سۋرەت: kt.kz
ۆيتسە-پرەمەردىڭ ايتۋىنشا, 2025 جىل قازاقستاننىڭ مەديا سالاسى ءۇشىن شىن مانىندە ايتۋلى كەزەڭ بولدى. سەبەبى جۇيەلى رەفورمالار جۇزەگە اسىپ, كاسىبي ستاندارتتار نىعايدى. مەملەكەتتىك باستامالار, سەرىكتەستىك جوبالار مەن سالالىق ماڭىزى زور ءىس-شارالار بۇقارالىق اقپارات قۇرالدارىن قولداۋعا جانە اقپاراتتىق كونتەنتتىڭ ساپاسىن ارتتىرۋعا باعىتتالعان تۇراقتى باعدارىمىزدى ايقىندادى.
قازىرگى كەزدە ەلىمىزدە 5 مىڭنان اسا باق تىركەلگەن. ولاردىڭ 306-سى – شەتەلدىك باق. تەك 2025 جىلدىڭ وزىندە 515 جاڭا مەديا ىسكە قوسىلدى. بۇل دەرەك سالاعا دەگەن قىزىعۋشىلىقتىڭ جوعارى ەكەنىن جانە مەديانارىقتىڭ بەلسەندى تۇردە دامىپ كەلە جاتقانىن كورسەتەدى.
«اقپارات سالاسىنداعى زاڭنامانى جەتىلدىرۋ مەملەكەت ساياساتىنىڭ باسىم باعىتتارىنىڭ ءبىرى بولىپ قالا بەرەدى. بيىل وتاندىق باسپا باسىلىمدارىن قولداۋعا ەرەكشە نازار اۋدارىلدى. قولدانىستاعى زاڭناماعا سايكەس جاڭا سالىق كودەكسىندە وتاندىق مەرزىمدى باسپا باسىلىمدارىنا قوسىلعان قۇن سالىعىنىڭ 10 پايىزدىق تومەندەتىلگەن مولشەرلەمەسى ەنگىزىلدى. مەدياكەڭىستىكتىڭ قارقىندى دامۋىن ەسكەرە وتىرىپ, ونلاين-پلاتفورمالار مەن بۇقارالىق اقپارات قۇرالدارىنا قاتىستى, سونداي-اق اكىمشىلىك زاڭناماعا وزگەرىستەر ەنگىزۋدى كوزدەيتىن زاڭ جوبالارى ازىرلەندى. بۇل جۇمىس اقپارات سالاسىندا قۇقىققا قايشى كونتەنتتىڭ تارالۋىن ازايتۋعا باعىتتالعان. ونلاين-پلاتفورمالار اكىمشىلىكتەرى مەن الەۋمەتتىك جەلىلەردەگى ءانونيمدى پايدالانۋشىلاردىڭ جاۋاپكەرشىلىگى كۇشەيتىلەدى. سونىمەن قاتار بالالاردى ونلاين-پلاتفورمالاردا تارالاتىن دەسترۋكتيۆتى كونتەنتتەن قورعاۋ شارالارىن ەنگىزۋ ۇسىنىلۋدا. العاش رەت اۋديوۆيزۋالدى پلاتفورمالاردىڭ قىزمەتى زاڭنامالىق تۇرعىدان رەتتەلىپ, قازاقستان رەسپۋبليكاسىنىڭ اۋماعىندا قىزمەتىن جۇزەگە اسىرۋ ءۇشىن ءتيىستى ليتسەنزيا الۋ مىندەتى بەلگىلەنەدى», دەدى ا.بالاەۆا.
ونىڭ ايتۋىنشا, تسيفرلىق ەفيرلىك تەلەراديو حابارلارىن تاراتۋ اياسىن كەڭەيتۋ جۇمىستارى جالعاسا بەرەدى. جىل سوڭىنا دەيىن 63 جاڭا راديوتەلەۆيزيالىق ستانسا پايدالانۋعا بەرىلدى. بۇل ەل حالقىنىڭ 95 پايىزىن تسيفرلىق ەفيرلىك تەلەديدارمەن قامتۋعا مۇمكىندىك جاسايدى. سونىمەن قاتار مەملەكەتتىك راديوحابار تاراتۋ جەلىسى دە دامىپ كەلەدى. شەكارالاس ەلدى مەكەندەردە 120 راديوتاراتقىش ىسكە قوسىلۋدا. 2025 جىلى تەلەديدار كورۋدى ولشەۋ جۇيەسى كەڭىپ, ەندى ءىرى قالالار عانا ەمەس, حالقى 100 مىڭنان از ەلدى مەكەندەر دە قامتىلدى. قازان-جەلتوقسان ايلارىنداعى ناتيجەلەر بويىنشا ەلىمىزدە تەلەديدار كورۋ كورسەتكىشى 18 پايىزعا ارتقانىن كورسەتتى. تەلەديدار ءالى دە مەدياكەڭىستىكتىڭ ماڭىزدى قۇرامداس بولىگى بولىپ قالا بەرەدى. قازاقستاندا تەلەۆيزيالىق كونتەنت ءوندىرۋ ءىسى تولىققاندى يندۋسترياعا اينالدى. سونىمەن قاتار وتاندىق ونىمدەر كورەرمەن تاراپىنان جوعارى سۇرانىسقا يە بولىپ, مازمۇندىق تۇرعىدان دا ساپالى ەكەنىن كورسەتتى. جىل بويى كورەرمەنگە جاڭالىقتار, دەرەكتى فيلمدەر, ساراپتامالىق جانە زياتكەرلىك باعدارلامالار, سونداي-اق وتاندىق تەلەحيكايالار ۇسىنىلدى.
