فوتو: PARANOIA.KZ
وقيعا 14 جەلتوقسان كۇنى سيدنەيدەگى ادامدار كوپ جينالعان جاعاجاي ماڭىندا بولدى. حانۋكا مەرەكەسىن تويلاۋ كەزىندە ەكى لاڭكەس بەيبىت تۇرعىندارعا وق جاۋدىرعان وسى سىن ساعاتتا 43 جاستاعى سيريالىق يمميگرانت ءال-احمەد ءوز ءومىرىن قاتەرگە تىگىپ, قارۋلى لاڭكەستەردىڭ ءبىرىنىڭ قولىنداعى قارۋىن تارتىپ العان. وسى تەكەتىرەس كەزىندە ونىڭ يىعى مەن دەنەسىنە وق ءتيىپ, اۋىر جاراقات العان.
يزرايل پرەزيدەنتى يتسحاك گەرتسوگ بۇل وقيعانى ەۆرەي قاۋىمىنا قارسى شابۋىل دەپ اتاعان.
وسى وقيعادان كەيىن امەريكالىق تانىمال بلوگەر زاكەري دەرەنەۆسكي (mdmotivator) Car Hub Australia ۇيىمىمەن بىرىگىپ, باتىرعا قولداۋ كورسەتۋ ماقساتىندا GoFundMe قورى ارقىلى قاراجات جيناۋ ناۋقانىن باستادى. قىسقا ۋاقىت ىشىندە 43 000-نان استام ادام ءوز ۇلەستەرىن قوسقان. اراسىندا امەريكالىق ميللياردەر بيلل اكمان سياقتى ءىرى دونورلار دا بولدى.
19 جەلتوقسان كۇنى ءال-احمەدكە جينالعان بارلىق سوما – 2 533 585 دوللار كولەمىندەگى چەك سالتاناتتى تۇردە تابىستالدى. قازىرگى ۋاقىتتا وعان بىرنەشە وتا جاسالىپ, وڭالتۋ كەزەڭىنەن ءوتىپ جاتىر.
