عىلىم جانە جوعارى ءبىلىم مينيسترلىگىنە قاراستى عىلىم ورداسىنىڭ باستاماسىمەن جانە ەلىمىزدىڭ ىستانبۇل قالاسىنداعى باس كونسۋلدىعىنىڭ قولداۋىمەن جۇزەگە اسقان جوبانىڭ ماقساتى – ەكى ەل اراسىنداعى مادەني-گۋمانيتارلىق ىنتىماقتاستىقتى تەرەڭدەتىپ, قازاقتىڭ ادەبي جانە عىلىمي مۇراسىن حالىقارالىق دەڭگەيدە ناسيحاتتاۋ.
سالتاناتتى ءىس-شاراعا تۇركيا ادىلەت جانە دامۋ پارتياسىنىڭ تۇركى مەملەكەتتەرىمەن بايلانىستار جونىندەگى باسقارما توراعاسىنىڭ ورىنباسارى, دوكتور رەشيدە يۋكسەل, قازاقستاننىڭ ىستانبۇل قالاسىنداعى باس كونسۋلى امانقۇل نۋريددين, رامي كىتاپحاناسىنىڭ ديرەكتورى الي چەليك, قازاق ادەبيەتىنىڭ تۇرىك تىلىنە اۋدارماشىسى قۇددىس چولپان, «عىلىم ورداسى» رمك باس ديرەكتورى ۇلار مۇقاجانوۆ, TURKTAV تۇركى تاريحى مەن مادەنيەتى قورىنىڭ اتقارۋشى ديرەكتورى اسەل لاحاەۆا, سونداي-اق تۇركسوي وكىلدەرى, تۇركيانىڭ مادەنيەت جانە ءبىلىم سالاسىنىڭ زيالى قاۋىم وكىلدەرى مەن تۇركياداعى قازاق ستۋدەنتتەرى قاتىستى.
يگى باستاما اياسىندا ەلدەن بارعان دەلەگاتسيا تۇركيالىق ارىپتەستەرىنە 250 دانا كىتاپ سىيعا تارتتى. ادەبيەت بۇرىشىنا عىلىم ورداسىنىڭ ورتالىق عىلىمي كىتاپحاناسى, ش.ش.ءۋاليحانوۆ اتىنداعى تاريح جانە ەتنولوگيا ينستيتۋتى جانە م.و.اۋەزوۆ اتىنداعى ادەبيەت جانە ونەر ينستيتۋتى ۇسىنعان قازاق ادەبيەتى, تاريحى, مادەنيەتى مەن عىلىمىنا ارنالعان باسىلىمدار قويىلدى.
ءىس-شارا بارىسىندا «عىلىم ورداسى» رمك باس ديرەكتورى ۇلار مۇقاجانوۆ رامي كىتاپحاناسىندا اشىلعان بۇل بۇرىش قازاقستان مەن تۇركيا اراسىنداعى عىلىمي جانە مادەني ىنتىماقتاستىقتى جاڭا دەڭگەيگە كوتەرىپ, قازاقتىڭ زياتكەرلىك مۇراسىن حالىقارالىق دەڭگەيدە كەڭىنەن تانىتۋعا باعىتتالعان ماڭىزدى قادام ەكەنىن ايتتى.
