باتىس قازاقستان وبلىسىنىڭ ءبورلى اۋدانىنا قاراستى اقساي قالاسىندا №1 جالپى ورتا ءبىلىم بەرەتىن مەكتەپتىڭ جاڭا عيماراتى پايدالانۋعا بەرىلدى. نىسان «كەلەشەك مەكتەپتەرى» جوباسى اياسىندا سالىندى.
مەكتەپتىڭ اشىلۋ سالتاناتىندا سويلەگەن سوزىندە باتىس قازاقستان وبلىسىنىڭ اكىمى ناريمان تورەعاليەۆ مەملەكەت باسشىسى قاسىم-جومارت توقاەۆ ءبىلىم بەرۋ سالاسىن دامىتۋعا ەرەكشە ءمان بەرىپ وتىرعانىن اتاپ ءوتتى.
ء«بىلىمدى ءارى سانالى ۇرپاق تاربيەلەۋ – اسا ماڭىزدى مەملەكەتتىك مىندەت. «كەلەشەك مەكتەپتەرى» جوباسى – وسكەلەڭ ۇرپاققا جاسالىپ وتىرعان ناقتى ءارى جۇيەلى قولداۋ. بۇل مەكتەپ جاڭا داۋىرگە لايىق, باسەكەگە قابىلەتتى تۇلعالاردى تاربيەلەۋگە قىزمەت ەتەدى», دەدى ءوڭىر باسشىسى.
اقساي قالاسىندا 58 مىڭعا جۋىق تۇرعىن بار. بۇعان دەيىن №1 مەكتەپ 1953 جىلى سالىنعان, جوبالىق قۋاتى 450 ورىنعا ەسەپتەلگەن ەسكى عيماراتتا ورنالاسىپ, اپاتتى جاعدايدا بولعان ەدى. جاڭا مەكتەپتىڭ ىسكە قوسىلۋى قالاداعى اپاتتى ءبىلىم بەرۋ نىسانى ماسەلەسىن شەشۋگە مۇمكىندىك بەردى.
جاڭا عيمارات 300 ورىنعا ەسەپتەلگەن. مەكتەپ ەكى قاباتتى, جەتى بلوكتان تۇرادى. ونىڭ ءۇش بلوگى باستاۋىش سىنىپتار مەن مەكتەپالدى دايارلىق توپتارىنا ارنالعان. دەنە شىنىقتىرۋ-ساۋىقتىرۋ نىساندارى جەكە بلوكتا ورنالاسقان. ەكىنشى قاباتتا كىتاپحانا, 110 ورىندىق اكت زالى, حورەوگرافيا زالى, STEM زەرتحاناسى, IT سىنىپ, مۇعالىمدەر بولمەسى جانە بىرنەشە كوۆوركينگ ايماعى قاراستىرىلعان.
مەكتەپتە بارلىعى 28 وقۋ كابينەتى بار, ولار ينتەراكتيۆتى تاقتامەن جابدىقتالعان. سونىمەن قاتار, بەينەلەۋ ونەرى, گرافيكا جانە جوبالاۋ, ديزاين جانە تەحنولوگيا, تاماقتانۋ مادەنيەتى, ءۇي مادەنيەتى كابينەتتەرى, ەكى ينفورماتيكا كابينەتى جانە 110 ورىندىق اسحانا جۇمىس ىستەيدى.
مەكتەپ اۋماعى اباتتاندىرىلىپ, بالالارعا ارنالعان ويىن الاڭى, فۋتبول جانە باسكەتبول الاڭدارى, جۇگىرۋ جولدارى سالىنعان.
جاڭا مەكتەپ اقساي قالاسىنداعى وقۋشىلاردى قاۋىپسىز ءارى زاماناۋي وقۋ ورنىمەن قامتاماسىز ەتىپ, وڭىردەگى ءبىلىم بەرۋ ساپاسىن ارتتىرۋعا باعىتتالعان ماڭىزدى الەۋمەتتىك نىسانعا اينالدى.
