ينۆەستيتسيالىق سەرپىن
قور باسشىسى نۇرلان جاقىپوۆتىڭ ايتۋىنشا, ەنەرگيا تاسىمالداۋشىلار نارىعىنداعى باعانىڭ قۇبىلمالىلىعىنا, سىرتقى ەكونوميكالىق جاعدايلاردىڭ كۇردەلى بولۋىنا قاراماستان «سامۇرىق-قازىنا» توبى نەگىزگى قارجىلىق كورسەتكىشتەر بويىنشا وڭ ديناميكا كورسەتتى. جىل قورىتىندىسىندا توپ اكتيۆتەرى شامامەن 45 ترلن تەڭگەگە جەتەدى دەپ بولجانىپ وتىر. بۇل 2024 جىلمەن سالىستىرعاندا شامامەن 10%-عا جوعارى. سونداي-اق, بولجام بويىنشا, كىرىس كولەمى 18 ترلن تەڭگەدەن اسىپ, بىلتىرعى دەڭگەيدەن 12%-عا ارتادى. تازا پايدا 2 ترلن تەڭگەدەن اسۋى مۇمكىن.
بۇگىندە «سامۇرىق-قازىنا» توبىنىڭ ينۆەستيتسيالىق پورتفەلىندە جالپى قۇنى شامامەن 52 ترلن تەڭگە بولاتىن 130-دان استام جوبا بار. بۇل جوبالار مۇناي-گاز حيمياسى, ەنەرگەتيكا, لوگيستيكا, كوممۋنيكاتسيالار سىندى ەكونوميكانىڭ ستراتەگيالىق ماڭىزدى سالالارىندا جۇزەگە اسىرىلىپ جاتىر.
2025 جىلى سۋ, گاز تارتۋ, ەنەرگەتيكا, لوگيستيكا, «تازا» ەنەرگيا سالالارىندا جالپى قۇنى 1,1 ترلن تەڭگەدەن اساتىن 9 ءىرى ينۆەستيتسيالىق جوبا اياقتالدى. اتاپ ايتقاندا:
- كەندىرلى اۋىلىندا تاۋلىگىنە 50 000 م³ سۋ تۇششىتاتىن زاۋىتتىڭ قۇرىلىسى اياقتالدى. ءسويتىپ جاڭاوزەن قالاسى مەن ماڭعىستاۋ وبلىسىنىڭ تۇرعىندارى ءۇشىن اۋىزسۋ تاپشىلىعى ماسەلەسى شەشىلدى;
- Caspi Bitum زاۋىتىنىڭ قۋاتى 1,5 ەسەگە ارتىپ, جىلىنا 750 مىڭ تونناعا جەتتى. بۇل ىشكى نارىقتى تۇراقتى تۇردە جول بيتۋمىمەن قامتاماسىز ەتەدى;
- «تالدىقورعان – ءۇشارال» گاز قۇبىرى سالىندى. ماڭىزدى جوبانىڭ ارقاسىندا 134 مىڭ ادام تۇراتىن 84 ەلدى مەكەنگە كوگىلدىر وتىن تارتىلدى. بۇل تۇرعىنداردىڭ ءومىرىن جەڭىلدەتىپ, ءوڭىردىڭ ەكولوگيالىق احۋالىن جاقسارتۋعا سەپ بولدى;
- جاڭاوزەندە قۋاتى 50 مۆت بولاتىن كۇن ەلەكتر ستانساسى ىسكە قوسىلىپ, وڭىردە «تازا» ەلەكتر ەنەرگياسىن ءوندىرۋ كولەمى ارتتى;
- لوگيستيكانى دامىتۋ ماقساتىندا اقتاۋدا جاڭا كونتەينەرلىك حاب اشىلدى, الماتىدا Zhetysu تەرمينالى جۇمىسىن باستادى. بۇل رەسپۋبليكانىڭ ترانزيتتىك الەۋەتىن ارتتىرۋعا مۇمكىندىك بەرەدى.
