تەرگەۋ مالىمەتىنشە, باقتىباي اۋىلىنداعى مادەنيەت ءۇيىن كۇردەلى جوندەۋگە جەرگىلىكتى بيۋدجەتتەن 750 ميلليون تەڭگەدەن استام قاراجات بولىنگەن. ءتيىستى كەلىسىمشارت اۋداندىق ىشكى ساياسات ءبولىمى مەن مەردىگەر ۇيىم اراسىندا بەس جىل بۇرىن جاسالعان.
جوبا بويىنشا جۇمىستار 2021 جىلدىڭ سوڭىنا دەيىن اياقتالۋى ءتيىس بولعانىمەن, نىسان وسى ۋاقىتقا دەيىن پايدالانۋعا بەرىلمەگەن. سوعان قاراماستان, مەردىگەرگە بيۋدجەت ەسەبىنەن 200 ميلليون تەڭگەدەن استام قاراجات تولەنگەن.
قارجىلىق مونيتورينگ اگەنتتىگىنىڭ رەسمي وكىلى ەرنار تايجاننىڭ ايتۋىنشا, تەرگەۋ بارىسىندا بۇرىن قابىلدانىپ, اكتىلەر ارقىلى تولەنگەن بىرقاتار جۇمىستاردىڭ ءىس جۇزىندە ورىندالماعانى انىقتالعان.
— تەرگەۋ ناتيجەسىندە مەملەكەتكە كەلتىرىلگەن زالال كولەمى 212 ميلليون تەڭگەدەن استى. كۇدىكتىلەردىڭ مۇلكىنە شەكتەۋ قويىلدى. قىلمىستىق ءىس بويىنشا تەرگەۋ امالدارى جالعاسىپ جاتىر, — دەدى ول.
اۋدان اكىمدىگىنىڭ مالىمەتىنە سايكەس, باقتىباي اۋىلىنداعى مادەنيەت ءۇيى كەڭەس وداعى كەزەڭىندە سالىنعان جانە سول ۋاقىتتاعى ەڭ ءىرى مادەني نىسانداردىڭ ءبىرى سانالعان. عيماراتتىڭ جالپى اۋماعى 4 246 شارشى مەتردى قۇرايدى.
قىلمىستىق ءىس بيۋدجەت قاراجاتىن جىمقىرۋ فاكتىسى بويىنشا تەرگەلىپ جاتىر.
