قازاقستانعا كەلەتىن يسلانديا ويىنشىلارى بەلگىلى بولدى

استانا. 23 ناۋرىز. ەندى بەس كۇننەن كەيىن استانادا فۋتبولدان قازاقستان مەن يسلانديا قۇرامالارى اراسىندا ماتچ وتەدى. 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىنداعى ويىنعا ەلىمىزدىڭ باس كومانداسى تىڭعىلىقتى دايىندالۋدا. بۇل تۋرالى egemen.kz حابارلادى. سونداي-اق, يسلانديا ءۇشىن دە اتالعان ويىننىڭ ماڭىزى جوعارى. توپتىڭ كوشباسشىلارى سانالعان نيدەرلاندى, تۇركيا سىندى ازۋلى قۇرامالاردى سان سوقتىرعان سكانديناۆتىقتار بۇگىندە جولدامادان باستى ۇمىتتىلەردىڭ ءبىرى. سونىمەن 28 ناۋرىزدا «استانا-ارەنادا» وتەتىن ويىنعا يسلانديا قۇراماسىنىڭ جاتتىقتىرۋشىلار قوسىنى مىنا فۋتبولشىلارعا سەنىم ارتىپ وتىر: قاقپاشىلار: حاننەس حادلدورسسون, ەگمۋندۋر كريستينسسون, ينگۆار يونسسون; قورعاۋشىلار: بيركير سەۆانسسون, راگنار سيگۋردسسون, كاري ارناسسون, اري سكۋلاسسون, حادلگريمۋر يوناسسون, يوۋن گۋدني فوۋليۋسسون, حەردۋر بەرگۆين ماگنۋسسون, حاۋكۋر-حەيدار حاۋكسسون; جارتىلاي قورعاۋشىلار: ەيدۋر گۋدونسەن, ارون گۋننارسسون, ەميل حادلفرەدسسون, بيركير بيارنسون, يوحان بەرگ گۋدمۋندسسون, ريۋريك گيسلاسسون, گيلفي سيگۋردسسون, ۆيكتور پاۋلسسون; شابۋىلشىلار: كولبەين سيگتورسسون, الفرەد فينبوگاسسون, يوۋن دادي بودۆارسسون, ۆيدار-ورن كيارتانسسون. ايتا كەتەيىك, يسلانديا قۇراماسىنىڭ كوشباسشى ويىنشىسى, كەزىندە «بارسەلونا» مەن «چەلسي» ساپىندا دوپ تەپكەن 36 جاستاعى ەيدۋر گۋدونسەن ۇلتتىق قۇراماعا قايتا شاقىرتۋ الىپ وتىر. سوڭعى رەت گۋدونسەن قۇراما جەيدەسىن 2013 جىلدىڭ قاراشا ايىندا كيگەن ەكەن سودان بەرى ارداگەر ويىنشى ءوز تۋى استىندا رەسمي ويىندارعا قاتىسپاعان. يسلانديا قۇراماسىنىڭ باس جاتتىقتىرۋشىسى لارس لاگەربەك ەكەنى بەلگىلى. بۇگىندە ونىڭ كومانداسى ءتورت ويىننان 9 ۇپاي جيناپ, توپتا ەكىنشى ورىنعا تابان تىرەپ تۇر. ال يۋري كراسنوجان دايىندايتىن قازاقستان ءتورت ويىننان ءبىر عانا ۇپاي ولجالاپ, كوش سوڭىندا كەلەدى. توپ باسىندا مۇلدەم ۇپاي جوعالتپاعان چەحيا قۇراماسى تۇرعانىن ايتا كەتەيىك. ەلامان قوڭىر. دەرەك: egemen.kz. سۋرەت: sports.ru.