فۋتبول يندۋسترياسىن دامىتۋ – ۋاقىت تالابى

ءبىزدىڭ فۋتبول كلۋبتارى دا ەۋرو­كۋبوكتىق دودالاردىڭ ىرىكتەۋ كەزەڭى­نە قاتىسىپ, ءبىردى-ەكىلىسى چەم­پيوندار ليگاسىنىڭ توپتىق كەزەڭىن­دە باق سىناپ, قوماقتى قارجى تاپتى دا. الماتىنىڭ «قايرات» فۋتبول كلۋبى ۋەفا چەم­پيوندار ليگاسىنىڭ جالپى كەزەڭىن­دە تارتىسقا ءتۇسىپ, ءار ماتچتان قور­جىنىنا قىرۋار قارجى قۇيى­لىپ تا جاتىر. فۋتبول يندۋس­ترياسىن وركەندەتىپ, يگىلىگىنە كەنە­لىپ وتىرعان ازىرگە ەلىمىزدەگى بىر­دەن-ءبىر ۇجىم – «قايرات». وزگە وڭىر­لەردىڭ كوماندالارى دا دامۋ­دىڭ وسى جولىنا ءتۇسۋدىڭ قامىن الدەقاشان ويلاستىرۋى قاجەت ەدى.

ۇلتتىق قۇرىلتاي وتىرىسىندا مەملەكەت باسشىسى: «كلۋبتار وبلىستىق بيۋدجەتتەرگە عانا ارقا سۇيەمەي, شەتەلدەردەگى سەكىلدى وزدەرى دە تابىس تابۋدى ۇيرەنۋى كەرەك. سوندىقتان مەن كاسىپكەرلەردى كلۋبتىق فۋتبولعا بيزنەس رەتىندە قاراۋعا شاقىرامىن. فۋتبول كلۋبتارى جەكەمەنشىككە وتپەي, ءىس العا باسپايدى. بۇل – الەمدىك تاجىريبە. كلۋبتار جەكەمەنشىك بولسا, شەتەل سپورتشىلارىن شاقىرۋ قۇقىعىنا يە بولادى», دەپ اتاپ ءوتتى.

سونداي-اق بيىلعى جولداۋىندا دا پرەزي­دەنت سپورتقا ءاردايىم باسا كوڭىل بولەتىنىن ايتتى. «بارشاڭىزعا ءمالىم, مەن بۇقارالىق سپورتتى دامىتۋعا باسا ءمان بەرەمىن. ايماقتاردا سپورت نىساندارى بوي كوتەرىپ جاتىر. ۇيىرمەلەر بالالارعا قولجەتىمدى بولا باستادى. ەرەكشە قاجەتتىلىگى بار ازاماتتارعا, ەگدە ادامدارعا ارنالعان سپورت كلۋبتارى اشىلىپ جاتىر. مەن بۇعان دەيىن شەتەلدەن كەلگەن سپورتشىلارعا بيۋدجەتتەن قارجى ءبولۋدى شەكتەۋ تۋرالى تاپسىرما بەردىم. دەپۋتاتتار بۇل باستامانى قولداپ, ارنايى زاڭ قابىلدادى. بۇل – ءوز سپورتشىلارىمىزدى قولداۋعا ارنالعان ماڭىزدى قادام. بىراق مۇنىمەن شەكتەلىپ قالۋعا بولمايدى, العا قاراي ءجۇرۋىمىز كەرەك. فۋتبول كلۋبتارىن جەكەشەلەندىرۋگە قاتىستى جۇمىستى تەزدەتۋ كەرەك. قازىر ەلىمىزدىڭ ءتورت فۋتبول كلۋبىنا بەلگىلى كاسىپكەرلەرىمىز يە بولدى, ياعني كلۋبتار جەكەمەنشىككە ءوتىپ جاتىر. سول ءۇشىن ولارعا ريزاشىلىعىمدى بىلدىرەمىن. دەگەنمەن فۋتبولدى كوممەرتسيالاندىرۋ ءىسىن جالعاستىرا بەرۋ كەرەك. مۇنداي قادامسىز ەلىمىزدە فۋتبول دامىمايتىنىن الەمدىك تاجىريبەدەن كورىپ وتىرمىز. قازىرگى زاماندا كاسىبي سپورتتى قوماقتى تابىس اكەلەتىن بيزنەس-يندۋستريا رەتىندە قاراستىرعان ءجون», دەدى مەملەكەت باسشىسى. ءتيىستى ورىندارعا فۋتبول كلۋبتارىن جەكەشەلەندىرۋ شارۋاسىن جەدەلدەتۋدى, كاسىبي سپورتتى قوماقتى تابىس اكەلەتىن سالاعا اينالدىرۋدى جۇكتەدى.

