فوتو: اقوردا
«قازىر استانا قارقىندى ءوسىپ كەلەدى. ءتۇرلى باعىت بويىنشا بەلسەندى جۇمىس ىستەلىپ جاتىر. بۇگىن ەلوردانى دامىتۋدىڭ وزەكتى ماسەلەلەرىن تالقىلايمىز. سوڭعى 11 ايدا قىسقا مەرزىمگە ارنالعان ەكونوميكالىق ينديكاتور 118,6 پايىزعا جەتتى. ينۆەستيتسيا, قۇرىلىس, شاعىن جانە ورتا بيزنەس سالاسىنداعى كورسەتكىشتەر بويىنشا استانا الدىڭعى ورىندا تۇر. ەلوردانىڭ كوش باسىندا بولۋى – زاڭدىلىق», دەدى پرەزيدەنت.
مەملەكەت باسشىسىنىڭ ايتۋىنشا, بيىل ەلورداداعى تۇرعىن ءۇي قۇرىلىسى 5 ميلليونعا جۋىق شارشى مەتردى قۇرايدى. بۇل ەلىمىزدە پايدالانۋعا بەرىلگەن باسپانانىڭ تورتتەن ءبىرى جانە ورتالىق ازيا ايماعىنداعى باسقا استانالاردىڭ كورسەتكىشتەرىنەن بىرنەشە ەسە ارتىق.
«وڭدەۋ ونەركاسىبى ءونىمىنىڭ كولەمى 2025 جىلدىڭ 11 ايىندا 2,8 تريلليون تەڭگەگە جەتىپ, 7,2 پايىز ءوستى. ياعني 6 ميلليارد دوللار شاماسىندا. بيىلعى 11 ايدا ساۋدا كولەمى 10,8 تريلليون تەڭگەدەن اسىپ, 8,4 پايىز ءوسىم كورسەتكەن بۇل –شامامەن 22,5 ميلليارد دوللار. ماعان بەرىلگەن مالىمەت بويىنشا, قالا بيۋدجەتىنە 4,3 تريلليون تەڭگە سالىق تۇسكەن. مۇنى قوماقتى قارجى دەۋگە بولادى. استانانىڭ 2024 جىلعى وڭىرلىك جالپى ءونىم كولەمى 15 تريلليون تەڭگەدەن ءسال استى. بۇل – 32 ميلليارد دوللار. بيىلعى قورىتىندى بويىنشا 34, ءتىپتى, 35 ميلليارد دوللار (17 تريلليون تەڭگە نەمەسە ودان دا جوعارى) بولادى دەپ كۇتىلۋدە. ال قالاداعى حالىقتىڭ رەسمي سانى 1,6 ميلليون ادامعا جەتكەن», دەدى قاسىم-جومارت توقاەۆ.
بۇعان دەيىن مەملەكەت باسشىسى شىنجىر تاباندى جانە دوڭگەلەكتى بروندى ماشينالار شىعاراتىن, سونداي-اق ولارعا تەحنيكالىق قىزمەت كورسەتەتىن Besqaru زاۋىتىن ارالاپ كوردى.
