سالا باسشىسىنىڭ ايتۋىنشا, بيىل ەلىمىزدە سۋ شارۋاشىلىعى ينفراقۇرىلىمىن دامىتۋ بويىنشا 145 جوبا قولعا الىنعان. سونىمەن قاتار شامامەن 300 نىسانعا ارنالعان جوبالاۋ-سمەتالىق قۇجاتتاما مەن تەحنيكالىق-ەكونوميكالىق نەگىزدەمە ازىرلەنىپ جاتىر ەكەن.
اتاپ ايتقاندا, الماتى وبلىسىنداعى قىزىلاعاش, اباي وبلىسىنداعى شار سۋقويمالارىن رەكونسترۋكتسيالاۋ تولىق اتقارىلدى. استانا سۋقويماسىن اۋقىمدى تازالاۋ جۇمىستارىنىڭ ءبىرىنشى كەزەڭى اياقتالدى.
سونىمەن قاتار بيىل تۇركىستان وبلىسىنداعى قاپشاعاي سۋقويماسىن رەكونسترۋكتسيالاۋ, باتىس قازاقستان وبلىسىنداعى كيروۆ سۋقويماسىنىڭ سوڭعى 58 جىلدا العاش رەت جۇرگىزىلىپ وتىرعان كۇردەلى رەكونسترۋكتسياسىن اياقتاۋ كوزدەلىپ وتىر.
شۋ وزەنىندەگى فۋرمانوۆ اينالما كانالىندا سوڭعى 40 جىلدا العاش رەت مەحانيكالىق تازالاۋ جۇمىستارىن جۇرگىزىپ, تۇركىستان وبلىسىندا «قاراقۋىس» جانە «بايدىبەك-اتا» سۋقويمالارىنىڭ قۇرىلىسى جالعاسىپ جاتىر. جوبامەن 2026 جىلى اياقتالادى. بۇل قوسىمشا شامامەن 69 ملن تەكشە مەتر سۋ جيناۋعا مۇمكىندىك بەرەدى. كوكساراي كونتررەتتەگىشىندەگى جوندەۋ جۇمىستارى اياقتالدى. بۇل جۇمىس نىساننىڭ سۋ جيناۋ كولەمىن 2 ملرد تەكشە مەترگە دەيىن ۇلعايتادى.
جوندەۋ مەن رەكونسترۋكتسيادان وتكەن 700 شاقىرىمنان استام يرريگاتسيا جەلىسىن پايدالانۋعا بەرۋ جوسپارلانىپ وتىر.
سونداي-اق 469 مىڭنان استام ادام تۇراتىن 224 ەلدى مەكەندى سۋمەن قامتاماسىز ەتەتىن 13 توپتىق سۋ قۇبىرىن پايدالانۋعا بەرۋ جوسپاردا. ونىڭ ىشىندە 32 مىڭ تۇرعىنى بار 43 ەلدى مەكەن العاش رەت ورتالىقتاندىرىلعان سۋمەن جابدىقتالدى.
كەيىنگى ەكى جىل ىشىندە قازاقستاننىڭ سۋ شارۋاشىلىعى سالاسىنىڭ نەگىزگى كاپيتالىنا تارتىلعان ينۆەستيتسيا كولەمى 579 ملرد تەڭگەنى قۇرادى. مينيسترلىك شەتەلدىك سەرىكتەستەرمەن 7 كەلىسىمگە جانە 30-دان استام مەموراندۋمعا قول قويدى.
ەكى جىلدا سۋ ۇنەمدەۋ تەحنولوگيالارىن ەنگىزۋ بىرنەشە ەسە ارتىپ, ورتا ەسەپپەن
150 مىڭ گەكتارعا جەتتى. سۋ ۇنەمدەۋ تەحنولوگيالارى قولدانىلاتىن ەگىستىك اۋدانى جالپى 543,5 مىڭ گەكتارعا ءوستى. 2030 جىلعا قاراي بۇل كورسەتكىشتى 1,3 ملن گەكتارعا جەتكىزۋ جوسپارلانىپ وتىر.
وسى ماقساتتارعا جەتۋ ءۇشىن 2026–2028 جىلدارعا رەسپۋبليكالىق بيۋدجەتتە 228 ملرد تەڭگەدەن استام قاراجات قاراستىرىلعان, بۇل الدىڭعى ۇشجىلدىق كەزەڭمەن سالىستىرعاندا ءتورت ەسە كوپ.
مينيسترلىك «قازسۋشار» رمك فيليالدارى ءۇشىن 757 ارنايى تەحنيكا مەن اۆتوكولىك ساتىپ الۋ جۇمىسىن باستادى. «قازسۋشار» رمك قىزمەتكەرلەرىنىڭ جالاقىسى بيىل 1 شىلدەدەن باستاپ 35-50%-عا ارتتى. سونىمەن قاتار 2028 جىلعا دەيىنگى جول كارتاسى اياسىندا قانىش ساتباەۆ كانالىن جاڭعىرتۋ باستالدى. سۋ شارۋاشىلىعى سالاسىنىڭ 1000-نان استام مامانى بىلىكتىلىگىن ارتتىرۋ كۋرستارىنان ءوتتى, بۇل 2024 جىلمەن سالىستىرعاندا ەكى ەسە كوپ.
«وسى شارالار باستى ماقساتقا – سۋ رەسۋرستارىن ءتيىمدى جانە ۇتىمدى پايدالانۋعا قول جەتكىزۋگە باعىتتالعان. بۇل ەكونوميكامىزدىڭ تۇراقتى دامۋى مەن ازاماتتارىمىزدىڭ ءال-اۋقاتىن ارتتىرۋ, سونداي-اق ەلدىڭ ۇزاقمەرزىمدى سۋ قاۋىپسىزدىگىن قامتاماسىز ەتۋ مىندەتى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
جيىندا ۆيتسە-مينيستر ا.ءابدرايموۆ جۋرناليستەرگە سۋ رەسۋرستارىنىڭ ۇلتتىق اقپاراتتىق جۇيەسىن ازىرلەۋ بارىسى, سۋىن جەتكىزۋ بويىنشا ەلەكتروندىق كەلىسىمشارتتاردى ەنگىزۋ جۇيەسىنىڭ پيلوتتىق سىناقتارى, سونداي-اق وزەن اعىسىن مودەلدەۋ جانە بولجاۋ جۇيەلەرىن ەنگىزۋ بويىنشا اتقارىلعان جۇمىستار تۋرالى ايتتى.
