«استانا ەكو پوليگونى» كاسىپورنىنىڭ قىزمەتكەرلەرىمەن اڭگىمە بارىسىندا ەكولوگيالىق قاۋىپسىزدىك ماسەلەلەرى, سونداي-اق ەلوردادا قالدىقتاردى باسقارۋ جۇيەسىن دامىتۋ پەرسپەكتيۆالارى تالقىلاندى.
اجار ساعاندىقوۆا مۇنداي پوليگوندار توپىراققا عانا ەمەس, اتموسفەراعا دا ەلەۋلى ەكولوگيالىق قاۋىپ توندىرەتىنىن اتاپ ءوتتى. تۇرمىستىق قالدىقتىڭ ىدىراۋ پروتسەسىندە وتە قاۋىپتى ءارى ۋلى گاز – مەتان بولىنەدى. ونىڭ ءيىسى مەن ءدامى بىلىنبەگەنىمەن ادام اعزاسىنا اسا زيان.
تەكسەرۋ بارىسىندا 2025 جىلى پوليگوننىڭ ەكىنشى بولىگى جوبالىق قۋاتىنا جەتكەنى, ال ءۇشىنشى بولىگى ءالى پايدالانۋعا بەرىلمەگەنى انىقتالدى. وعان قوسا, قالدىقتار بۇرىنعىسىنشا قولمەن سۇرىپتالادى. ال پوليگوندى كەڭەيتۋ تۋرالى جوبالىق قۇجاتتاما قازىرگى زامانعى ەكولوگيالىق تالاپتاردى ەسكەرە وتىرىپ پىسىقتاۋدى قاجەت ەتەدى.
سۇرىپتاۋ كورسەتكىشتەرىنىڭ قايتا وڭدەۋ تالاپتارىنا ساي كەلمەيتىنىنە, سونداي-اق ورتالىق جانە جەرگىلىكتى اتقارۋشى ورگاندار جۇمىسىنداعى ۇيلەسىمنىڭ ازدىعىنا دا نازار اۋدارىلدى. دەپۋتات سونىمەن قاتار قوقىس شىعارۋدى جۇزەگە اسىراتىن جەكە كومپانيالاردى باقىلاۋ ماسەلەسىن كوتەردى. ونىڭ ايتۋىنشا, ەكولوگيالىق كودەكستەگى قالدىقتاردى بولەك جيناۋ تۋرالى ەرەجەگە قاراماستان, كومپانيالار بارلىق قالدىقتى ءبىر ماشينامەن شىعارۋدى جالعاستىرىپ جاتىر.
– اكىمدىكتەر جوسىقسىز قىزمەت كورسەتۋشىلەرمەن شارتتاردى بۇزۋعا, ايىپپۇل سانكتسيالارىن قولدانۋعا جانە سوتقا جۇگىنۋگە قۇقىلى. الايدا بۇل شارالار ءىس جۇزىندە قولدانىلمايدى, – دەپ اتاپ ءوتتى اجار ساعاندىقوۆا.
ونىڭ پىكىرىنشە, قىزمەت كورسەتۋشىلەردىڭ جاۋاپكەرشىلىگىن ارتتىرىپ, باقىلاۋ تاسىلدەرىن وزگەرتپەيىنشە, جاعدايدى وزگەرتۋ مۇمكىن ەمەس.
ماجىلىستەگى ەكولوگيالىق زاڭناماعا وزگەرىستەر ەنگىزۋ جونىندەگى جۇمىس توبىنىڭ جەتەكشىسى رەتىندە دەپۋتات قورشاعان ورتانى ساقتاۋعا جانە ەلدەگى ەكولوگيالىق جاعدايدى جاقسارتۋعا باعىتتالعان زاڭنامالىق باستامالار تۋرالى باياندادى. قازىر ەكولوگيالىق كودەكس پەن اكىمشىلىك قۇقىق بۇزۋشىلىق تۋرالى كودەكس اياسىندا تۇرمىستىق قاتتى قالدىقتاردى وڭدەۋ تاسىلدەرى قايتا قارالىپ جاتىر.
– ءبىز تۇبەگەيلى شەشىمدەردى تالاپ ەتەمىز. بۇل كۇردەلى زاڭنامالىق پروتسەسس, بىراق سەسسيانىڭ سوڭىندا جاۋاپكەرشىلىكتى ارتتىراتىن جانە تۇرمىستىق قالدىقتارعا دەگەن كوزقاراستى وزگەرتەتىن سوڭعى شارالاردى ۇسىنۋىمىز كەرەك, – دەپ اتاپ ءوتتى دەپۋتات.
كەزدەسۋدە دەپۋتات پوليگون قىزمەتكەرلەرىنىڭ ەڭبەك جاعدايلارىن, پوليگون مەن قايتا وڭدەۋ ينفراقۇرىلىمىن دامىتۋ ماسەلەلەرىن تالقىلادى.
كاسىپورىن قىزمەتكەرلەرىنىڭ ۇسىنىستارى نازارعا الىنىپ, قاراۋ ءۇشىن ۇكىمەتكە جىبەرىلەتىن بولدى. اتاپ ايتقاندا, قايتالاما شيكىزاتتى سۇرىپتاۋ جانە قايتا وڭدەۋ جۇيەسىنە تۇرعىندار مەن ۇيىمداردى تارتا وتىرىپ, قالدىقتاردى بولەك جيناۋ بويىنشا پيلوتتىق جوبالاردى ىسكە قوسۋ جوسپارلانىپ وتىر.