حالىقارالىق ىنتىماقتاستىق نىعايىپ كەلەدى
2025 جىلى قوردىڭ حالىقارالىق ارەناداعى ءرولى نىعايىپ, شەتەلدىك سەرىكتەستەرىنىڭ قاتارى ءبىرشاما تولىقتى. قازاقستان–قىتاي ىسكەرلىك كەڭەسى اياسىندا جالپى سوماسى 15 ملرد دوللاردان اساتىن 70-تەن استام كوممەرتسيالىق قۇجاتقا قول قويىلدى.
مەملەكەت باسشىسىنىڭ اقش-قا رەسمي ساپارى بارىسىندا قور ۇيىمدارى بىرقاتار ءىرى كەلىسىم جاساستى. اتاپ ايتقاندا, «Boeing» كومپانياسىمەن 18 اۋە كەمەسىن ساتىپ الۋ جونىندە كەلىسىمشارتقا قول قويىلسا, «قازاقستان تەمىر جولى» «Wabtec» كومپانياسىمەن 300 جۇك لوكوموتيۆىن جەتكىزۋ, ولارعا سەرۆيستىك قىزمەت كورسەتۋ تۋرالى ۋاعدالاستى. ال «قازاقتەلەكوم» «Amazon Kuiper» كومپانياسىمەن ەلىمىزدە سپۋتنيكتىك بايلانىس قىزمەتتەرىن ىسكە قوسۋعا كەلىستى.
سونىمەن قاتار يوردانيا, موڭعوليا, رۋاندا ەلدەرىمەن ىنتىماقتاستىق جونىندە كەلىسىمدەر ورناتىلدى. قازاقستان پرەزيدەنتىنىڭ جاپونياعا رەسمي ساپارى اياسىندا «سامۇرىق-قازىنا» توبىنىڭ كومپانيالارى ەنەرگەتيكا, جاڭارتىلاتىن ەنەرگيا كوزدەرى, تسيفرلاندىرۋ, تاۋ-كەن ونەركاسىبى, كولىك سالالارىندا جالپى سوماسى 1,5 ملرد دوللاردى قۇرايتىن 9 قۇجاتقا قول قويدى.
حالىقارالىق سەرىكتەستەرمەن بىرلەسكەن جوبالار ەل ەكونوميكاسىن نىعايتۋعا, جاڭا جۇمىس ورىندارىن اشىپ, ءوندىرىس پەن ونەركاسىپ سالاسىن دامىتۋعا مۇمكىندىك بەرەدى.
وتاندىق بيزنەستى قولداۋ
وتاندىق تاۋار وندىرۋشىلەردى قولداۋ قور قىزمەتىنىڭ باسىم باعىتتارىنىڭ ءبىرى بولىپ قالا بەرەدى. «سامۇرىق-قازىنانىڭ» وتاندىق كاسىپورىنداردان ساتىپ العان تاۋارلار مەن قىزمەتتەر كولەمى 2023 جىلعى 625 ملرد تەڭگەدەن 2025 جىلى 2 ترلن تەڭگەگە دەيىن ءوستى. وسىلايشا, قوردىڭ ساتىپ الۋ جۇيەسى ەكونوميكالىق ىنتىماقتاستىق پەن دامۋ ۇيىمى, دۇنيەجۇزىلىك بانك, ەۋروپالىق قايتا قۇرۋ جانە دامۋ بانكى, ازيا دامۋ بانكى سىندى الەمدىك بەدەلدى قارجى ۇيىمدارى تاراپىنان حالىقارالىق وزىق ستاندارتتارعا ساي دەپ تانىلدى.
الەۋمەتتىك جاۋاپكەرشىلىك
قور قىزمەتىندەگى باسىم باعىتتاردىڭ ءبىرى – الەۋمەتتىك جاۋاپكەرشىلىك. سوڭعى ەكى جىلدا كومپانيالار توبى الەۋمەتتىك جوبالار مەن قايىرىمدىلىققا شامامەن 1,5 ترلن تەڭگە بولگەن. بۇل قاراجات مەديتسينا مەكەمەلەرى مەن مادەني نىسانداردى سالۋعا, ينفراقۇرىلىم مەن سپورتتى دامىتۋعا, ينكليۋزيۆتى ءبىلىم بەرۋدى قولداۋعا جۇمسالدى.