«حالىقارالىق ىنتىماقتاستىق تا بەلسەندى تۇردە دامىدى. بيىل تۇركيامەن بىرلەسكەن ءىرى جوبالار جۇزەگە اسىپ, «قايتا ورالعان ءۇمىت» اتتى 100 سەريالى تەلەحيكايا اياقتالدى. قىتايمەن بىرلەسىپ العاشقى قازاقستاندىق-قىتايلىق «ىلەدە كۇتەمىن…» تەلەسەريالى ءتۇسىرىلدى. سونىمەن قاتار رەسەي فەدەراتسياسىمەن بىرلەسكەن سەگىز سەريالى «الليگاتور» كوركەم تەلەحيكاياسى جارىق كوردى. «Euronews» ارناسىنىڭ وڭىرلىك وكىلدىگى اياسىندا 2025 جىلى تەلەارنادا اۆتورلىق جوبالار ەفيرگە شىقتى. اتاپ ايتقاندا, قازاقستاننىڭ مادەنيەتى, تاريحى, تابيعاتى مەن داستۇرلەرىنە ارنالعان 20 باعدارلاما, ەكونوميكا, ينۆەستيتسيالار جانە ەۋروپامەن ىنتىماقتاستىق تاقىرىپتارىن قامتىعان 10 ىسكەرلىك باعدارلاما, سونداي-اق اكادەميكتەر, حيرۋرگتەر, سپورتشىلار, اكتەرلەر, ارحەولوگتەر مەن ۇشقىشتار سياقتى تاعىلىمى مول تۇلعالاردىڭ ءومىر جولىن تانىستىراتىن 10 باعدارلاما ۇسىنىلدى. بۇعان قوسا ماڭىزدى وقيعالارعا ارنالعان 5 ارنايى باعدارلاما جارىق كوردى. سونىمەن قاتار وڭتايلاندىرۋدى ەسكەرە وتىرىپ, قاجەتتى شەشىمدەر قابىلداندى. «ەل ارنا» تەلەارناسىنىڭ حابار تاراتۋى توقتاتىلىپ, «قازكونتەنت» قۇرىلىمى وزگەردى. Ruh.kz جانە Baigenews.kz رەسۋرستارىنىڭ قىزمەتى اياقتالىپ, نەگىزگى كۇش-جىگەر الەۋمەتتىك جەلىلەردەگى كرەاتيۆتى كونتەنتتى دامىتۋعا باعىتتالدى», دەدى مينيستر.
سونىمەن قاتار ا.بالاەۆا مەرزىمدى باسىلىمدارعا دەگەن قىزىعۋشىلىقتى ارتتىرۋ ماقساتىندا «قازاق گازەتتەرىنىڭ» قۇرىلىمىن قايتا قاراپ, ەكى ءىرى رەسپۋبليكالىق گازەتتى – «Egemen Qazaqstan» جانە «كازاحستانسكايا پراۆدا» باسىلىمدارىن دەربەس ءارى تاۋەلسىز برەندتەر رەتىندە ءبولۋ ۇسىنىلىپ جاتقانىن, بۇل شەشىم ەلىمىز ءۇشىن ماڭىزى زور ءار گازەتتىڭ الەۋەتىن ارتتىرىپ, مەملەكەت پەن قوعام اراسىنداعى كوممۋنيكاتسيانى نىعايتۋعا ىقپال ەتەتىنىن اتاپ ءوتتى.
بۇعان قوسا ۇكىمەت باسشىسىنىڭ ورىنباسارى 2025 جىلى وڭىردەگى كاسىبي ديالوگتىڭ نەگىزگى الاڭدارى سانالاتىن ءداستۇرلى «Astana Media Week» پەن II ورتالىق ازيا مەديافورۋمى وتكەنىن, سونداي-اق «ۇركەر» ۇلتتىق سىيلىعىنىڭ جانە «تۇمار» ۇلتتىق تەلەۆيزيالىق سىيلىعىنىڭ سالتاناتتى ماراپاتتاۋ راسىمدەرى ۇيىمداستىرىلعانىن ايتتى.
ءسوزىنىڭ سوڭىندا ول قوعامدىق سەنىم, ورتاق قۇندىلىقتارىمىز, اشىق ديالوگ پەن ءوزارا قۇرمەت مادەنيەتى قالىپتاسىپ جاتقانىن ايتا كەلە, بارشا مەديا سالاسىنىڭ وكىلدەرىن جاڭا جىلمەن قۇتتىقتاپ, شىعارماشىلىق شابىت, تولايىم تابىس, جاڭا جەتىستىكتەر تىلەدى.
