ءىس-شاراعا حالىقارالىق ۆاليۋتا قورى مەن دۇنيەجۇزىلىك بانك توبىنىڭ وكىلدەرى, سونداي-اق ۆاشينگتون قالاسىندا تۇراتىن وتانداستار قاتىستى. سالتاناتتى بولىگىندە ەلىمىزدىڭ الەۋمەتتىك-ەكونوميكالىق دامۋىنىڭ سەرپىندى قارقىنىنا, ونىڭ جاھاندىق قارجى-ەكونوميكالىق ىنتىماقتاستىق جۇيەسىندەگى ءرولىنىڭ ارتىپ كەلە جاتقانىنا ەرەكشە نازار اۋدارىلدى.
قۇتتىقتاۋ ءسوزدى اتالعان قوردىڭ اتقارۋشى ديرەكتورى پاتريك لوشەۆسكي قازاقستاننىڭ قور قىزمەتىنە قوسقان ۇلەسىن جوعارى باعالاپ, الداعى ءوزارا ءىس-قيمىلدىڭ نەگىزگى باسىمدىقتارىن اتاپ ءوتتى. قازاقستاننىڭ اقش-تاعى ەلشىسى ماعجان ءىلياسوۆ حالىقارالىق قارجى ينستيتۋتتارىمەن ىنتىماقتاستىقتىڭ ەلدىڭ تۇراقتى دامۋىن قامتاماسىز ەتۋ تۇرعىسىنداعى ستراتەگيالىق ماڭىزىن اتاپ ءوتىپ, ەلىمىزدىڭ جاھاندىق ەكونوميكالىق ارحيتەكتۋراداعى سەنىمدى ءارى جاۋاپتى ارىپتەس رەتىندەگى رولىنە ەرەكشە توقتالدى.
سونىمەن بىرگە دۇنيەجۇزىلىك بانك وكىلى, اتقارۋشى ديرەكتوردىڭ ورىنباسارى ماريۋش كرۋكوۆسكي دە پىكىر ءبىلدىرىپ, ەكونوميكالىق ءوسۋدى جانە وڭىرلىك دامۋدى كوزدەيتىن بىرلەسكەن باستامالاردى كەڭەيتۋ كەلەشەگىنە توقتالدى. ءىس-شارانىڭ سوڭىندا قوناقتار ءداستۇرلى قازاق داستارقانىنان ءدام تاتىپ, «گۇلدەر» بي ءانسامبلىنىڭ ونەرىن تاماشالاپ, دومبىرادا ورىندالعان كلاسسيكالىق كۇيلەردى تىڭدادى.
