قاراعاندى وبلىسىنداعى بىرقاتار مەديتسينالىق نىساندى جۇزەگە اسىرۋعا ارناۋلى مەملەكەتتىك قوردان شامامەن 7,5 ملرد تەڭگە ءبولىندى. اتاپ ايتقاندا, قاراعاندىداعى جاڭا ونكولوگيالىق ورتالىقتىڭ وپەراتسيالىق-رەانيماتسيالىق بلوگىن زاماناۋي جابدىقتارمەن جاراقتاندىرۋعا 6,2 ملرد تەڭگە ءبولىندى. وبلىستىق بيۋدجەتتەن قوسىمشا 1,74 ملرد تەڭگە كولەمىندە بىرلەسىپ قارجىلاندىرۋ كوزدەلگەن. قازىر نىساننىڭ دايىندىعى 70%-عا جەتتى, ىشكى ارلەۋ جۇمىستارى جۇرگىزىلىپ جاتىر.
بالقاش قالاسىندا قازىر كۇردەلى جوندەۋ جۇرگىزىلىپ جاتقان كوپبەيىندى اۋرۋحانا بازاسىندا اۋدانارالىق مەديتسينالىق حاب قۇرىلادى. بۇل ماقساتتارعا 1 ملرد تەڭگەدەن استام قارجى ءبولىندى, جالپى قۇنى 1,27 ملرد تەڭگەنى قۇرايدى. جوبا اياسىندا انگيوگرافيالىق وپەراتسيالىق جانە قابىلداۋ-دياگنوستيكالىق بولىمشەلەردى ورنالاستىرۋ ءۇشىن قوسىمشا كورپۋستىڭ قۇرىلىسى اياقتالىپ جاتىر. بۇگىندە نىسان 96%-عا دايىن. سونداي-اق قاڭقانى سالۋ, ينجەنەرلىك جەلىلەردى توسەۋ جانە ىشكى ارلەۋ بويىنشا نەگىزگى جۇمىستار اياقتالدى. نىساندى وسى جىلدىڭ سوڭىنا دەيىن تاپسىرۋ جوسپارلانعان.
سونىمەن قاتار بالقاشتا بالالاردى وڭالتۋ ورتالىعى قۇرىلىپ جاتىر: بۇرىنعى ساناتوري عيماراتىن قايتا جابدىقتاۋ ءۇشىن 272,1 ملن تەڭگە باعىتتالدى. جوبا ستاتسيونار جانە امبۋلاتوريالىق قابىلداۋدى ۇيىمداستىرۋدى كوزدەيدى. رەابيليتولوگتەردى, نەۆروپاتولوگتەردى, لوگوپەدتەردى جانە ەدش نۇسقاۋشىلارىن قوسا العاندا, تار بەيىندى مامانداردان تۇراتىن كوپسالالى كوماندا قۇرىلادى. بۇل بالالارعا وبلىس ورتالىعىنا بارماي-اق ساپالى وڭالتۋعا قول جەتكىزۋدى قامتاماسىز ەتەدى. جوسپارعا سايكەس بارلىق جۇمىس 2026 جىلعى اقپاندا اياقتالۋعا ءتيىس.
وسى جوبالاردى جۇزەگە اسىرۋ وڭىردەگى مەديتسينالىق كومەكتىڭ ساپاسىن ارتتىرادى. وسىلايشا, انگيوگرافيالىق وپەراتسيالىق بولىمشەنى ىسكە قوسۋ «التىن ساعات» قاعيداسى نەگىزىندە جانە پاتسيەنتتەردىڭ ءومىرىن ساقتاي وتىرىپ, بالقاش تۇرعىندارىنا ينفاركت پەن ينسۋلت كەزىندە شۇعىل جوعارى تەحنولوگيالىق كومەك كورسەتۋگە مۇمكىندىك بەرەدى. وڭالتۋ ورتالىعىنىڭ اشىلۋى تۇرعىلىقتى جەرى بويىنشا ەرەكشە قاجەتتىلىكتەرى بار بالالار ءۇشىن قالپىنا كەلتىرۋ ەمىن ۇزدىكسىز الۋدى قامتاماسىز ەتەدى.
