فوتو: istockphoto.com
بۇل جوبانىڭ ىرگەتاسى 2020 جىلى قالانعانىمەن, 2022 جىلى ناۋرىزباي اۋدانىنىڭ قارقىندى دامۋىنا بايلانىستى ستانتسيانىڭ ورنالاسۋ باعىتىنا تۇزەتۋلەر ەنگىزىلگەن بولاتىن. قۇرىلىس جۇمىستارىنا 28 ملرد تەڭگە ءبولىنىپ, العاشقى جوسپار بويىنشا نىسان 2026 جىلدىڭ ءبىرىنشى جارتىجىلدىعىنىڭ سوڭىندا اياقتالۋى ءتيىس ەدى. الايدا اكىمدىك اتقارىلاتىن جۇمىستاردىڭ كەستەسىن قايتا قاراپ, مەرزىمدى بارىنشا قىسقارتۋ تۋرالى شەشىم قابىلدادى.
«ماۋسىم ايىندا مەترو قۇرىلىسىمەن تانىسقانىمدا, ماماندار «قالقامان» ستانتسياسىن اياقتاۋعا 24 اي قاجەت ەكەنىن ايتقان بولاتىن. قازىر ءبىز بۇل جۇمىستاردى 8-9 ايدىڭ ىشىندە ءتامامداۋدى جوسپارلاپ وتىرمىز. مۇنداي ماڭىزدى جوبالار بارىنشا جەدەل جۇزەگە اسىرىلۋى ءتيىس», دەدى دارحان ساتىبالدى.
اكىمنىڭ ايتۋىنشا, قالاداعى كەپتەلىس ماسەلەسى ەكولوگيالىق جاعدايعا تىكەلەي اسەر ەتەدى – اۋانىڭ 60%-عا لاستانۋى ءدال وسى كولىك قۇرالدارىنا تيەسىلى. سوندىقتان بيلىك شانحاي, لوندون جانە ماسكەۋ سياقتى ءىرى مەگاپوليستەردىڭ تاجىريبەسىن زەردەلەي وتىرىپ, جەكە كولىككە قاراعاندا قوعامدىق كولىكتىڭ ۇلەسىن ارتتىرۋدى كوزدەپ وتىر.
سونىمەن قاتار كەلەسى جىلى «قالقامان» ستانتسياسى مەن «بارلىق» بازارىنىڭ اراسىن جالعايتىن ۇزىندىعى 5,3 شاقىرىم بولاتىن جاڭا ۋچاسكەنىڭ قۇرىلىسى باستالادى. سونداي-اق قالا بيلىگى مەترونىڭ ەكىنشى جەلىسىن جوبالاۋعا كىرىستى: بۇل باعىت «جىبەك جولى» ستانتسياسىنان اۋەجايعا دەيىنگى 14 شاقىرىمدى قامتيدى.
