فوتو: ۇكىمەتتىڭ ءباسپاسوز قىزمەتى
ۇكىمەت وتىرىسىندا پرەمەر-مينيستر الەۋمەتتىك سالا مەملەكەت ءۇشىن باسىم باعىت بولىپ قالا بەرەتىنىن, مەملەكەت باسشىسىنىڭ تاپسىرماسىنا سايكەس بارلىق الەۋمەتتىك مىندەتتەمەلەر تولىق كولەمدە ورىندالاتىنىن جەتكىزدى. الايدا, بيۋدجەت قاراجاتىن ءتيىمسىز جۇمساۋ مەن بيزنەستەگى الاياقتىققا جول بەرىلمەيتىنىن باسا ايتتى.
ولجاس بەكتەنوۆ ءوز سوزىندە جەكەمەنشىك سەكتوردى قارجىلاندىرۋداعى زاڭسىزدىقتاردى توقتاتۋدى تالاپ ەتتى:
«ارتىق قارجىلاندىرۋدى توقتاتۋ قاجەت. ادال باسەكەلەستىكتە جۇمىس ىستەي الماسا, بىزگە مۇنداي بيزنەستىڭ قاجەتى بار ما؟ بۇل سالادا الاياقتىق كەڭىنەن تارالىپ كەتكەنى بارىنە ءمالىم. وقۋ-اعارتۋ, دەنساۋلىق ساقتاۋ جانە قارجى مينيسترلىكتەرىنە ءبىر اپتا ىشىندە اتالعان ماسەلەلەردى شەشۋگە قاتىستى ناقتى ۇسىنىستار ەنگىزۋدى تاپسىرامىن», دەدى ۇكىمەت باسشىسى.
بۇدان بولەك, پرەمەر-مينيستر ەڭبەك جانە حالىقتى الەۋمەتتىك قورعاۋ مينيسترلىگىنە اكىمدىكتەرمەن بىرلەسىپ, جاردەماقىلار مەن ءتۇرلى الەۋمەتتىك تولەمدەردى تاعايىنداۋ كەزىندە الاياقتىق جاعدايلاردى بولدىرماۋ ءۇشىن كەشەندى شارالار ازىرلەۋدى جۇكتەدى. مەملەكەتتىك قولداۋ تەك زاڭدى جانە مۇقتاج ازاماتتارعا باعىتتالۋى ءتيىس ەكەنى ەرەكشە اتالدى.
