يراندا ۇلتتىق ۆاليۋتانىڭ قۇلدىراۋى جاپپاي نارازىلىقتى كۇشەيتتى

قۇقىق قورعاۋشىلاردىڭ مالىمەتىنشە, سوڭعى توعىز كۇندە  35 ادام وپات بولعان, 1200-دەن استام ازامات ۇستالعان. قازا بولعانداردىڭ 29-ى نارازىلىققا قاتىسۋشىلار, تورتەۋى بالالار, ەكەۋى قاۋىپسىزدىك كۇشتەرىنىڭ قىزمەتكەرلەرى.

نارازىلىق شارالارى كەمىندە 88 قالادا ءوتىپ, ەلدىڭ 31 پروۆينتسياسىنىڭ 27-ءسىن قامتىعان. العاشىندا شاعىن ەلدى مەكەندەردە كۇش قولدانۋ كۇشەيىپ, كەيىن ءدۇمپۋ ءىرى قالالارعا تاراعان. سونىڭ ىشىندە مەشحەد پەن تەگەران بار. ەل كولەمىندە كەمىندە 17 جوعارى وقۋ ورنىندا ستۋدەنتتەر اكتسيالارعا قوسىلعان. ستۋدەنتتىك مەديانىڭ حابارلاۋىنشا, كۇشتىك قۇرىلىمدار ۋنيۆەرسيتەت كامپۋستارى اۋماعىندا رەيدتەر جۇرگىزە باستاعان.

يرانداعى قاقتىعىس: قۇرباندار سانى ارتىپ, جاعداي ۋشىعىپ بارادى

5 قاڭتاردا يراننىڭ سوت جۇيەسى وكىلدەرى ۇستالعاندارعا جەڭىلدىك بولمايتىنىن مالىمدەدى. بۇعان دەيىن ەلدىڭ جوعارعى توراعاسى ءالي حامەنەي تارتىپسىزدىكتەرگە قاتىسقاندارعا قاتاڭ شارا قولدانۋ كەرەگىن ايتقان.

نارازىلىقتار 28 جەلتوقساندا تەگەرانداعى باس بازاردا باستالعان. كوپتەگەن ساۋداگەر ينفلياتسيا مەن باعانىڭ شارىقتاۋىنا قارسى دۇكەندەرىن جاپقان. 29 جەلتوقساندا ريال تاريحي مينيمۋمعا ءتۇستى, شامامەن 1 ريال 0,00002 ەۋروعا تەڭەستى. دۇنيەجۇزىلىك بانك دەرەگىنە ساي, قازان ايىندا يرانداعى ازىق-ت ۇلىك ينفلياتسياسى 64,2 پايىزعا جەتكەن, بۇل كورسەتكىشتەن تەك وڭتۇستىك سۋدان عانا جوعارى.

 يراندا جاپپاي نارازىلىقتارعا بايلانىستى ينتەرنەتكە شەكتەۋ قويىلدى