بۇل تۋرالى قوعامدىق تىڭداۋلار بارىسىندا «الماتىباسجوسپار» عىلىمي-زەرتتەۋ ينستيتۋتىنىڭ باسشىسى اسحات سادۋوۆ مالىمدەدى.
ونىڭ ايتۋىنشا, قولدانىستاعى «قىزىل» مەترو جەلىسىن ۇزارتۋ جوسپارلانىپ وتىر. اتاپ ايتقاندا, «قالقامان» ستانتسياسىن اشىپ, ودان ءارى «بارلىق» بازارىنا دەيىن تاعى ءۇش ستانتسيا سالۋ كوزدەلگەن.
سونداي-اق «جاسىل» مەترو جەلىسىن بولاشاقتا الاتاۋ قالاسىمەن بايلانىستىرۋ مۇمكىندىگى قاراستىرىلىپ جاتىر. بۇل قالا ماڭىندا تۇراتىن تۇرعىندارعا قوعامدىق كولىككە ىڭعايلى اۋىسۋعا جول اشادى.
بۇدان بولەك, جولاۋشىلار اعىنىن تەڭەستىرۋ جانە قالانىڭ پوليتسەنترلىك دامۋىن قامتاماسىز ەتۋ ماقساتىندا جەلىنى «قازاقفيلم» اۋدانىنا دەيىن ۇزارتۋ نۇسقاسى دا تالقىلانۋدا. جوسپاردا اۋەجاي اۋماعىندا مەترو ستانتسياسىن سالۋ مۇمكىندىگى دە بار.
الماتىدا LRT جوباسىن ىسكە قوسۋ ماسەلەسى دە باس جوسپار اياسىندا قاراستىرىلعان. اسحات سادۋوۆتىڭ مالىمەتىنشە, «بارلىق» ستانتسياسىنان باستاپ بۇرىن تولە بي كوشەسىمەن وتكەن ترامۆاي ءدالىزىن قايتا جانداندىرۋ جوسپارلانىپ وتىر. LRT جەلىسى باۋىرجان مومىش ۇلى كوشەسى ارقىلى دەپوعا دەيىن جەتىپ, «قىزعىلت سارى» باعىت «قازاقفيلمگە» دەيىن سوزىلادى. سونىمەن قاتار جاروكوۆ كوشەسى ارقىلى تولە بي جانە اباي داڭعىلدارىمەن بايلانىس ورناتۋ كوزدەلگەن.
ينستيتۋت باسشىسى جاقىن ۋاقىتتا LRT-نىڭ العاشقى جەلىسى بويىنشا تەحنيكالىق-ەكونوميكالىق نەگىزدەمە (تەن) ازىرلەۋ جوسپارلانىپ وتىرعانىن ايتتى.
جوسپارلانعان جوبالار الماتىداعى كولىك جۇكتەمەسىن ازايتىپ, قالا مەن قالا ماڭىنداعى اۋداندار اراسىنداعى قاتىناستى جاقسارتۋعا باعىتتالعان.