ەلىمىزدەگى بىرقاتار فۋتبول كلۋبتارى بۇگىندە جەكە يەلىككە ءوتتى. يگى باس­تاما ءالى دە جالعاسىن تابادى. جاقىندا قاراعاندىنىڭ «شاحتيور» فۋتبول كلۋبىن «Freedom Holding Corp.» توبىنا يە كاسىپكەر تيمۋر تۋرلوۆقا تيەسىلى كومپانيا ساتىپ الدى. ساۋدا اۋكتسيون ارقىلى ءوتىپ, مەملەكەت باسشىسىنىڭ بۇقارالىق سپورتتى دامىتۋ, فۋتبولدى كوممەرتسيالاندىرۋ جونىندەگى تاپسىرماسىن جۇزەگە اسىرۋ اياسىندا جۇزەگە استى. ەندى «شاحتيور» فۋتبول كلۋبىنىڭ دامۋى مەن ترانسفورماتسياسىنىڭ جاڭا كەزەڭى باستالادى. قاراعاندى وبلىسىنىڭ اكىمدىگى مەن تانىمال كاسىپكەر تيمۋر تۋرلوۆ وڭىردە جاڭا فۋتبول ەكوجۇيەسىن قۇرۋ جۇمىسىن باستادى. بۇل ماقساتقا جالپى 18,5 ملرد تەڭگە ءبولىنىپ وتىر. قارجىنىڭ 12 ملرد تەڭگەسى جاڭادان بوي كوتەرەتىن فۋتبول اكادەمياسىن سالۋعا, 6,5 ملرد تەڭگەسى بالالار-جاسوسپىرىمدەر مەن بۇقارالىق فۋتبولدى دا­مىتۋعا باعىتتالماقشى. قاراعاندى وبلىسى فۋتبول قاۋىمداستىعىنىڭ (QOFA) پرەزيدەنتى تيمۋر تۋرلوۆتىڭ قولداۋىمەن بۇعان دەيىن دە بىرقاتار ءىرى جوبالاردى جۇزەگە اسىردى. ولاردىڭ ىشىندە مەكتەپ وقۋشىلارىن قامتىعان «Alga!» جوباسى دا بار. يگى باستاما 2029 جىلعا دەيىن 40 مىڭنان استام مەكتەپ وقۋشىسى مەن 3 600 ستۋدەنتتى قامتيدى, فۋتبول باستامالارى 100-دەن استام وقۋ ورنىندا جۇزەگە اسىرىلادى. بۇدان بولەك, بالالار مەن جاسوسپىرىمدەردىڭ رەسمي ليگاسى «Freedom BFL» بار.

