فوتو: الماتى قالاسى اكىمدىگى
جۇرت ءجيى باراتىن جەرلەر
قالا تۇرعىندارى مەن مەگاپوليس قوناقتارى ءجيى باراتىن ءداستۇرلى نۇكتەلەر اباي الاڭىندا, استانا الاڭىندا, اربات جاياۋ جۇرگىنشىلەر ايماعىندا, پانفيلوۆ كوشەسىندە, 28 گۆاردياشى-پانفيلوۆشىلار اتىنداعى ساياباقتا, «الماتى ارەنا» اۋماعىندا جانە «اتاكەنت» كورمە كەشەنىندە ورنالاسقان. اتالعان الاڭداردا نەگىزگى جاڭاجىلدىق ءىس-شارالار, كونتسەرتتەر, جارمەڭكەلەر مەن وتباسىلىق دەمالىس باعدارلامالارى وتەدى.
جاڭا لوكاتسيالار
بيىلعى جاڭا جىل ماۋسىمىندا قالانىڭ مەرەكەلىك كارتاسى كەڭەيتىلىپ, 13 جاڭا لوكاتسيا كوركەمدىك بەزەندىرۋدەن ءوتتى. ولاردىڭ قاتارىندا سايران كولى, «گۇلدەر» جانە «Family» ساياباقتارى, گاندي مەن بايسەيىتوۆا سكۆەرلەرى, «اينابۇلاق», «جاسقانات», «كوكجيەك», «قۇلاگەر» شاعىناۋداندارى بار. بۇل اۋماقتار جارىق كەسكىندەمەلەرىمەن, گيرلياندالارمەن جانە تاقىرىپتىق شاعىن ساۋلەت نىساندارىمەن بەزەندىرىلىپ, تۇرعىندارعا ءۇيىنىڭ ماڭىندا مەرەكەلىك كوڭىل كۇي ۇستەپ جاتىر.
38 شاقىرىم كوشە بەزەندىرىلدى
جاڭاجىلدىق بەزەندىرۋ جۇمىستارى قالانىڭ 38 شاقىرىم كوشەسىن, ونىڭ ىشىندە 12 نەگىزگى داڭعىل مەن ماگيسترالداردى قامتىدى. الماتى حالىقارالىق اۋەجايىنان باستاپ قالانىڭ ورتالىق كوشەلەرىنە دەيىنگى باعىتتا جۇزدەگەن جارىق كرونشتەين مەن گيرلياندا ورناتىلدى. اتاپ ايتقاندا, مايلين كوشەسى, قۇلجا تاسجولى, شىعىس اينالما اۆتوجولى, ءال-فارابي, دوستىق, اباي جانە نازارباەۆ داڭعىلدارى مەرەكەلىك جارىقپەن كومكەرىلدى.
21 مۇز ايدىنى
قالا بويىنشا بارلىعى 21 مۇز ايدىنى بەزەندىرىلدى, 480 شاعىن ساۋلەت نىسانى ورناتىلدى, 2000-نان استام جارىق كرونشتەين پايدالانىلدى, 47 كوپىر مەن جەرۇستى جۇرگىنشىلەر وتكەلى كوركەمدەلدى, سونداي-اق شامامەن 2200 اعاش مەرەكەلىك شامدارمەن بەزەندىرىلدى. الماتىدا 74 جاڭاجىلدىق شىرشا ورناتىلدى, ونىڭ 30-ى مەملەكەتتىك, ال 44-ءسى جەكە مەنشىك شىرشالار.
اشەكەيلەر قالپىنا كەلتىرىلدى
بيىل جاڭاجىلدىق اشەكەيلەردىڭ ءبىر بولىگى قالپىنا كەلتىرىلىپ, قايتا قولدانىلدى. اتاپ ايتقاندا, 56 شاعىن ساۋلەت نىسانى جاڭارتىلدى, ونىڭ ىشىندە 4 جاڭاجىلدىق شىرشا, 45 مەرەكەلىك اعاش ۇيشىك جانە 7 ءىرى جارىق قۇرىلىمى بار.
ەرتەگى كەيىپكەرلەرى
قالالىق كەڭىستىكتىڭ كوركەمدىك مازمۇنىنا ەرەكشە نازار اۋدارىلدى. الماتىنىڭ ءار اۋدانىندا ەرتەگى كەيىپكەرلەرىنىڭ جارىق مۇسىندەرى, 2026 جىلدىڭ سيمۆوليكاسىمەن بەزەندىرىلگەن ارت-نىساندار, قار ۇشقىنى, سىيلىق, بۇعى جانە جاڭاجىلدىق شارلار پىشىنىندەگى ساندىك كومپوزيتسيالار ورناتىلدى. اتالعان كەسكىندەمەلەر قالا تۇرعىندارى مەن تۋريستەر ءۇشىن تانىمال فوتوايماققا اينالدى.
اعاش ۇيشىكتەر
جاڭاجىلدىق بەزەندىرۋدىڭ ماڭىزدى ەلەمەنتتەرىنىڭ ءبىرى - مەرەكەلىك جارمەڭكە ستيلىندە جاسالعان اعاش ۇيشىكتەر. ولار ساۋدا پاۆيلوندارى, ينتەراكتيۆتى الاڭدار جانە قالالىق دەكور ەلەمەنتتەرى رەتىندە پايدالانىلادى.
شاعىن ساۋلەت نىساندارى
مەرەكەلىك كوركەمدەۋدە «تازا قازاقستان» تاقىرىپتىق شاعىن ساۋلەت نىساندارى ەرەكشە ورىن الادى. اتالعان نىساندار الماتى حالىقارالىق اۋەجايىندا جانە الماتى-2 تەمىرجول ۆوكزالىندا ورناتىلعان. ولار جاڭاجىلدىق ديزايندى ەكولوگيالىق مازمۇنمەن ۇيلەستىرە وتىرىپ, قورشاعان ورتانىڭ تازالىعىنا قامقورلىق جاساۋ, تابيعاتقا ۇقىپتى قاراۋ جانە ەكولوگيالىق جاۋاپكەرشىلىك مادەنيەتىن قالىپتاستىرۋ يدەياسىن بىلدىرەدى.
