«جاھاندانۋ داۋىرىندە وزىق ءبىلىمدى يگەرگەن, جاڭا تەحنولوگيانى مەڭگەرگەن ەلدىڭ ۇپايى تۇگەل بولادى. بۇگىن سانالى ۇرپاق تاربيەلەي الساق, ەرتەڭ زامان كوشىنىڭ باسىندا جۇرەمىز. سوندىقتان وسى سالانى قولداۋ مەملەكەتتىك ساياساتتىڭ نەگىزگى باسىمدىعى بولىپ قالا بەرەدى. كەيىنگى جىلدارى بۇل باعىتتا اۋقىمدى جۇمىس اتقارىلدى. 2019 جىلدان بەرى ءبىلىم سالاسىنىڭ بيۋدجەتى ءۇش ەسە ارتتى. وسى ۋاقىتتا 1 ميلليوننان استام وقۋشىعا ارنالعان 1200 مەكتەپ اشىلدى. «كەلەشەك مەكتەپتەرى» ۇلتتىق جوباسى اياسىندا جالپى سانى 217 مەكتەپ قۇرىلىسى جوسپارلاندى. قازىر 128 مەكتەپ سالىندى. بۇدان بولەك, ءبىلىم بەرۋ ينفراقۇرىلىمىن قولداۋ قورىنىڭ قارجىسىنا الپىستان استام مەكتەپ اشىلدى. تاعى 30-عا جۋىعى سالىنىپ جاتىر», دەگەن بولاتىن ەل پرەزيدەنتى.
شىنىندا, «كەلەشەك مەكتەپتەرى» – زاماناۋي تەحنولوگياعا نەگىزدەلگەن, وقۋشىنىڭ جەكە قابىلەتىن دامىتۋعا باعىتتالعان يننوۆاتسيالىق ءبىلىم ورداسى. مۇندا تسيفرلىق ينفراقۇرىلىم, جاڭا پەداگوگيكالىق تاسىلدەر جانە وقۋشىنىڭ ساۋاتتىلىعىن كۇشەيتۋگە ارنالعان ءتيىمدى وقىتۋ ادىستەرى قولدانىلادى. ءوز كەزەگىندە ينتەراكتيۆتى وقۋ مودۋلدەرى, جاساندى ينتەللەكت جۇيەلەرى, زەرتحانالىق ورتالىقتار مەن شىعارماشىلىق كەڭىستىكتەر ءبىلىم ساپاسىن جاقسارتۋعا مۇمكىندىك بەرەدى. نەگىزىندە «كەلەشەك مەكتەپتەرى» وقۋشىنىڭ جان-جاقتى دامۋىن, العان ءبىلىمىن ناقتى تاجىريبەمەن ۇشتاستىرىپ, بولاشاقتا پايداسى تيەر كاسىبي باعدار الىپ شىعۋىن كوزدەيدى. سونداي-اق جاڭا بۋىن مەكتەپتەرى ءبىلىم بەرۋ ۇدەرىسىندە قاۋىپسىز, ورتا قالىپتاستىرىپ, وقۋشىلاردىڭ عىلىمي-زەرتتەۋ داعدىلارىن ەرتە جاستان دامىتۋعا جاعداي جاسايدى. كرەاتيۆتى ويلاۋ, تسيفرلىق مادەنيەت ءدال وسى مەكتەپتەر ۇستاناتىن باستى باعىت سانالادى.
رەسپۋبليكانىڭ ءۇشىنشى مەگاپوليسىندە دە پرەزيدەنت تاپسىرماسىمەن بىرنەشە «كەلەشەك مەكتەبى» بوي كوتەردى. سولاردىڭ ءبىرى – شىمكەنتتىڭ ءال-فارابي اۋدانىندا ورنالاسقان, بيىل قاڭتار ايىندا ەسىگىن ايقارا اشقان №148 «كەلەشەك مەكتەبى».
«العاشىندا 691 وقۋشىمەن بالالاردى وقىتا باستاعان ءبىلىم ورداسىندا بۇگىنگى تاڭدا مىڭ بالا ءبىلىم الىپ جاتىر. ءبىر اۋىسىمدا وقيتىن وقۋشىلاردىڭ بوس ۋاقىتىن ءتيىمدى ۇيىمداستىرۋ ءۇشىن مەكتەپىشىلىك بىرنەشە ۇيىرمە جۇمىس ىستەيدى. اتاپ ايتقاندا, فۋتبول, ۆولەيبول, ۇستەل تەننيسى, دويبى, دەبات ويىندارى بار. ال باستاۋىش سىنىپ وقۋشىلارى قۋىرشاق تەاترىنا نەمەسە بي مەن سۋرەت ۇيىرمەلەرىنە قاتىسادى. سونىمەن قاتار مۇعالىمدەر جوعارى سىنىپ وقۋشىلارىن ساحنا ونەرىنە باۋلۋمەن اينالىسادى. جالپى, «كەلەشەك مەكتەپتەرى» – مەملەكەت باسشىسى قاسىم-جومارت توقاەۆتىڭ باستاماسىمەن قولعا الىنعان اۋقىمدى ۇلتتىق جوبا. «كەلەشەك مەكتەپتەرىنىڭ» ءبىر ەرەكشەلىگى – ونداعى سىنىپتار كەڭ ءارى جارىق بولادى, سونداي-اق, زاماناۋي زەرتحانالار, ادەمى كىتاپحانالار مەن جايلى سپورت زالدارى, قاۋىپسىز ويىن الاڭدارى بۇل ءبىلىم ۇياسىن باسقا مەكتەپتەردەن دارالاپ تۇرادى. مۇنداي جايلى ورتا بالانىڭ بىلىمگە قۇشتارلىعىن وياتارى ءسوزسىز. ءبىر سوزبەن ايتقاندا, «كەلەشەك مەكتەبىندە» وقۋشىنىڭ الاڭسىز ءبىلىم الۋىنا بار جاعداي جاسالعان», دەدى №148 «كەلەشەك مەكتەبىنىڭ» ديرەكتورى ۇلجالعاس باقتيارقىزى.
