«جەدەل جاردەم – حالىققا شۇعىل مەديتسينالىق كومەك كورسەتۋدىڭ ماڭىزدى سالاسى. ونسىز دەنساۋلىق ساقتاۋ سالاسىن كوزگە ەلەستەتۋ مۇمكىن ەمەس. قانداي جاعداي بولماسىن, ادامدارعا ءبىرىنشى بولىپ كومەككە ۇمتىلاتىن جەدەل جاردەم قىزمەتىنىڭ ماماندارى. سوندىقتان وسى سالا قىزمەتكەرلەرىنە مۇمكىندىگىنشە جاعداي جاسالۋى كەرەك. بۇگىندە مەملەكەت حالىقتىڭ دەنساۋلىعىن نىعايتۋ ماقساتىندا كوپ جۇمىس اتقارىپ وتىر. سونىڭ ىشىندە مەگاپوليس مەديتسيناسى كەيىنگى جىلدارى ەرەكشە دامىپ كەلەدى. كوپتەگەن مەكەمە جاڭا مەديتسينالىق قۇرالدارمەن جابدىقتالدى. دارىگەرلەر شەتەلدە تاجىريبە الماسىپ, بىلىكتىلىگىن ارتتىرىپ جاتىر. وسىنىڭ ناتيجەسىندە دەنساۋلىق ساقتاۋ سالاسىنىڭ دەڭگەيى جوعارىلادى. شىمكەنت ەلىمىزدىڭ مەديتسينالىق تۋريزمىنە اينالىپ كەلەدى. قالا مەن وڭىرلەردەن بولەك, شەتەلدەن دە شىمكەنتكە كەلىپ ەمدەلىپ جاتقاندار بار. مەديتسينا سالاسىنىڭ ىشىندە جەدەل جاردەم قىزمەتى دە كەيىنگى جىلدارى ەرەكشە قارقىنمەن دامي باستادى. بۇل قىزمەتتىڭ جۇمىسىن وڭتايلاندىرۋ ناتيجەسىندە قازىردە جەدەل جاردەمنىڭ شۇعىل كومەك كورسەتۋدەگى تيىمدىلىگى ارتا ءتۇستى. مەملەكەت وسى باعىتتاعى جۇمىسىن جالعاستىرادى. جەدەل جاردەم قىزمەتى ماماندارىنىڭ بىلىكتىلىگىن كۇشەيتۋ, سوڭعى ۇلگىدەگى قۇرالدارمەن جابدىقتاۋ, مەديتسينا قىزمەتكەرلەرىنىڭ قاۋىپسىزدىگىن قامتاماسىز ەتۋ قاشان دا كۇن تارتىبىندەگى ماڭىزدى الەۋمەتتىك ءارى قۇقىقتىق ماسەلەنىڭ ءبىرى بولىپ قالا بەرەدى», دەدى ع.سىزدىقبەكوۆ.
مەگاپوليس باسشىسى سونداي-اق مەديتسينا ۇيىمدارى مەن شۇعىل قىزمەتتەردىڭ ماتەريالدىق-تەحنيكالىق بازاسىن جاڭارتۋ اكىمدىك جۇمىسىنىڭ نەگىزگى مىندەتتەرىنىڭ ءبىرى ەكەنىن ەرەكشە اتاپ ءوتتى. سونىڭ ىشىندە جەدەل جاردەم اۆتوپاركىن جاڭارتۋ – حالىققا كورسەتىلەتىن شۇعىل مەديتسينالىق كومەكتىڭ ساپاسى مەن جەدەلدىگىن ارتتىرۋداعى ماڭىزدى قادام.
ايتا كەتكەن ءجون, «Hyundai Staria» ماركالى جاڭا سانيتارلىق اۆتوكولىكتەر زاماناۋي مەديتسينالىق قۇرال-جابدىقتارمەن تولىق جابدىقتالعان. كولىكتەردە كارديوگرافتار, دەفيبريللياتور-مونيتورلار, وكپەنى جاساندى جەلدەتۋ اپپاراتتارى, ەلەكترلى سورعىشتار, وتتەگى باللوندارى, ارنايى زەمبىلدەر مەن قورعانىش قالقاندارى قاراستىرىلعان.
سونىمەن قاتار سالتاناتتى ءىس-شارا بارىسىندا دەنساۋلىق ساقتاۋ ۇيىمدارىنا «ال-فارابي فارم لتد» جشس دەمەۋشىلىگىمەن ساتىپ الىنعان مەديتسينالىق جابدىقتاردىڭ ارنايى سەرتيفيكاتتارى تابىستالدى. اتالعان جابدىقتار قاتارىندا جاڭا تۋعان نارەستەلەرگە ارنالعان ينكۋباتورلار, فۋنكتسيونالدىق, رەانيماتسيالىق توسەكتەر بار. مۇنداي مەديتسينالىق قۇرالدار نارەستەلەردىڭ كۇتىمىن جەڭىلدەتۋگە, اۋىر حالدەگى ناۋقاستارعا كوپ جاردەمىن تيگىزۋگە مۇمكىندىك بەرەدى.
جاۋاپتى ماماندار دەنساۋلىق ساقتاۋ سالاسىن جاڭارتۋ مەن شىمكەنت تۇرعىندارىنا مەديتسينالىق قىزمەتتىڭ قولجەتىمدىلىگىن ارتتىرۋ باعىتىنداعى جۇيەلى جۇمىس توقتاۋسىز جالعاسا بەرەتىنىن تىلگە تيەك ەتتى. بۇگىندە قالالىق مەديتسينالىق جەدەل جاردەم قىزمەتى 10 قوسالقى ستانسا بازاسىندا قىزمەت كورسەتەدى. تاۋلىك بويى تۇرعىندارعا 115 بريگادا شاقىرتۋلارعا شۇعىل تۇردە شىعىپ وتىرادى. مەديتسينالىق ماماندار توبىنىڭ ىشىندە 28 دارىگەرلىك, 87 فەلدشەرلىك بريگادا بار.
شىمكەنت
