COVID-19 پاندەمياسى جۇقپالى اۋرۋلار مەن ەپيدەميالاردىڭ ادامداردىڭ ومىرىنە جانە الەۋمەتتىك-ەكونوميكالىق دامۋعا, اسىرەسە ەڭ كەدەي ءارى ەڭ وسال ەلدەردە, قانداي اپاتتى سالدار اكەلۋى مۇمكىن ەكەنىن ايقىن كورسەتتى. بۇل تۋرالى بىرىككەن ۇلتتار ۇيىمى 27 جەلتوقساندا اتاپ وتىلەتىن حالىقارالىق ەپيدەميالارعا دايىندىق كۇنىنە وراي ەسكە سالدى.
ەپيدەميالار مەن پاندەميالار ۇلتتىق دەنساۋلىق ساقتاۋ جۇيەلەرىنە شامادان تىس جۇكتەمە تۇسىرەدى, جاھاندىق جەتكىزۋ تىزبەكتەرىن بۇزادى جانە حالىقتىڭ وسال توپتارىنا, سونىڭ ىشىندە ايەلدەر مەن بالالارعا قاتتى اسەر ەتەدى.
حالىقارالىق قاۋىمداستىق تاراپىنان جەتكىلىكتى كوڭىل بولىنبەگەن جاعدايدا, بولاشاق ەپيدەميالار اۋقىمى مەن اۋىرلىعى جاعىنان الدىڭعى ىندەتتەردەن دە اسىپ ءتۇسۋى مۇمكىن. وسىعان بايلانىستى اقپاراتتاندىرۋدى ارتتىرۋعا, عىلىم, ءبىلىم مەن وزىق تاجىريبە الماسۋعا, سونداي-اق جەرگىلىكتى, ۇلتتىق, وڭىرلىك جانە جاھاندىق دەڭگەيلەردە ءبىلىم بەرۋ جانە اعارتۋشىلىق باعدارلامالاردى دامىتۋعا ەرەكشە ءمان بەرىلەدى.
بۇۇ سونداي-اق ەپيدەميالاردىڭ الدىن الۋ شارالارىن كۇشەيتۋدىڭ جانە كەز كەلگەن بولاشاق قاۋىپتەرگە جەدەل ءارى ءتيىمدى جاۋاپ بەرۋگە دايىندىقتى ارتتىرۋدىڭ ماڭىزدىلىعىن اتاپ ءوتتى. بۇل تۇرعىدا ادام, جانۋار جانە وسىمدىك دەنساۋلىعىن قورعاۋ سالالارى, سونداي-اق قورشاعان ورتانى قورعاۋ جانە باسقا دا ءتيىستى قۇرىلىمدار اراسىنداعى ىنتىماقتاستىقتى نىعايتاتىن ءبىرتۇتاس دەنساۋلىق كەشەندى ءتاسىلى ماڭىزدى ءرول اتقارادى.
– ءبىزدىڭ ەڭ مىقتى قورعانىسىمىز – تەك عىلىم عانا ەمەس, سونىمەن قاتار مىقتى جەرگىلىكتى دەنساۋلىق ساقتاۋ جۇيەلەرى, بارلىق قاجەتتى قۇرالدارمەن قامتاماسىز ەتىلگەن, الدىڭعى شەپتە تۇرعان مەديتسينا قىزمەتكەرلەرى جانە داعدارىس كەزىندە ءوز قاۋىمدارىن باستاپ جۇرە الاتىن جەرگىلىكتى كوشباسشىلار, – دەپ اتاپ ءوتتى بۇۇ باس حاتشىسى انتونيۋ گۋتەرريش ۇندەۋىندە.
ەپيدەميالارعا قارسى جاھاندىق ارەكەتتەردى ۇيلەستىرۋدە بىرىككەن ۇلتتار ۇيىمى جۇيەسى, اسىرەسە دۇنيەجۇزىلىك دەنساۋلىق ساقتاۋ ۇيىمى, نەگىزگى ءرول اتقارۋىن جالعاستىرىپ كەلەدى.
باس حاتشى ەپيدەميالار مەن پاندەميالار قاۋپى ارتىپ, گۋمانيتارلىق داعدارىستار كوبەيىپ جاتقانىن ەسكە سالا وتىرىپ, «ارەكەتتى كەيىنگە قالدىرۋعا بولمايتىنىن» ايتتى. وسىعان بايلانىستى ەلدەر دۇنيەجۇزىلىك دەنساۋلىق ساقتاۋ ۇيىمىمەن بىرلەسىپ پاندەميالارعا قارسى كۇرەس جونىندەگى كەلىسىمدى ازىرلەدى. ونىڭ ماقساتى – ۆاكتسينالارعا, ەمدەۋگە, جابدىقتارعا, اقپاراتقا جانە مەديتسينالىق كومەككە بۇكىل الەم بويىنشا تەڭ قولجەتىمدىلىكتى قامتاماسىز ەتۋ.
– قاۋىمداستىقتار قورعالعان كەزدە, ءبارىمىز قورعالامىز, – دەپ تۇيىندەدى بۇۇ باسشىسى.