مەكتەپ باسشىسىنىڭ ايتۋىنشا, قازىرگى زاماننىڭ قارقىندى دامۋى ءبىلىم بەرۋ جۇيەسىنە جاڭا تالاپتار قويىپ وتىر. اسىرەسە وقۋشىلاردى بولاشاق ماماندىققا ەرتە باعىتتاۋ – ولاردىڭ قىزىعۋشىلىعى مەن قابىلەتىن ۋاقتىلى انىقتاۋدا ماڭىزدى رولگە يە. سول سەبەپتى ءبىلىم ۇياسىندا روبوتتەحنيكا, حيميا, بيولوگيا ساباقتارى زاماناۋي تۇرعىدا جابدىقتالعان زەرتحانالار بار. ودان بولەك, مەكتەپتەگى زەرتحانالار ينتەراكتيۆتى پانەل, قاۋىپسىز حيميالىق قۇرالدار, بيولوگيالىق ميكروسكوپتار, روبوت قۇراستىرۋعا ارنالعان مودۋل جانە باعدارلامالاۋ پلاتفورمالارىمەن تولىق قامتاماسىز ەتىلگەن. سول ءۇشىن وقۋشى تەك تەوريالىق ءبىلىم الىپ قانا قويماي, تاجىريبە جاساپ, عىلىمي-زەرتتەۋ داعدىلارىن جەتىلدىرە الادى. جوعارىدا ايتىلعان روبوتتەحنيكا ساباعىندا وقۋشىلار روبوت قۇراستىرىپ, ولاردىڭ قوزعالىسىنا باعدارلاما تۇزەدى, روبوت جاساۋدا ءتۇرلى سەنسورلار قولدانادى. بۇل ءپان بىرىنشىدەن, لوگيكالىق ويلاۋ قابىلەتىن دامىتادى, ەكىنشىدەن, ينجەنەرلىك ماسەلەلەردى شەشۋگە, توپپەن بىرگە جۇمىس ىستەۋگە ۇيرەتەدى دەيدى پەداگوگ. روبوتتەحنيكامەن اينالىسقان بالالار بولاشاقتا IT, ينجەنەريا, اۆتوماتيكا جانە جاساندى ينتەللەكت سالالارىن ەركىن مەڭگەرگەن مامان بولىپ شىعادى.
سونداي-اق جي كومەگىمەن حيميا زەرتحانالارىندا وقۋشىلار ەرىتىندىلەردى دايىنداپ, رەاكتسيالاردىڭ ءجۇرۋ جىلدامدىعىن زەرتتەپ, زاتتاردىڭ قاسيەتىن انىقتايدى. مۇنداي تاجىريبەلەر ارقىلى ولار عىلىمي دالدىككە ۇيرەنەدى, زەرتتەۋ ادىستەرىن مەڭگەرىپ, ەكولوگيالىق ساۋاتىن اشادى. حيمياعا قىزىققان وقۋشى كەلەشەكتە مەديتسينا, فارماتسەۆتيكا, ەكولوگيا, حيميالىق تەحنولوگيا ماماندىقتارىنا تاڭداۋ جاسايتىنى بەلگىلى. ال بيولوگيا زەرتحانالارى ميكروسكوپيالىق زەرتتەۋلەرگە, دنق مودەلدەرىمەن جۇمىس ىستەۋگە, ەكولوگيالىق ۇدەرىستەردى باقىلاۋعا مۇمكىندىك بەرەدى. بۇل ساباقتار تابيعات قۇبىلىسىن عىلىمي تۇرعىدان تۇسىندىرەدى. ۇ.باقتيارقىزىنىڭ پىكىرىنشە, بيولوگيا ءپانى وقۋشىلاردىڭ بويىندا بيوتەحنولوگيا, گەنەتيكا, مەديتسينا عىلىمىنا دەگەن قىزىعۋشىلىعىن وياتادى. قىسقاسى, بالانىڭ ىشكى قابىلەتىن اشۋعا «كەلەشەك مەكتەبىندە» بار مۇمكىندىك قاراستىرىلعان.
شىمكەنت
