فوتو: جاساندى ينتەللەكت جانە تسيفرلىق دامۋ مينيسترلىگى
مەملەكەت باسشىسى قاسىم-جومارت توقاەۆتىڭ اقش-قا جاساعان رەسمي ساپارى اياسىندا بىرقاتار قۇجاتتارعا قول قويىلدى. بۇگىن پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, Beeline قازاقستان باسشىلىعى جانە SpaceX وكىلدەرى جاڭا تەحنولوگيانىڭ مۇمكىندىكتەرىن ءىس جۇزىندە كورسەتتى.
سىناق بارىسىندا Starlink سپۋتنيكتىك جەلىسى مەن Beeline-نىڭ جەرۇستى ينفراقۇرىلىمى بىرىكتىرىلىپ, قاراپايىم ۇيالى تەلەفون ارقىلى SMS-حابارلامالار مەن مەسسەندجەر قوڭىراۋلارى ءساتتى جۇزەگە اسىرىلدى. Direct-to-Cell تەحنولوگياسىنىڭ باستى ەرەكشەلىگى – ۇيالى تەلەفوندى ەشقانداي قوسىمشا جابدىقسىز تىكەلەي سپۋتنيككە قوسۋ مۇمكىندىگى. بۇل يننوۆاتسيا ۇيالى بايلانىس مۇنارالارى جوق تاۋلى ايماقتار مەن شالعاي اۋىلداردا بايلانىس ماسەلەسىن تۇبەگەيلى شەشپەك.
جوبانى ەنگىزۋ كەزەڭ-كەزەڭىمەن جۇرەدى:
- باستاپقى كەزەڭدە پايدالانۋشىلارعا SMS-حابارلامالار جىبەرۋ قىزمەتى اشىلادى. كەيىن دىبىستىق بايلانىس پەن باسقا دا سەرۆيستەر قولجەتىمدى بولادى;
- 2027 جىلى نەگىزگى قىزمەت تۇرلەرىنىڭ باسىم بولىگى تولىق ىسكە قوسىلادى.
«بۇل باستاما مەملەكەت باسشىسىنىڭ ەلدى تولىق تسيفرلاندىرۋ جونىندەگى تاپسىرماسىنا سايكەس كەلەدى. بارلىق وڭىردە تسيفرلىق قىزمەتتەردىڭ سەنىمدى جۇمىس ىستەۋى ءۇشىن زاماناۋي بايلانىس ارنالارى قاجەت. سپۋتنيكتىك بايلانىس – وسى ارحيتەكتۋرانىڭ ماڭىزدى بولىگى. ەڭ ماعىزدىسى – ءاردايىم بايلانىستا بولۋ مۇمكىندىگى. توتەنشە جاعدايلاردا, شالعاي وڭىرلەردە نەمەسە جولدا بۇل قىزمەت ءتۇرى شەشۋشى ءرول اتقارادى. مۇنداي تەحنولوگيالار تسيفرلىق تۇراقتىلىقتى ارتتىرىپ, ازاماتتاردىڭ ءومىر ساپاسىن جاقسارتادى», دەدى جاسلان ماديەۆ.
وسىلايشا, قازاقستان جاھاندىق وزىق تەحنولوگيالاردى يگەرۋدە ورتالىق ازيا بويىنشا كوش باستاپ, تسيفرلىق تۇراقتىلىقتى جاڭا دەڭگەيگە كوتەرمەك.
