«حالىق بۋحگالتەرىنىڭ» ماقساتى – جەكە كاسىپكەرلەر مەن شاعىن بيزنەس سۋبەكتىلەرىنە بۋحگالتەرلىك جانە سالىقتىق ەسەپتى دايىنداۋ, ونى تاپسىرۋ جونىندە كونسۋلتاتسيالىق كومەك كورسەتۋ. بيزنەس وكىلدەرى سالىق زاڭناماسىنا قاتىستى تۇسىنبەي جۇرگەن ساۋالدارىن ماماندارعا قويىپ, تەگىن كەڭەس الا الادى.
كاسىپ يەلەرىنە كەڭەس بەرەتىن «حالىق بۋحگالتەرى» قۇرامىنا تاجىريبەلى بۋحگالتەرلەر, كاسىبي اۋديتورلار, بەلگىلى بۋحگالتەرلىك بىرلەستىكتەردىڭ وكىلدەرى, اۋماقتىق مەملەكەتتىك كىرىستەر ورگاندارىنىڭ ماماندارى ەنىپ وتىر. قارجى مينيسترلىگى تاراتقان حابارلامادا ماماندار ءارتۇرلى رەسمي رەسۋرستار مەن الەۋمەتتىك جەلىلەر ارقىلى كەڭەس بەرەدى دەپ كورسەتىلگەن. سونىڭ ىشىندە وسى اكتسياعا ارنالعان ارنايى Telegram ارناسى ىسكە قوسىلىپتى.
«حالىق بۋحگالتەرى» اكتسياسى اياسىندا ونلاين-كونسۋلتاتسيالار, ۆەبينارلار, ەسەپتى كەزەڭدەردەگى تاقىرىپتىق كونسۋلتاتسيالىق سەسسيالار وتكىزىلەدى. كاسىپكەرلەرمەن بەتپە-بەت كەزدەسۋلەر ۇيىمداستىرىلىپ, ولاردى تولعاندىرعان سۇراقتارعا جاۋاپ بەرىلەدى, اقپاراتتىق-ءتۇسىندىرۋ جۇمىستارى جۇرگىزىلەدى. نەگىزگى فورمات – قالالار مەن وبلىس ورتالىقتارىنداعى مەملەكەتتىك كىرىستەر باسقارمالارى بازاسىندا وفلاين قابىلداۋ.
مينيسترلىك وكىلدەرىنىڭ سوزىنشە, كەڭەس بەرۋ 2026 جىلعى قاڭتار-اقپاندا اپتاسىنا 3 رەت, ناۋرىزدان باستاپ 2 رەت وتەدى.
استانا, الماتى مەن شىمكەنت قالالارىندا كونسۋلتاتسيالار وتكىزۋ ءۇشىن جەكە ورىنداردى بەلگىلەۋ جوسپارلانىپ وتىر. ال وڭىرلەردە اۋداندىق دەڭگەيدە, قاجەت بولعان جاعدايدا ماماندار وزدەرى بارىپ, كەڭەس بەرەدى. قابىلداۋ كەزىندە قالالىق, اۋداندىق باسقارمالار اراسىندا بەينەبايلانىس پەن تەلەفون ارقىلى كەڭەس بەرۋ مۇمكىندىگى دە قاراستىرىلعان. «حالىق بۋحگالتەرى» اكتسياسى كەزىندە قارجى مينيسترلىگىنە قاراستى Call-ورتالىقتار دا قىزۋ جۇمىس ىستەپ, ارنايى ماتەريالدار بازاسىن جاڭارتادى, SalykBot Telegram-ارناسى اقپاراتپەن تولىقتىرىلادى.
«العاش رەت وتكىزىلىپ وتىرعان بۇل اكتسيا سالىق تولەۋشىلەرمەن جۇمىس ىستەيتىن مەكەمەلەردىڭ اقپاراتتىق جۇيەلەرىن جەتىلدىرىپ, ونداعى مالىمەتتەردى جۇرتشىلىققا قولجەتىمدى ەتۋدى كوزدەيدى. الداعى ۋاقىتتا قۇقىق بۇزۋشىلىقتاردىڭ الدىن الۋعا جانە كونسۋلتاتسيالىق قولداۋدىڭ ساپاسىن ارتتىرۋعا باعىتتالعان باسقا دا قوسىمشا ءىس-شارالاردى قولعا الۋدى جوسپارلاپ وتىرمىز», دەيدى ۆەدومستۆو وكىلدەرى.
اكتسيا 2026 جىلعى 30 ماۋسىمعا دەيىن جالعاسادى.
