روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى ساحناسىندا ۇيىمداستىرىلعان مازمۇنى باي, كوركەمدىك دەڭگەيى جوعارى كونتسەرت كومپوزيتوردىڭ سان قىرلى شىعارماشىلىعىن قامتىدى. كونتسەرتتە ء«ومىر جەلى», «گاۋھار», «جەر-اسپان», «التىن-ارقا», «اناعا ارناۋ», «دارحان دالا» سىندى تىڭدارمان جۇرەگىنەن ورىن العان تۋىندىلار ورىندالىپ, وپەرالاردان ۇزىندىلەر شىرقالدى. سونىمەن قاتار حالىق اندەرى مەن ۇلتتىق بيلەر ساحنا كوركىن اشا ءتۇستى. اكادەميالىق مۋزىكا مەن ءداستۇرلى ونەردىڭ ۇندەستىگى كورەرمەنگە ەرەكشە اسەر سىيلاپ, رۋحاني لاززاتقا بولەدى.
مۋزىكالىق كەش مەملەكەت جانە مۋزىكا ونەرىنىڭ كورنەكتى قايراتكەرى, قوعام قايراتكەرى جەكسەمبەك ەركىمبەكوۆتىڭ 95 جىلدىق مەرەيتويىنا ارنالدى. بۇل – اكە جولىن جالعاپ, ۇلتتىق ونەردىڭ دامۋىنا سۇبەلى ۇلەس قوسىپ جۇرگەن سەرىك ەركىمبەكوۆتىڭ شىعارماشىلىعىنا كورسەتىلگەن زور قۇرمەتتىڭ بەلگىسى بولدى.
سالتاناتتى كەشتە ەلىمىزدىڭ بەلگىلى ونەر مايتالماندارى مەن شىعارماشىلىق ۇجىمدارى ونەر كورسەتتى. اتاپ ايتقاندا, قازاق مەملەكەتتىك سيمفونيالىق وركەسترى, «Gulder» مەن «Birlik» انسامبلدەرى, «بالداۋرەن» بالالار حورى, كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتى حورى مەن اسپاپتىق انسامبلدەرى ساحنا ءسانىن كىرگىزدى. وركەستر تىزگىنىن قازاقستاننىڭ ەڭبەك سىڭىرگەن قايراتكەرلەرى باقىتجان مۇساقوجاەۆا مەن اسقار دۇيسەنباەۆ, سونداي-اق جاس ديريجەر يلياس دۇيسەن ۇستادى.
كەشكە قازاقستاننىڭ ەڭبەك سىڭىرگەن ءارتىسى بەكبولات بايساعاتوۆ, قازاقستاننىڭ ەڭبەك سىڭىرگەن قايراتكەرلەرى نۇرلان يزمايلوۆ, كلارا تولەنباەۆا, بيبىگۇل جانۇزاق, ەرلان رىسقالي, تالعات مۇساباەۆ, جۇپار عابدۋلينا, مەدەت شوتاباەۆ, سالتانات احمەتوۆا جانە حالىقارالىق, رەسپۋبليكالىق بايقاۋلاردىڭ لاۋرەاتتارى قاتىستى. ءاربىر ورىنداۋشى كومپوزيتور شىعارمالارىنىڭ تەرەڭ مازمۇنىن, ۇلتتىق بولمىسىن ايشىقتاي ءبىلدى.
ء«ومىر جەلى» كەشى – ۇلى دالانىڭ كەڭدىگىن, اسقار تاۋلاردىڭ بيىكتىگىن, وزەن-كولدەردىڭ سۇلۋلىعىن, ۋاقىت پەن تاعدىر تىنىسىن اۋەن ارقىلى بەينەلەگەن تاعىلىمدى مادەني وقيعا بولدى. بۇل كونتسەرت سەرىك ەركىمبەكوۆتىڭ شىعارماشىلىق جولىنداعى ماڭىزدى بەلەس قانا ەمەس, ەلوردا مادەني ومىرىندەگى جارقىن ساتتەردىڭ بىرىنە اينالدى.
