فوتو: primeminister.kz
ءمينيستردىڭ ايتۋىنشا, 2025 جىل قازاقستاننىڭ مەديا سالاسى ءۇشىن شىن مانىندە ايتۋلى كەزەڭ بولدى. سەبەبى جۇيەلى رەفورمالار جۇزەگە اسىپ, كاسىبي ستاندارتتار نىعايدى. مەملەكەتتىك باستامالار, سەرىكتەستىك جوبالار مەن سالالىق ماڭىزى زور ءىس-شارالار بۇقارالىق اقپارات قۇرالدارىن قولداۋعا جانە اقپاراتتىق كونتەنتتىڭ ساپاسىن ارتتىرۋعا باعىتتالعان تۇراقتى باعدارىمىزدى ايقىندادى.
«قازىرگى كەزدە ەلىمىزدە بەس مىڭنان استام باق تىركەلگەن. ولاردىڭ ءۇش ءجۇز التىسى – شەتەلدىك باق. تەك 2025 جىلدىڭ وزىندە بەس ءجۇز ون بەس جاڭا مەديا ىسكە قوسىلدى. بۇل دەرەك سالاعا دەگەن قىزىعۋشىلىقتىڭ جوعارى ەكەنىن جانە مەديانارىقتىڭ بەلسەندى تۇردە دامىپ كەلە جاتقانىن كورسەتەدى.
اقپارات سالاسىنداعى زاڭنامانى جەتىلدىرۋ – مەملەكەت ساياساتىنىڭ باسىم باعىتتارىنىڭ ءبىرى بولىپ قالا بەرەدى. بيىل وتاندىق باسپا باسىلىمدارىن قولداۋعا ەرەكشە نازار اۋدارىلدى. قولدانىستاعى زاڭناماعا سايكەس, جاڭا سالىق كودەكسىندە وتاندىق مەرزىمدى باسپا باسىلىمدارىنا قوسىلعان قۇن سالىعىنىڭ 10 پايىزدىق تومەندەتىلگەن مولشەرلەمەسى ەنگىزىلدى», دەپ جازدى مينيستر.
سونىمەن قاتار ونىڭ ايتۋىنشا, مەدياكەڭىستىكتىڭ قارقىندى دامۋىن ەسكەرە وتىرىپ, ونلاين-پلاتفورمالار مەن بۇقارالىق اقپارات قۇرالدارىنا قاتىستى, سونداي-اق اكىمشىلىك زاڭناماعا وزگەرىستەر ەنگىزۋدى كوزدەيتىن زاڭ جوبالارى ازىرلەندى. بۇل جۇمىس اقپارات سالاسىندا قۇقىققا قايشى كونتەنتتىڭ تارالۋىن ازايتۋعا باعىتتالعان.
ونلاين-پلاتفورمالار اكىمشىلىكتەرى مەن الەۋمەتتىك جەلىلەردەگى ءانونيمدى پايدالانۋشىلاردىڭ جاۋاپكەرشىلىگى كۇشەيتىلەدى. سونىمەن قاتار بالالاردى ونلاين-پلاتفورمالاردا تارالاتىن دەسترۋكتيۆتى كونتەنتتەن قورعاۋ شارالارىن ەنگىزۋ ۇسىنىلۋدا.
«العاش رەت اۋديوۆيزۋالدى پلاتفورمالاردىڭ قىزمەتى زاڭنامالىق تۇرعىدان رەتتەلىپ, قازاقستان رەسپۋبليكاسىنىڭ اۋماعىندا قىزمەتىن جۇزەگە اسىرۋ ءۇشىن ءتيىستى ليتسەنزيا الۋ مىندەتى بەلگىلەنەدى.
