كۇزدىڭ سوڭىندا سيىر ەتى ءبىر جىل ىشىندە 31,5 پايىزعا قىمباتتاعان. جەلتوقسان ورتاسىنا قاراي ءوسىم ءبىرشاما باياۋلاعانىمەن, 26 پايىزدان جوعارى دەڭگەيدە ساقتالىپ وتىر. قوي ەتى دە ەداۋىر قىمباتتاپ, جىلدىق ءوسىم 28 پايىزدان استى. جىلقى ەتى 16 پايىزعا جۋىق وسسە, قۇس ەتىنىڭ باعاسى سالىستىرمالى تۇردە باياۋ – 10 پايىز شاماسىندا كوتەرىلگەن.
باعانىڭ شارىقتاۋى كوكتەمنىڭ سوڭى مەن جازدىڭ باسىنان باستالعان. سول كەزەڭنەن بەرى سيىر ەتى اي سايىن دەرلىك قىمباتتاپ وتىرعان. جالپى باعا وسىمىنە دە ەڭ كوپ اسەر ەتكەن وسى ءونىم.
وڭىرلەر اراسىندا ايىرماشىلىق بار, الايدا ول اسا ۇلكەن ەمەس. الماتىدا ەت باعاسى 15 پايىزدان ءسال اسسا, قوستاناي, اتىراۋ جانە اقتوبە وبلىستارىندا ءوسىم 17-18 پايىز دەڭگەيىندە تىركەلگەن. ال ۇلىتاۋ وبلىسى مەن شىمكەنتتە كورسەتكىش 30 پايىزعا جۋىقتاعان. مۇنداي ايىرماشىلىقتار باعانىڭ جەرگىلىكتى شەشىمدەردەن ەمەس, جالپى ەكونوميكالىق سەبەپتەردەن ءوسىپ وتىرعانىن اڭعارتادى.
حالىقارالىق سالىستىرۋدا قازاقستان سيىر ەتى ارزان ەلدەردىڭ قاتارىندا. Numbeo دەرەكتەرىنە سايكەس, جەلتوقسان ايىندا ەلىمىز سيىر ەتىنىڭ باعاسى بويىنشا 100-دەن استام ەلدىڭ ىشىندە سوڭعى ورىندارعا جاقىن تۇرعان. ءبىر كەلى سيىر ەتىنىڭ ورتاشا باعاسى شامامەن 3,8 مىڭ تەڭگە. بۇل رەسەي مەن وزبەكستانداعى كورسەتكىشتەن تومەن. ال ەۋروپانىڭ بىرقاتار ەلدەرىندە سيىر ەتى قازاقستانمەن سالىستىرعاندا بىرنەشە ەسە قىمبات.
باعانىڭ وسۋىنە ساۋدا ورىندارى ەمەس, نەگىزىنەن ءوندىرۋشى تاراپتاعى شىعىندار اسەر ەتكەن. ستاتيستيكا ءىرى قارانىڭ باعاسى ءبىر جىلدا شامامەن 20 پايىزعا كوتەرىلگەنىن كورسەتەدى. بۇعان جەم-ءشوپتىڭ قىمباتتاۋى سەبەپ بولعان. ازىقتىق ءداندى داقىلدار مەن ءشوپتىڭ باعاسى 9 پايىزعا جۋىق وسسە, جەمدىك جۇگەرى جىل ىشىندە 16 پايىزدان اسا قىمباتتاعان.
سوعان قاراماستان, حالىق ەتتەن باس تارتقان جوق. ءۇشىنشى توقساندا قازاقستاندىقتار ءبىر ادامعا شاققاندا ورتا ەسەپپەن 21 كەلىدەن استام ەت ءونىمىن تۇتىنعان. بۇل وتكەن جىلمەن سالىستىرعاندا جوعارى كورسەتكىش. ەڭ كوپ تۇتىنىلاتىن ءونىم – سيىر ەتى. ودان كەيىن فارش پەن جىلقى ەتى كەلەدى.
باعا ءوسىمى وتباسىلىق بيۋدجەتكە دە سالماق ءتۇسىرىپ وتىر. ءۇشىنشى توقساندا قازاقستاندىق وتباسىلاردىڭ ەت پەن ەت ونىمدەرىنە جۇمساعان شىعىنى توقسانىنا ورتا ەسەپپەن 180 مىڭ تەڭگەگە جۋىقتاعان. بۇل سوڭعى ەكى جىلداعى ەڭ جوعارى ءوسىم سانالادى.
