يرينا ۆلاح گاگاۋزيانىڭ جاڭا باسشىسى بولىپ سايلاندى

استانا. 23 ناۋرىز. مولدوۆاداعى گاگاۋزيا اۆتونوميالى اكىمشىلىك تەرريتوريالىق بولىنىسىندە كەشە بولىپ وتكەن سايلاۋدىڭ قورىتىندىسى بويىنشا يرينا ۆلاح بۇل ولكەنىڭ باشكانى بولىپ سايلاندى. بۇل تۋرالى «پوليت.رۋ» حابارلادى. «مولدوۆاداعى وپپوزيتسيالىق سوتسياليستەر پارتياسىنىڭ ليدەرى يگور ديدون ءوزىنىڭ Facebook-تەگى پاراقشاسىندا يرينا ۆلاحتى باشكان (ايماق باسشىسى) سايلاۋىندا جەڭىسكە جەتۋىمەن قۇتتىقتادى», - دەپ جازادى پورتال. «بيۋللەتەندەر 100% سانالىپ شىقتى. يرينا ۆلاح 53%.-دان ارتىق داۋىس الدى. گاگاۋزيانىڭ جاڭا باشكانى – ۆلاح يرينا فەدوروۆنانى جەڭىسىمەن قۇتتىقتايمىز», - دەپ جازدى دودون.

بۇدان الدىن گاگاۋزيا ورتالىق سايلاۋ كوميسسياسى سايلاۋعا كەلۋشىلەردىڭ اقىرعى ناتيجەلەرىن جاريالاعان بولاتىن. ول 58,1%-دى قۇرادى. گاگاۋزيا ورتالىق سايلاۋ كوميسسياسى سايلاۋدىڭ العاشقى ناتيجەلەرىن دۇيسەنبى كۇنى حالىققا جاريالايتىن بولادى. يرينا ۆلاح 1974 جىلعى 26 اقپاندا مولداۆيا كسر-ءنىڭ گاگاۋزيا ايماعىنداعى كومرات قالاسىندا تۋعان. مولدوۆان ساياساتكەرى, مولدوۆا پارلامەنتىنىڭ 2005 جىلدان بەرگى دەپۋتاتى. ول 1991 جىلى كومراتتىڭ گايدارجي اتىنداعى تەورەتيكالىق كوللەدجىن ۇزدىك ءبىتىرىپ, 1991-1996 جىلدارى كومرات مەملەكەتتىك ۋنيۆەرسيتەتىنىڭ زاڭ فاكۋلتەتىنەن ءبىلىم الىپ شىقتى. كاسىبي قىزمەتىن 1996 جىلى گاگاۋزياداعى چادىر-لۋنگا قالاسى سالىق ينسپەكتسياسىنىڭ زاڭگەرى بولۋدان باستادى. 2005 جىلى كوممۋنيستەردىڭ ءتىزىمى بويىنشا مولدوۆا پارلامەتىنە دەپۋتات بولىپ سايلاندى. كەيىن بۇل پارتيادان شىعىپ كەتتى. ال بۇل سايلاۋعا تاۋەلسىز كانديدات رەتىندە قاتىستى. ول 2010 جىلعى سايلاۋعا دا قاتىسقان بولاتىن. وندا ءبىرىنشى تۋردا سايلاۋشىلاردىڭ ۇشتەن ءبىر داۋىسىنا يە بولدى. 2008 جىلى دوكتورلىق ديسسەرتاتسيا قورعادى. قازىر اننا ەسىمدى قىز ءوسىرىپ وتىر. ۆلاح نەگىزىنەن ورىس تىلىندە سويلەيدى. سايلاۋعا 10 ۇمىتكەر قاتىستى. گاگاۋزيا باشكانى سايلاۋىندا جەڭىسكە جەتكەن يرينا ۆلاح وزىنە سەنىم كورسەتكەندەرى ءۇشىن سايلاۋشىلارىنا العىس ايتىپ, وپپونەنتتەرىن ايماقتىڭ يگىلىگى ءۇشىن بىرگە جۇمىس جاساۋعا شاقىردى. «مەن گاگاۋزيانىڭ ءبىرتۇتاس بولعانىن قالايمىن. مەن ءبىزدىڭ ءبارىمىزدىڭ ايماقتىڭ يگىلىگى ءۇشىن بىرگە جۇمىس جاساۋىمىزدى قالايمىن», - دەدى ول. جاڭا باشكان مولدوۆانى گۇلدەندىرۋ گاگاۋزيادان باستالاتىنىن ايتتى.

ەسكە سالا كەتەيىك, گاگاۋزيا – مولدوۆانىڭ وڭتۇستىك-شىعىسىنداعى بۋدجاك دالاسىن جايلاپ جاتقان اۆتونوميالى اكىمشىلىك تەرريتوريالىق بولىنىستەگى ايماق. وندا تۇراتىن حالىقتىڭ 80 پايىزىن تۇركى ءتىلدى, پراۆوسلاۆيە ءدىندى گاگاۋزدار قۇرايدى. بۇل ايماقتاعى جەر-سۋ اتتارىنىڭ ءوزى بىزگە باياعى عۇن, وعىز, قىپشاق داۋىرلەرىنەن حابار بەرەدى. ال قايسىبىر ەلدى مەكەندەردىڭ اتاۋلارى قازاقتىڭ رۋ-تايپالارىنىڭ نىسپىلارىنا ۇقساس كەلەدى. سولاردىڭ اراسىندا كومرات (قوڭىرات), تاراكليا (تاراقتى) سەكىلدى قالالار بار. مۇرات ايتقوجا. دەرەك, فوتو: پوليت.رۋ