تسيفرلىق ەفيرلىك تەلەراديو حابارلارىن تاراتۋ اياسىن كەڭەيتۋ جۇمىستارى جالعاسۋدا. جىل سوڭىنا دەيىن 63 جاڭا راديوتەلەۆيزيالىق ستانتسيا پايدالانۋعا بەرىلەدى. بۇل ەل حالقىنىڭ 95 پايىزىن تسيفرلىق ەفيرلىك تەلەديدارمەن قامتۋعا مۇمكىندىك جاسايدى. سونىمەن قاتار مەملەكەتتىك راديوحابار تاراتۋ جەلىسى دە دامىپ كەلەدى. شەكارالاس ەلدى مەكەندەردە 120 راديوتاراتقىش ىسكە قوسىلۋدا.2025 جىلى تەلەديدار كورۋدى ولشەۋ جۇيەسى كەڭىپ, ەندى تەك ءىرى قالالار عانا ەمەس, حالقى 100 مىڭنان از ەلدى مەكەندەر دە قامتىلدى. قازان–جەلتوقسان ايلارىنداعى ناتيجەلەر بويىنشا ەلىمىزدە تەلەديدار كورۋ كورسەتكىشى 18 پايىزعا ارتقانىن كورسەتتى.
تەلەديدار ءالى دە مەدياكەڭىستىكتىڭ ماڭىزدى قۇرامداس بولىگى بولىپ قالا بەرەدى. قازاقستاندا تەلەۆيزيالىق كونتەنت ءوندىرۋ ءىسى تولىققاندى يندۋسترياعا اينالدى. سونىمەن قاتار وتاندىق ونىمدەر كورەرمەن تاراپىنان جوعارى سۇرانىسقا يە بولىپ, مازمۇندىق تۇرعىدان دا ساپالى ەكەندىگىن كورسەتتى. جىل بويى كورەرمەنگە جاڭالىقتار, دەرەكتى فيلمدەر, ساراپتامالىق جانە زياتكەرلىك باعدارلامالار, سونداي-اق وتاندىق تەلەحيكايالار ۇسىنىلدى», دەپ جازدى ا.بالاەۆا.
حالىقارالىق ىنتىماقتاستىق تا بەلسەندى تۇردە دامىدى. بيىل تۇركيامەن بىرلەسكەن ءىرى جوبالار جۇزەگە اسىپ, «قايتا ورالعان ءۇمىت» اتتى 100 سەريالى تەلەحيكايا اياقتالدى. قىتايمەن بىرلەسىپ العاشقى قازاقستاندىق-قىتايلىق «ىلەدە كۇتەمىن…» تەلەسەريالى ءتۇسىرىلدى. سونىمەن قاتار رەسەي فەدەراتسياسىمەن بىرلەسكەن سەگىز سەريالى «الليگاتور» كوركەم تەلەحيكاياسى جارىق كوردى.
«Euronews ارناسىنىڭ وڭىرلىك وكىلدىگى اياسىندا 2025 جىلى تەلەارنادا اۆتورلىق جوبالار ەفيرگە شىقتى. اتاپ ايتقاندا, قازاقستاننىڭ مادەنيەتى, تاريحى, تابيعاتى مەن داستۇرلەرىنە ارنالعان 20 باعدارلاما, ەكونوميكا, ينۆەستيتسيالار جانە ەۋروپامەن ىنتىماقتاستىق تاقىرىپتارىن قامتىعان 10 ىسكەرلىك باعدارلاما, سونداي-اق اكادەميكتەر, حيرۋرگتەر, سپورتشىلار, اكتەرلەر, ارحەولوگتار مەن ۇشقىشتار سياقتى تاعىلىمى مول تۇلعالاردىڭ ءومىر جولىن تانىستىراتىن 10 باعدارلاما ۇسىنىلدى. بۇعان قوسا, ماڭىزدى وقيعالارعا ارنالعان 5 ارنايى باعدارلاما جارىق كوردى.
