ماۋلەن اشىمباەۆ اتالعان ءراسىمنىڭ مەملەكەتتىك مەرەكە – تاۋەلسىزدىك كۇنى قارساڭىندا وتكىزىلۋىنىڭ رامىزدىك مانىنە نازار اۋدارىپ, بۇل كۇندە بوس ناۋقانعا جول بەرمەي, تەرەڭ مازمۇن, دۇرىس قۇندىلىقتار جانە ۇزاقمەرزىمدى باعداردى دارىپتەۋدىڭ ماڭىزى زور ەكەنىن ايتتى. سونداي-اق ول كىتاپتىڭ ۇلتتىق بىرەگەيلىكتى نىعايتۋ جانە جاڭا قوعامدىق ەتيكا قالىپتاستىرۋ جولىنداعى ەرەكشە رولىنە توقتالدى. سەنات توراعاسى مەملەكەت باسشىسى بۇل ماڭىزدى باعىتتارعا ۇنەمى باسا ءمان بەرىپ كەلە جاتقانىن اتاپ ءوتتى.
«بىرەگەيلىك تۋرالى بۇگىنگى سۇحباتىمىز پرەزيدەنت قاسىم-جومارت توقاەۆ بەلگىلەپ بەرگەن يدەولوگيالىق باعدارمەن تىكەلەي بايلانىستى. مەملەكەت باسشىسى جاڭا قوعامدىق ەتيكا قالىپتاستىرۋعا, جاۋاپكەرشىلىك مادەنيەتىن ىلگەرىلەتۋگە, «زاڭ مەن ءتارتىپ» قاعيداتىن دامىتۋعا جانە قوعامعا قىزمەت ەتۋگە دايىن ادال, ءبىلىمدى, كەمەلدەنگەن – «ادال ازامات» يدەولوگياسىن نىعايتۋعا ايرىقشا كوڭىل ءبولىپ كەلەدى. وسى ورايدا «رەفورمالار ءمانى» سەرياسىمەن «تۇركىستان» گازەتىنە جاريالانعان ماقالام دا اتالعان ماسەلەگە ارنالعانىن ايتا كەتكەن ءجون. ماقالادا قۋاتتى مەملەكەتتىك ينستيتۋتتارمەن جانە تۇراقتى ەكونوميكامەن قاتار ۇلتتىق بىرەگەيلىك تە قازاقستاننىڭ قازىرگى تاڭداعى ماڭىزدى تىرەكتەرىنىڭ ءبىرى ەكەنىن ايتقان ەدىم», دەپ سەنات توراعاسى اۋقىمدى زەرتتەۋلەر جۇرگىزگەن كىتاپ اۆتورلارىنا العىس ءبىلدىردى.
ايتا كەتەيىك, جاڭا جيناقتىڭ اۆتورلارى – بۇعان دەيىنگى ەڭبەكتەرى اكادەميالىق جانە قوعامدىق ديسكۋرستىڭ ماڭىزدى بولىگىنە اينالعان بەلگىلى زەرتتەۋشىلەر. ولاردىڭ قاتارىندا سەناتتىڭ جوبالارىنا, ونىڭ ىشىندە ساراپشىلار كلۋبى مەن تالداۋ مەكتەبىنىڭ جۇمىسىنا بەلسەندى قاتىسىپ جۇرگەن ءاليما بيسەنوۆا, سۇلتان اكىمبەكوۆ, راديك تەمىرعاليەۆ سەكىلدى بىلىكتى ماماندار بار.
ءىس-شارادا ماۋلەن اشىمباەۆ ەمپيريكالىق دەرەكتەرمەن قاتار, تەرەڭ فيلوسوفيا, مادەني جادى جانە تاريحي سانا جاڭا ەڭبەكتىڭ بىرەگەيلىگىن ايشىقتاي تۇسەتىنىن تىلگە تيەك ەتتى. سونداي-اق كىتاپتا سالت-داستۇرلەر مەن شەجىرە بىرەگەيلىگى, كوممەموراتيۆتى تاجىريبەلەر, وتباسىلىق قاتىناستاردىڭ وزگەرۋى, قالا ءومىرىنىڭ جاڭا فورمالارى, قۇندىلىقتاردىڭ قۇبىلۋى كەڭىنەن تالدانعانىن اتاپ وتكەن ءجون. مۇنداي تاقىرىپتار وقىرمانعا ۇلتتىق مادەنيەتتىڭ ومىرشەڭ, كوپقىرلى جانە ديناميكالىق مانگە يە ەكەنىن كورۋگە مۇمكىندىك بەرەدى.