زاماناۋي ۇلگىدە سالىناتىن «شاحتيور» فۋتبول اكادەمياسى قاراعاندى وبلىسىنداعى بۇقارالىق, سونداي-اق كاسىبي فۋتبولدى دامىتۋعا سەرپىن بەرمەك. ورتالىقتا بالالار-جاسوسپىرىمدەر فۋتبولى, ينفراقۇرىلىمدىق جوبالار مەن الەۋمەتتىك باستامالار جۇزەگە اسىرىلادى. 10 گا اۋماققا سالىناتىن فۋتبول اكادەمياسىندا جىل بويى دايىندىق جاساۋعا ارنالعان جابىق مانەج, تولىق ولشەمدى جاتتىعۋ الاڭى, ەكى قاباتتى اكىمشىلىك-بولمە كەشەنى, مەديتسينالىق ورتالىق, باسسەين, ساۋ­نا, اسحانا مەن تاربيەلەنۋشىلەرگە ارنالعان جاتاقحانا بولادى. قۇرىلىس-مونتاج جۇمىس­تارى جوسپارعا سايكەس 2027 جىلى اياقتالۋعا ءتيىس. وڭىردە فۋتبولدى وركەندەتۋ ماقساتىندا كادر دايارلاۋ ىسىنە دە ايرىقشا ءمان بەرىلەدى. جاتتىقتىرۋشىلاردىڭ حالىق­ارالىق تاعى­لىمدامالار مەن UEFA ليتسەنزيالارىن الۋ مۇمكىندىگىن قامتيتىن بىلىكتىلىكتى ارتتىرۋ باعدارلامالارى ەنگىزىلەدى.

ەلوردالىق «جەڭىس» فۋتبول كلۋبىن بەلگىلى كاسىپكەر ميحايل لومتادزە ساتىپ الدى. ول استانادا الەمدىك دەڭگەيدەگى بالالار اكادەمياسىن سالۋعا ينۆەستيتسيا تارتىپ, قارجى بولەتىنىن مالىمدەدى. مەملەكەت باسشىسىنىڭ ەلىمىزدە فۋتبولدى دامىتۋ ستراتەگياسى اياسىندا كاسىپكەر الەمدىك دەڭگەيدەگى فۋتبول اكادەمياسىن سالۋ جوسپارى تۋرالى ايتقان-تىن. «جەڭىس» كلۋبىنىڭ جاڭا يەسى ەندى اكادەميانى كلۋبتىڭ بازاسىندا سالاتىنىن جەتكىزدى. جاڭا كەشەن ىسكە قوسىلعاندا دارىندى جەتكىنشەك فۋتبولشىلار ازىرلىك وتكەرىپ, بىلىكتى باپكەرلەردەن ءتالىم الادى.

«مەنىڭ ارمانىم – قازاقستان مەن انگليادا ەڭ تالانتتى جاس فۋتبولشىلار, بولاشاق جۇلدىزدار تاربيەلەنەتىن الەمدىك دەڭگەيدەگى كاسىبي بالالار فۋتبول اكادەمياسىن قۇرۋ. وقىتۋ تەگىن جۇزەگە اسىرىلادى. جاس سپورتشىلار ەلىمىزدىڭ, سونداي-اق فۋتبولدىڭ وتانى انگليانىڭ جەتەكشى ماماندارىنان ءتالىم الادى. فۋتبول – جانكۇيەرى مول, كوپشىلىكتى قامتيتىن سپورت ءتۇرى. زاماناۋي تەحنولوگيالاردىڭ كومەگىمەن وتاندىق فۋتبولدى جاڭا دەڭگەيگە كوتەرىپ, جاھاننىڭ ۇزدىگى اتاناتىن دارىنداردى باپتاي الامىز دەپ سەنەمىن, – دەدى م.لومتادزە.

سپورت ينفراقۇرىلىمىن دامىتىپ, يندۋسترياعا باسا كوڭىل ءبولۋدىڭ يگىلىگى مول. ەلىمىزدەگى وزگە فۋتبول كلۋبتارى دا كەلەشەكتە جەكە ينۆەستوردىڭ يەلىگىنە ءوتىپ, ءورىسىن كەڭەيتۋدى ويلاستىرعانى ابزال.