2025 جىلى الماتى وبلىسىندا 27 360 جاس ازامات جۇمىسقا ورنالاستىرىلدى. ونىڭ ىشىندە 14 094 جاس جەكە باستامالار اياسىندا ەڭبەك ەتسە, 6 927 ازامات «enbek.kz» پورتالى ارقىلى تۇراقتى جۇمىس تاپتى. ال جۇمىسپەن قامتۋدىڭ بەلسەندى شارالارىنا 3 852 جاس تارتىلىپ, جاستار تاجىريبەسى, قوعامدىق جۇمىستار, الەۋمەتتىك جۇمىس ورىندارى, العاشقى جۇمىس ورنى جانە ۇرپاقتار كەلىسىمشارتى سياقتى باعدارلامالار ىسكە اسىرىلدى.
وڭىردە NEET ساناتىنداعى جاستار سانى ايتارلىقتاي قىسقارىپ, 45 994 ادامنان 27 074 ادامعا دەيىن تومەندەدى. بۇل كورسەتكىش 2024 جىلمەن سالىستىرعاندا 18 920 جاسقا از. قازىرگى تاڭدا الماتى وبلىسىندا 35 جاسقا دەيىنگى جاستار سانى 432 مىڭنان اسادى, بۇل ءوڭىر حالقىنىڭ شامامەن 30 پايىزىن قۇرايدى.
جاستاردىڭ كاسىبي الەۋەتىن ارتتىرۋ ماقساتىندا «بيزنەس باستاۋ» جوباسى اياسىندا 910 جاس وقۋدان ءوتتى. ءوز ءىسىن اشۋعا نيەتتى 91 جاس ازاماتقا 400 اەك نەمەسە شامامەن 1,5 ملن تەڭگە كولەمىندە مەملەكەتتىك گرانت بەرىلدى. سونىمەن قاتار, 254 جۇمىسسىز جاس قىسقا مەرزىمدى كاسىپتىك وقىتۋ كۋرستارىنا جىبەرىلدى.
2025 جىلى وڭىرلىك «تاۋەلسىزدىك ۇرپاقتارى» گرانتى بويىنشا 10 جاسقا 10 ملن تەڭگە تابىستالدى. الماتى وبلىسى اكىمىنىڭ «زاڭعار» سىيلىعىمەن 10 جاس ازامات 5 ملن تەڭگەدەن ماراپاتتالدى. سونداي-اق, اۋىلدىق جاستارمەن جۇمىس ىستەيتىن مامانداردى قولداۋعا ارنالعان «Umtylys» بايقاۋى ۇيىمداستىرىلدى.
«جاسىل ەل» جوباسى اياسىندا 1000 جاس ماۋسىمدىق جۇمىسپەن قامتىلىپ, ونىڭ 800-ءى اۋىل جاستارى بولدى. ال 2026 جىلى تاعى 1 مىڭ جاس ازاماتتى ماۋسىمدىق جۇمىسپەن قامتۋ جوسپارلانىپ وتىر. سونىمەن قاتار, جاستار ەڭبەك جاساقتارىن قۇرىلىس, اگرارلىق جانە ينجەنەرلىك-تەحنيكالىق باعىتتار ارقىلى جاڭعىرتۋ كوزدەلگەن.
جىل ىشىندە بالقاش, كەگەن, رايىمبەك جانە قاراساي اۋداندارىندا 4 جاڭا جاستار ورتالىعى پايدالانۋعا بەرىلدى. قوناەۆ قالاسىندا جاستارعا ارنالعان كوۆوركينگ ورتالىعى اشىلدى. الداعى جىلى تالعار, جامبىل, ەڭبەكشىقازاق جانە ۇيعىر اۋداندارىندا تاعى 4 جاستار ورتالىعىن ىسكە قوسۋ جوسپارلانىپ وتىر.
الماتى وبلىسىندا ۆولونتەرلىك قىزمەتتى دامىتۋ ماقساتىندا volunteers05.kz ەلەكتروندى پلاتفورماسى ىسكە قوسىلىپ, 3 مىڭ بەلسەندى ۆولونتەردەن تۇراتىن بازا قالىپتاستىرىلدى. رەسپۋبليكالىق «يگى ىستەر مارافونى» اياسىندا ءوڭىر «ەڭ مەيىرىمدى ايماق» نوميناتسياسىن جەڭىپ الدى. سونىمەن قاتار, «جىل ۆولونتەرى» حالىقارالىق سىيلىعىمەن 5 ۆولونتەرلىك ۇيىم ماراپاتتالدى.
الماتى وبلىسىندا جۇزەگە اسقان بۇل باستامالار جاستاردىڭ الەۋەتىن ارتتىرۋعا, الەۋمەتتىك بەلسەندىلىگىن كۇشەيتۋگە جانە ولاردىڭ تۇراقتى دامۋىنا سەرپىن بەرىپ وتىر.