جىل سوڭىنا دەيىن ەلىمىزدە قوردىڭ قولداۋىمەن 55-وڭالتۋ ورتالىعى اشىلماق. بۇگىندە 1,5 مىڭ بالاعا ارنالعان 31 ينكليۋزيا كابينەتى جۇمىس ىستەپ تۇر. سونداي-اق ەل كولەمىندە 740 مىڭ تۇرعىندى قامتيتىن 18 سپورت كەشەنى حالىق يگىلىگىنە بەرىلدى. سونىمەن قاتار جۇمىسشى ماماندىقتار جىلىندا 10 مىڭنان استام ستۋدەنت قور توبىنىڭ وندىرىستىك نىساندارىندا دۋالدى وقىتۋ مەن تاجىريبەدەن ءوتىپ جاتىر.
ەكولوگيالىق باعىتتاعى «تازا قازاقستان» جوباسى اياسىندا 5,8 ملن ءتۇپ اعاش وتىرعىزىلدى. «سالاماتتى قازاقستان» مەديتسينالىق پويىزى ەلىمىزدىڭ شالعايداعى اۋىل-ايماعىن ارالاپ, 100 مىڭنان استام ادام مەديتسينالىق جانە قۇقىقتىق قىزمەتتەردى تەگىن الدى. جالپى العاندا, «سامۇرىق-قازىنا» جىل سايىن 1 ميلليونداي ادامعا قولداۋ كورسەتەدى.
جاساندى ينتەللەكت – باسقارۋدىڭ جاڭا قۇرالى
بۇگىندە «سامۇرىق-قازىنا» توبى ءوندىرىس, ونەركاسىپتەگى قاۋىپسىزدىك, تەحنولوگيالىق ۇدەرىستەردە جاساندى ينتەللەكت قولدانىلاتىن 62 جوبانى ىسكە اسىرىپ وتىر. كورپوراتيۆتىك جي-اسسيستەنتتەر ازىرلەنىپ, ديرەكتورلار كەڭەسىنىڭ مۇشەسى رەتىندە باسقارۋشىلىق, قارجىلىق ماتەريالداردى تالدايتىن SKAI نەيروجەلىسى ەنگىزىلدى.
قور الداعى ەكى جىل ىشىندە 70%-عا دەيىن باسقارۋشىلىق شەشىمدەردى جاساندى ينتەللەكتىنىڭ قاتىسۋىمەن قابىلداۋدى جوسپارلاپ وتىر. وسىلايشا, 2026 جىلعا قاراي جي-شەشىمدەردى ەنگىزۋ ەسەبىنەن EBITDA كورسەتكىشىن 5%-عا ارتتىرۋ كوزدەلگەن.
كەلەر جىلعا جوسپار
«بيىل «سامۇرىق-قازىنا» توبى ءۇشىن ماڭىزدى جەتىستىكتەر جىلى بولدى, دەگەنمەن العا قويعان ماقساتتارىمىز بۇدان دا اۋقىمدى», دەيدى قور باسشىلىعى. ۇلتتىق قور وكىلدەرى 2026 جىلى باسقارۋداعى اكتيۆتەر قۇنىن ءارى قاراي ارتتىرىپ, 50 ترلن تەڭگەگە جەتكىزۋدى كوزدەيدى. سونداي-اق كەلەسى جىلى الماتىداعى ەكىنشى جىلۋ ەلەكتر ورتالىعىن جاڭعىرتۋ, جاڭا تەمىرجولدار سالۋ, باسقا دا ستراتەگيالىق باستامالاردى جۇزەگە اسىرۋ جوسپارلانعان.
جانسايا قاپاسقىزى
