سااكاشۆيلي تاعى دا سىن ساداعىنا ءىلىندى

استانا. 23 ناۋرىز. گرۋزياداعى بيلەۋشى كواليتسيا – «گرۋزين ارمانىنىڭ» نەگىزىن قالاۋشى, ەلدىڭ بۇرىنعى پرەمەر-ءمينيسترى بيدزينا يۆانيشۆيلي ميحايل سااكاشۆيلي تۋرالى پىكىرىن ءبىلدىردى. ول ەكس-پرەزيدەنتتىڭ پارتياسى «بىرىڭعاي ۇلتتىق قوزعالىستىڭ» بيلىككە قايتادان كەلۋى ءۇشىن جاساعان ىستەرىن بوس اۋرەشىلىك دەپ سانايدى. بۇل تۋرالى ريا نوۆوستي حابارلادى. يۆانيشۆيلي ءوزىنىڭ «2030» كەشكىلىك تەلەجوباسىندا: «ولار قايتادان بيلىككە كەلىپ, بۇرىن وزدەرىنىڭ قولىندا بولعان دۇنيەنىڭ ءبارىن قايتارۋدى قالاي ما؟ ەگەر سولاي ويلايسا گرۋزين حالقىن سونشالىقتى اقىماق ساناعانى. الدە وزدەرى بيلىكتە بولعان كەزدە ەل تۇرمەلەرىندە بولعان جاعدايدى ۇمىتىپ قالدى ما؟ سوندىقتان ولاردىڭ بيلىككە قايتا كەلۋى ءۇشىن جاساعان ارەكەتتەرى بوس اۋرەشىلىك. سەبەبى, ولاردىڭ كەزىندەگى احۋال وسىنشالىقتى تەز ۇمىتىلىپ كەتپەيدى. ەگەر وزدەرى سولاي ويلاسا, قاتەلەسەدى», – دەدى. بيدزينا يۆانيشۆيلي 2012-2013 جىلدارى گرۋزيانىڭ پرەمەر-ءمينيسترى بولدى. «سۇر كاردينال» دەگەن اتپەن دە تانىمال مەملەكەت قايراتكەرى. ول پرەمەر-مينيستر قىزمەتىن ءوزى سىناپ وتىرعان ەكس-پرەزيدەنتتىڭ تۇسىندا وتكىزدى. مامانداردىڭ ايتۋىنشا, «گرۋزيا ارمانى» پارتياسىنىڭ سايلاۋدا جەڭىسكە جەتۋى سااكاشۆيليگە اۋىر سوققى بولدى. ەلدىڭ قازىرگى باسشىسى گەورگي مارگۆەلاشۆيليدىڭ پرەزيدەنت سايلاۋىنا «گرۋزين ارمانى» كواليتسياسىنىڭ اتىنان قاتىسقانىن ايتا كەتەيىك. ەلامان قوڭىر. دەرەك, سۋرەت: ريا نوۆوستي.