ماگيسترالدىق سۋ تاراتقىش جوباسى قالا ءۇشىن جاي عانا ينفراقۇرىلىم ەمەس. ول ىسكە قوسىلعاندا تالعار ەسكى قۇبىرلاردان قۇتىلىپ, تۇراقتى ءارى جەتكىلىكتى اۋىزسۋعا قول جەتكىزۋى ءتيىس ەدى. بىراق قۇرىلىس اياقتالماي, بۇل ءۇمىت كەيىنگە ىسىرىلىپ كەلەدى.
«AMANAT» پارتياسى فراكتسياسىنىڭ مۇشەسى ماكسيم ءروجيننىڭ ايتۋىنشا, جوبا ۋاقىتىندا اياقتالماي وتىرعان باستى سەبەپ − قارجىنىڭ تولىق بولىنبەۋى.
– قازىرگى تاڭدا تالعار قالاسىندا بار بولعانى 4300 تەكشە مەترلىك رەزەرۆۋارلىق قۋات جۇمىس ىستەپ تۇر. بۇل, اسىرەسە جاز مەزگىلىندە, قالا ءۇشىن جەتكىلىكسىز. ال جاڭا جۇيە تولىق ىسكە قوسىلعان كەزدە قوسىمشا 7600 تەكشە مەترگە دەيىن سۋ جەتكىزۋگە مۇمكىندىك بار. جوبا اياسىندا ءتورت رەزەرۆۋار سالىنعانىمەن, سۋ ساپاسىن باقىلاۋعا ارنالعان زەرتحانانىڭ قۇرىلىسى دا جارتى جولدا توقتاپ قالعان. ونىڭ ىشىندەگى نەگىزگى جابدىقتار ءالى ورناتىلماعان, سەبەبى قارجى بولىنبەگەن, – دەيدى دەپۋتات.
جوبا 50 مىڭعا جۋىق تۇرعىندى اۋىزسۋمەن قامتۋى كەرەك. جالپى قۇنى − 4,6 ملرد تەڭگە. الايدا قۇرىلىستى تولىق اياقتاۋ ءۇشىن قاجەت شامامەن 1,7 ملرد تەڭگە ءالى كۇنگە دەيىن بيۋدجەتتەن بولىنبەگەن. بۇل قارجىعا سۋدى حلورلاۋ جۇيەلەرى, زەرتحانالىق قۇرالدار مەن نەگىزگى تەحنولوگيالىق جابدىقتار الىنۋى ءتيىس.
– ءدال وسى جابدىقتار ورناتىلمايىنشا نىساندى پايدالانۋعا بەرۋ مۇمكىن ەمەس. ماسەلە تەك قۇرىلىس كولەمىندە ەمەس, سۋدىڭ ساپاسى مەن تۇرعىنداردىڭ قاۋىپسىزدىگىنە تىكەلەي بايلانىستى. نىساندى 2026 جىلدىڭ شىلدە ايىندا اياقتاۋ جوسپارلانعان. الايدا ول ءۇشىن نەگىزگى جابدىقتار مەن ماتەريالداردى بيىل ساتىپ الۋ قاجەت. ايتپەسە, مەردىگەردىڭ ايتۋىنشا, جوبانىڭ قۇنى قىمباتتاپ, ىسكە اسىرۋ مەرزىمى تاعى دا سوزىلىپ كەتۋى مۇمكىن. سوندىقتان وبلىستىق بيۋدجەتتەن جەتىسپەي تۇرعان قاراجاتتى ۋاقىت وزدىرماي ءبولۋ ماسەلەسىن كوتەرىپ وتىرمىز, – دەدى ماكسيم روجين.
قۇرىلىس توقتاعان سايىن سالماق ەسكى جۇيەگە ءتۇسىپ وتىر. اسىرەسە جاز ايلارىندا ماسەلە ۋشىعادى: سۋ قىسىمى تومەندەيدى, كەي اۋدانداردا اۋىزسۋ ساعاتتاپ, ءتىپتى كۇندەپ بەرىلمەيدى.
تالعار تۇرعىنى احات سولتانقۇلوۆ بۇل قيىندىقتىڭ قاراپايىم حالىق ءۇشىن كۇندەلىكتى كۇيزەلىسكە اينالعانىن جاسىرمايدى.
– جازدا جاعداي ءتىپتى قيىندايدى. اسىرەسە 9 قاباتتى ۇيلەردىڭ جوعارعى جاعىنا سۋ مۇلدە كوتەرىلمەيدى, قىسىم جوق. سۋعا جارىماي قالاتىن كۇندەر بولادى. كەڭدالا مەن اقدالا اۋىلىنداعى ساياجايلاردىڭ جاعدايى تىپتەن قيىن. قالا كۇن سايىن ءوسىپ جاتىر, ال سۋ جۇيەسى باياعى قالپى. شىنىمىزدى ايتساق, ابدەن شارشادىق. ەندى وسى سۋ تاراتقىشتى تەزىرەك ءبىتىرىپ, ىسكە قوسسا ەكەن دەپ كۇتەمىز. باسقا ءۇمىت قالمادى, – دەيدى ول.
ءماجىلىس دەپۋتاتتارى تالعارداعى ماگيسترالدىق سۋ تاراتقىشتى الەۋمەتتىك ماڭىزى بار ستراتەگيالىق جوبا رەتىندە تۇراقتى باقىلاۋدا ۇستايتىنىن مالىمدەدى. سەبەبى بۇل تەك قۇرىلىس نىسانى ەمەس − ونداعان مىڭ ادامنىڭ كۇندەلىكتى تىرشىلىگى مەن قاۋىپسىزدىگى تىكەلەي وسى سۋعا تاۋەلدى.
