فوتو: اشىق دەرەككوز
ماسەلەن, ايلىق ەسەپتىك كورسەتكىش 4 325 تەڭگەگە جەتسە, كۇنكورىس مينيمۋمى 50 851 تەڭگە بولىپ بەلگىلەندى. ەڭ تومەنگى زەينەتاقى مولشەرى 69 049 تەڭگەگە دەيىن وسەدى.
بالالى وتباسىلارعا بەرىلەتىن بىرجولعى جاردەماقى دا ۇلعايدى. ءبىرىنشى, ەكىنشى جانە ءۇشىنشى بالا تۋعان كەزدە تولەنەتىن تولەم 164 350 تەڭگەنى قۇرايدى. ال ءتورتىنشى جانە ودان كەيىنگى بالالار ءۇشىن بەرىلەتىن جاردەماقى 272 475 تەڭگەگە دەيىن ارتتى.
كوپبالالى وتباسىلارعا ارنالعان اي سايىنعى تولەمدەر دە كوبەيتىلدى. ءتورت بالاسى بار وتباسىلار 69 330 تەڭگە السا, ون بالاسى بار وتباسىلارعا تولەنەتىن جاردەماقى 173 000 تەڭگەگە جەتەدى.
مۇگەدەكتىگى بار ازاماتتارعا كورسەتىلەتىن مەملەكەتتىك قولداۋ كولەمى دە قايتا قارالدى. ءبىرىنشى توپتاعى مۇگەدەكتىك بويىنشا جاردەماقى 111 872 تەڭگەگە, ەكىنشى توپتا 89 498 تەڭگەگە, ءۇشىنشى توپتا 61 021 تەڭگەگە دەيىن ءوستى.
سالىق سالۋ جۇيەسىندە دە ەلەۋلى وزگەرىستەر بار. 2026 جىلعى 1 قاڭتاردان باستاپ قوسىلعان قۇن سالىعى 12 پايىزدان 16 پايىزعا دەيىن وسەدى. سونىمەن بىرگە ققس بويىنشا مىندەتتى تىركەۋ شەگى 15 ملن تەڭگەدەن 40 ملن تەڭگەگە دەيىن ۇلعايتىلدى. بۇل شاعىن كاسىپكەرلەر ءۇشىن اكىمشىلىك جۇكتەمەنى ازايتۋعا باعىتتالعان.
بىرقاتار تاۋارلار مەن قىزمەتتەر ققس-تان بوساتىلادى. ولاردىڭ قاتارىندا تەگىن مەديتسينالىق كومەكتىڭ كەپىلدەندىرىلگەن كولەمى اياسىنداعى قىزمەتتەر, مىندەتتى الەۋمەتتىك مەديتسينالىق ساقتاندىرۋ جۇيەسىندەگى قىزمەتتەر, سونداي-اق وتاندىق كىتاپتار مەن ولاردى باسىپ شىعارۋ قىزمەتتەرى بار.
كورپوراتيۆتىك تابىس سالىعىنىڭ بازالىق مولشەرلەمەسى 20 پايىز دەڭگەيىندە ساقتالادى. الايدا سالالار بويىنشا سارالانعان ءتاسىل ەنگىزىلەدى. بانكتەر مەن ويىن بيزنەسى ءۇشىن مولشەرلەمە 25 پايىزعا دەيىن كوتەرىلەدى. الەۋمەتتىك سالا ۇيىمدارى 2026 جىلى 5 پايىز تولەيدى, ال 2027 جىلدان باستاپ بۇل كورسەتكىش 10 پايىزعا وسەدى. اۋىل شارۋاشىلىعى تاۋارىن وندىرۋشىلەر ءۇشىن جەڭىلدەتىلگەن 3 پايىزدىق مولشەرلەمە قاراستىرىلعان.
اۆتوكولىك يەلەرىنە دە بەلگىلى ءبىر جەڭىلدىكتەر بار. جەڭىل اۆتوموبيلدەرگە سالىق سالۋدا كولىكتىڭ جاسىنا قاراي تومەندەتەتىن كوەففيتسيەنتتەر قولدانىلادى. ون جىلدان جيىرما جىلعا دەيىنگى كولىكتەرگە 0,7 كوەففيتسيەنتى, ال جيىرما جىلدان اسقان كولىكتەرگە 0,5 كوەففيتسيەنتى بەلگىلەنگەن.
سونىمەن قاتار ارداگەرلەر, مەملەكەتتىك ناگرادالارى مەن اتاقتارى بار ازاماتتار, كوپبالالى انالار جانە مۇگەدەكتىگى بار تۇلعالار كولىك سالىعىنان بوساتىلادى. الايدا بۇل جەڭىلدىك قوزعالتقىش كولەمى 4 000 تەكشە سانتيمەتردەن اساتىن جانە مەنشىك قۇقىعى 2013 جىلدىڭ 31 جەلتوقسانىنان كەيىن راسىمدەلگەن كولىكتەرگە قولدانىلمايدى.
جاڭا وزگەرىستەر الەۋمەتتىك قولداۋدى كۇشەيتىپ, سالىق جۇيەسىن تەڭگەرىمدى ەتۋگە باعىتتالعان.
ىلگەرىرەكتە جاڭا سالىق كودەكسىنىڭ كۇشىنە ەنۋىنە بايلانىستى جاڭا رەجيمگە كوشۋ ءتارتىبى مەن وتپەلى كەزەڭ مەرزىمى تۋرالى جازعان بولاتىنبىز.