سونىمەن قاتار وڭتايلاندىرۋدى ەسكەرە وتىرىپ, قاجەتتى شەشىمدەر قابىلداندى. «ەل ارنا» تەلەارناسىنىڭ حابار تاراتۋى توقتاتىلىپ, «قازكونتەنت» قۇرىلىمى وزگەردى. Ruh.kz جانە Baigenews.kz رەسۋرستارىنىڭ قىزمەتى اياقتالىپ, نەگىزگى كۇش-جىگەر الەۋمەتتىك جەلىلەردەگى كرەاتيۆتى كونتەنتتى دامىتۋعا باعىتتالدى.مەرزىمدى باسىلىمدارعا دەگەن قىزىعۋشىلىقتى ارتتىرۋ ماقساتىندا «قازاق گازەتتەرىنىڭ» قۇرىلىمىن قايتا قاراپ, ەكى ءىرى رەسپۋبليكالىق گازەتتى — «ەگەمەن قازاقستان» جانە «كازاحستانسكايا پراۆدا» باسىلىمدارىن دەربەس ءارى تاۋەلسىز برەندتەر رەتىندە ءبولۋ ۇسىنىلدى. بۇل شەشىم ەلىمىز ءۇشىن ماڭىزى زور ءار گازەتتىڭ الەۋەتىن ارتتىرىپ, مەملەكەت پەن قوعام اراسىنداعى كوممۋنيكاتسيانى نىعايتۋعا ىقپال ەتەدى», دەدى ول.
2025 جىلى وڭىردەگى كاسىبي ديالوگتىڭ نەگىزگى الاڭدارى سانالاتىن ءداستۇرلى Astana Media Week پەن II ورتالىق ازيا مەديافورۋمى ءوتتى. سونداي-اق «ۇركەر» ۇلتتىق سىيلىعىنىڭ جانە «تۇمار» ۇلتتىق تەلەۆيزيالىق سىيلىعىنىڭ سالتاناتتى ماراپاتتاۋ راسىمدەرى ۇيىمداستىرىلدى.
«قۇرمەتتى ارىپتەستەر! سىزدەرگە كاسىبي بىلىكتىلىك پەن جاۋاپكەرشىلىكتەرىڭىز جانە مەملەكەتتىك ساياساتتى ىسكە اسىرۋعا كورسەتىپ وتىرعان بەلسەندى قولداۋلارىڭىز ءۇشىن شىنايى العىسىمدى بىلدىرەمىن. كۇندەلىكتى اتقارىپ وتىرعان قاجىرلى ەڭبەكتەرىڭىزدىڭ, رەفورمالار مەن باستامالاردى, سونداي-اق «ادال ازامات», «تازا قازاقستان», «زاڭ جانە ءتارتىپ» قاعيداتتارىن وبەكتيۆتى ءارى ۋاقتىلى جاريالاۋلارىڭىزدىڭ ارقاسىندا قوعامدا سەنىم نىعايىپ, ورتاق قۇندىلىقتارىمىز, اشىق ديالوگ پەن ءوزارا قۇرمەت مادەنيەتى قالىپتاسۋدا.
بۇقارالىق اقپارات قۇرالدارى جۇزەگە اسىرىلىپ جاتقان وزگەرىستەردىڭ ءمانىن ءتۇسىندىرىپ, سىندارلى قوعامدىق پىكىرتالاس قالىپتاستىرۋدا شەشۋشى ءرول اتقارادى. بيىلعى جىل قازاقستاننىڭ مەديا سالاسى دامىپ, جاڭارىپ, ءارى ءوزىنىڭ بىرەگەي بولمىسىن ساقتاي وتىرىپ, الەمگە اشىق ەكەنىن ايقىن كورسەتتى. بارشا مەديا سالاسىنىڭ وكىلدەرىن كەلە جاتقان جاڭا جىلمەن شىن جۇرەكتەن قۇتتىقتايمىن! سىزدەرگە شىعارماشىلىق شابىت, تولايىم تابىس, جاڭا جەتىستىكتەر تىلەيمىن!», دەپ لەبىزىن ءبىلدىردى ايدا بالاەۆا.
