سۋرەت: syr-media.kz
كەلىسىمگە ءبىر تاراپتان ونەركاسىپ جانە قۇرىلىس ءمينيسترى ەرسايىن ناعاسپاەۆ پەن قىزىلوردا وبلىسىنىڭ اكىمى نۇرلىبەك نالىباەۆ, ەكىنشى تاراپتان يسپانيالىق «Roca Group» كومپانياسىنىڭ ەنشىلەس كاسىپورنى – «روكا قازاقستان» جشس باس ديرەكتورى دانيەل ەرناندەس قول قويدى.
جوبا مەملەكەت باسشىسىنىڭ وڭدەۋشى ونەركاسىپكە ينۆەستيتسيالار تارتۋ مەن يمپورتتى الماستىرۋ جونىندەگى ماقساتتارعا قول جەتكىزۋ ءۇشىن لوكاليزاتسيالاۋدى ارتتىرۋعا قاتىستى قويعان مىندەتتەرىنە سايكەس جۇزەگە اسىرىلىپ جاتىر.
زاۋىت كەراميكالىق سانيتارلىق ونىمدەردى, جۋىناتىن بولمەلەرگە ارنالعان جيھازدار مەن وزگە دە بۇيىمداردى وندىرۋگە ءارى قۇراستىرۋعا ماماندانادى. قۇرىلىس جۇمىستارى كەلەسى جىلدىڭ ءبىرىنشى توقسانىندا باستالادى دەپ جوسپارلاندى. جوبا شەڭبەرىندە 300-گە جۋىق جاڭا تۇراقتى جۇمىس ورىندارىن اشۋ, سونداي-اق وتاندىق مامانداردى وقىتۋ مەن بىلىكتىلىگىن ارتتىرۋ كوزدەلگەن.
كاسىپورىن ۇدەرىستەردى اۆتوماتتاندىرۋدىڭ جوعارى دەڭگەيى بار ءارى ەكولوگيالىق قاۋىپسىزدىكتىڭ الەمدىك ستاندارتتارىنا سايكەس كەلەتىن سانيتارلىق-تەحنيكالىق ونىمدەردى شىعاراتىن ەلىمىزدەگى العاشقى ءوندىرىس بولادى. جوبالىق قۋاتتىلىعى جىلىنا 500 مىڭ بۇيىمدى قۇرايدى. شىعارىلاتىن ءونىمدى ەلىمىزدىڭ ىشكى نارىعىنا جەتكىزۋ مەن ورتالىق ازيا ەلدەرىنە ەكسپورتتاۋ جوسپارلانىپ وتىر. زاۋىتتى ىسكە قوسۋ قوسىلعان قۇنى جوعارى ءونىم ءوندىرىسىن ۇلعايتۋعا ءارى ەلىمىزدىڭ ەكسپورتتىق الەۋەتىن كەڭەيتۋگە مۇمكىندىك بەرەدى.
ايتا كەتۋ كەرەك, ينۆەستيتسيالار تۋرالى كەلىسىم جاساسۋ جوسپارى پرەمەر-مينيستر ولجاس بەكتەنوۆ پەن «Roca Group» ديرەكتورلار كەڭەسىنىڭ توراعاسى سانتياگو دە گومار روكتىڭ وسى جىلدىڭ ماۋسىم ايىنداعى كەزدەسۋى بارىسىندا تالقىلانعان ەدى. وسىلايشا, قۇجاتقا قول قويىلۋى مەن جۇمىستاردىڭ باستالۋى ەل ەكونوميكاسىنىڭ ينۆەستيتسيالىق تارتىمدىلىعىن ارتتىرۋ جونىندەگى جۇيەلى شارالاردىڭ ناتيجەسىن ءارى ينۆەستورلار سەنىمىنىڭ جوعارى دەڭگەيىن
كورسەتەدى.
«Roca Group» وكىلدەرى قازاقستان ولار ءۇشىن ستراتەگيالىق ماڭىزدى نارىق بولىپ سانالاتىنىن اتاپ ءوتتى. ەلىمىزدەگى قولايلى ينۆەستيتسيالىق احۋالعا وڭ باعا بەردى.
