بەرەدى», دەدى قانات بولات ۇلى.
جاڭا «JAC T6», «گاز 231073» اۆتوكولىكتەرىنىڭ كىلتى ءار اۋداننان كەلگەن قوس سالانىڭ ەڭبەك ارداگەرلەرىنە سالتاناتتى تۇردە تابىستالدى. اۆتوكولىكتەر العاشقى مەديتسينالىق كومەك كورسەتۋگە ارنالعان قاجەتتى قۇرال-جابدىقتارمەن تولىق قامتاماسىز ەتىلگەن.
وتكەن جىلى ايماقتا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 38 مەديتسينالىق نىسان سالۋ جوسپارلانعان بولاتىن. بۇگىندە 36 نىساننىڭ قۇرىلىسى اياقتالىپ, 12-ءسى پايدالانۋعا بەرىلىپ ۇلگەردى. ولاردىڭ قاتارىندا دارىگەرلىك امبۋلاتوريا, فەلدشەرلىك-اكۋشەرلىك پۋنكت پەن مەديتسينالىق پۋنكت بار. جاقىندا تاعى ەكى امبۋلاتوريانىڭ قۇرىلىسى اياقتالادى. قازىردە وبلىستا 1 جەدەل جاردەم ستانساسى, 12 قوسالقى ستانسا, 64 اۋىلدىق ديسلوكاتسيا جۇمىس ىستەيدى.
وبلىس اكىمدىگىنىڭ مالىمەتىنشە, وتكەن جىلى ۆەتەريناريا بولىمشەلەرىنە 13 اۆتوكولىك بەرىلگەن, سالانىڭ اۆتوپاركى 68%-عا جاڭارتىلعان. جاڭا اۆتوكولىكتەر ۆەتەريناريا ماماندارىنىڭ جۇمىس تيىمدىلىگىن ارتتىرىپ, تۇرعىنداردىڭ وتىنىشتەرىنە جەدەل ارەكەت ەتۋگە, پروفيلاكتيكالىق, ەپيزووتياعا قارسى ءىس-شارالاردى دەر شاعىندا جۇرگىزۋگە مۇمكىندىك بەرەدى.
الماتى وبلىسى
